توتەنشە جاعدايلار مينيسترلىگىنىڭ رەسمي وكىلى تالعات ءۋاليدىڭ حابارلاۋىنشا, ءبىر اي بۇرىن جوعالعان سۇڭگۋىردىڭ دەنەسى بۇگىن تابىلىپ وتىر.
«2021 جىلدىڭ 3 ساۋىرىندە شۋ اۋدانىنىڭ تاسوتكەل سۋ قويماسىندا 1997 جىلى تۋعان ازاماتشانى ىزدەستىرۋ كەزىندە قاتتى جەلدەن قايىق اۋدارىلىپ, سالدارىنان جامبىل وبلىستىق توتەنشە جاعدايلار دەپارتامەنتىنىڭ جەدەل-قۇتقارۋ جاساعىنىڭ باس قۇتقارۋشىسى جۇماعالي جەڭىسبەك ۇلى ءابدىراحمانوۆ ءىس-ءتۇسسىز كەتكەن بولاتىن. ىزدەستىرۋ-قۇتقارۋ جۇمىستارى 35 كۇن بويى جۇرگىزىلدى», دەيدى ۆەدومستۆونىڭ رەسمي وكىلى.
بۇگىن ساعات 12.20-دا شۋ اۋدانىنىڭ تاسوتكەل اۋىلىنان 3 شاقىرىم جەردە, تاسوتكەل سۋ قويماسىندا الماتى وبلىسى توتەنشە جاعدايلار دەپارتامەنتىنىڭ جەدەل-قۇتقارۋ جاساعى جۇماعالي ءابدىراحمانوۆتىڭ دەنەسىن تاپتى.
ۆەدومستۆونىڭ مالىمەتىنشە, ىزدەستىرۋ جۇمىستارى باستالعاننان بەرى بارلىعى 130-دان استام ادام, كينولوگتار, 16 تەحنيكا, 2 تىكۇشاق, 9 ءجۇزۋ قۇرالى جۇمىلدىرىلعان.
جۇماعالي جەڭىسبەك ۇلى ءابدىراحمانوۆ ازاماتتىق قورعانىس ورگاندارىندا 2001 جىلدىڭ ناۋرىز ايىنان بەرى قىزمەت اتقارىپ كەلگەن. ۇيلەنگەن, ارتىندا ەكى بالاسى قالدى.
