مىنە, سپورت سالاسىنداعى سونداي جارىستاردىڭ قاتارىنا ەندى گرەك-ريم كۇرەسىنەن قازاقستاننان شىققان تۇڭعىش وليمپيادا چەمپيونى, الەم بىرىنشىلىگىنىڭ جەڭىمپازى جانە بىرقاتار حالىقارالىق جارىستا ەل نامىسىن ابىرويمەن قورعاعان قازاقستاننىڭ ەڭبەك ەرى جاقسىلىق ۇشكەمپىروۆتى ەسكە الۋعا ارنالعان حالىقارالىق تۋرنير قوسىلدى.
«وزىمنەن كەيىن كۇرەس تۇرلەرىنەن قازاقتان شىققان وليمپيادا چەمپيونىن كورىپ كەتسەم, ارمانىم جوق ەدى», دەپ كوزى تىرىسىندە ايتىپ, كەيىننەن بۇل ارمانىن سوڭىنان ەرگەن بالۋاندارعا اماناتتاپ كەتكەن داڭقتى بالۋان جاقسىلىق ۇشكەمپىروۆ بىلتىر دۇنيەدەن وتكەن ەدى.
ارتىندا قالعان ۇرپاعى, ەلى جاقسىلىق ۇشكەمپىروۆتىڭ ەسىمىن ءاردايىم ەل جادىندا ساقتاۋ ءۇشىن بيىلدان باستاپ داڭقتى وليمپيادا چەمپيونىن ەسكە تۇسىرۋگە ارنالعان 2001-2003 جىلى تۋعان جاسوسپىرىمدەر اراسىنداعى حالىقارالىق تۋرنير ۇيىمداستىردى.
ايتۋلى جارىس ەلوردا تورىندە جاقسىلىق ۇشكەمپىروۆتىڭ ءوز ەسىمى بەرىلگەن جەكپە-جەك سارايىندا وتكىزىلدى. جارىستىڭ اشىلۋ سالتاناتىنا مادەنيەت جانە سپورت ءمينيسترى اقتوتى رايىمقۇلوۆا, نۇر-سۇلتان قالاسى اكىمىنىڭ ورىنباسارى باقتيار ماكەن, بىرىككەن كۇرەس الەمى بيۋروسىنىڭ مۇشەسى, ازيا كەڭەسىنىڭ پرەزيدەنتى داۋلەت تۇرلىحانوۆ جانە گەنەرال-پولكوۆنيك ءسات توقپاقپاەۆ قاتىستى.
اقتوتى راحمەتوللاقىزى سپورتشىلارعا قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ قۇتتىقتاۋ حاتىن جەتكىزدى. «قۇرمەتتى دوستار, بارشاڭىزدى وليمپيادا جەڭىمپازى, قازاقستاننىڭ ەڭبەك ەرى جاقسىلىق ۇشكەمپىروۆتى ەسكە تۇسىرۋگە ارنالعان حالىقارالىق ءتۋرنيردىڭ اشىلۋىمەن قۇتتىقتايمىن. بۇل – بۇكىل دۇنيە ءجۇزى ءۇشىن ايتۋلى وقيعا. جاقسىلىق ءامىرالى ۇلى – قازاقتان شىققان تۇڭعىش وليمپيادا چەمپيونى عانا ەمەس, بۇكىل ەل ىقىلاسىنا بولەنگەن ەرەكشە تۇلعا. ول سانالى عۇمىرىن ەلىنە قىزمەت ەتۋگە ارناپ, تۋعان ولكەسىن وركەندەتۋگە ولشەۋسىز ەڭبەك ءسىڭىردى. جاقسىلىق ۇشكەمپىروۆتىڭ ءومىر جولى وسكەلەڭ ۇرپاققا قاشاندا ونەگە. حالقىمىزدىڭ ءبىرتۋار پەرزەنتىنىڭ ەسىمىن ۇلىقتاپ, ەڭبەگىن باعالاۋ جولىندا بۇگىنگىدەي ءىس-شارانىڭ ماڭىزى زور. بايراقتى باسەكەگە قاتىسۋشىلارعا ساتتىلىك تىلەيمىن», دەلىنگەن قۇتتىقتاۋ حاتتا.
باقتيار ماكەن قازاقتىڭ داڭقتى بالۋانى جاقسىلىق ۇشكەمپىروۆكە ەلوردادا ەسكەرتكىش اشىلاتىنىن ايتىپ ءوتتى.
«بۇگىنگى جارىسقا, ەلوردامىزعا كەلگەن بارشا قوناققا قوش كەلدىڭىزدەر دەيمىز. جاقسىلىق اعامىز قازىر ارامىزدا بولماسا دا ەسىمى ءاردايىم جادىمىزدا. بىلتىر بارشا حالىقتىڭ قولداۋىمەن نۇر-سۇلتان قالاسىنداعى جەكپە-جەك سارايىنا ەلىمىزدىڭ ءبىرتۋار ۇلى جاقسىلىق ۇشكەمپىروۆتىڭ ەسىمى بەرىلگەن بولاتىن. بيىل اتالعان سپورت كەشەنىنىڭ ءدال الدىنا اعامىزدىڭ ەسكەرتكىشىن قويۋ جوسپارلانىپ وتىر», دەدى قالا اكىمىنىڭ ورىنباسارى.
ءۇش كۇنگە سوزىلعان حالىقارالىق جارىستا قازاقستان, رەسەي, گرۋزيا, ۋكراينا, تاجىكستان, قىرعىزستان جانە وزبەكستاننان كەلگەن 250-دەن اسا جاس سپورتشى 55, 60, 63, 67, 72, 77, 82, 97, 130 كيلو سالماقتاردا ءوزارا كىم مىقتىنى انىقتادى. جاقسىلىق ۇشكەمپىروۆتىڭ ءوزى بەلدەسكەن گرەك-ريم كۇرەسىندە بوز كىلەمگە شىققان بالۋانداردان بەس وتانداسىمىز حالىقارالىق جارىستىڭ جەڭىمپازى اتاندى. اسا جەڭىل سالماقتا (55 كگ) ونەر كورسەتكەن جەرلەسىمىز ەراسىل مامىربەكوۆ توپ جاردى. وتانداسىمىز فينالدىق سايىستا گرۋزيالىق دميتري كحاچيدزەننەن ايلاسىن اسىرىپ كەتتى.
سونىمەن قاتار كەيىنگى ءۇش سالماقتىڭ فينالى, اتاپ ايتار بولساق, 60, 67 جانە 77 كيلو سالماقتىڭ التىن جۇلدە ءۇشىن سايىستارى قانداستارىمىزدىڭ اراسىندا ءوتتى. 60 كيلودا نۇرسۇلتان بازاربەكوۆ التىن جۇلدەنى يەلەنسە, ايبەك ەسمۇراتوۆ كۇمىس جۇلدەنى قاناعات تۇتتى. 67 كيلودا ءدىن-مۇحاممەد قوشقار نۇرسۇلتان جومارتوۆقا قاراعاندا الىمدى بولدى. ال 77 كيلودا ۆەيسال ەيۋبوۆقا تەڭ كەلەر قارسىلاس تابىلمادى. ول فينالدا نۇرجان اساندى جەڭىپ كەتتى. اسا اۋىر سالماقتا بەلدەسكەن جەرلەسىمىز فينالدا قىرعىزستاندىق داۆران سىدىكوۆتان ايلاسىن اسىرىپ, قازاقستان قۇراماسىنىڭ قورجىنىنا بەسىنشى التىن جۇلدەنى سالدى.
ال 63 جانە 72 كيلو سالماقتاردا گرۋزيالىق بالۋاندارعا تەڭ كەلەر قارسىلاس تابىلمادى. 63 كيلودا ديەگو چحيكۆادزە تۇعىردىڭ ەڭ بيىك ساتىسىنا كوتەرىلسە, 72 كيلودا گەورگي چحيكۆادزە التىن مەدال جەڭىپ الدى. 82 كيلودا قىرعىزستاندىق بالۋان بەكزات ورۋنكۋلۋلىنىڭ باعى جانسا, 97 كيلودا وزبەكستاندىق بالۋان ابروربەك نۋرمۋحاممەدوۆ مىقتىلىق تانىتتى.
جالپىكوماندالىق ەسەپتە قازاقستاندىق بالۋاندار ءبىرىنشى ورىن يەلەندى. كەيىنگى ورىنعا گرۋزيالىق بالۋاندار جايعاستى.
