فۋتبول • 10 مامىر، 2021

«استانانى» قاي كلۋب توقتاتادى؟

14 رەت كورسەتىلدى

فۋتبولدان قازاقستان چەمپيوناتىنىڭ ەكى كۇنگە جالعاسقان كەزەكتى تۋر ويىندارى ءوز مارەسىنە جەتتى، دەپ حابارلايدى Egemen.kz

ونىنشى تۋرداعى جەتى كەزدەسۋدىڭ بەسەۋىندە جەڭىمپاز كوماندا انىقتالسا، قالعان ەكى ماتچتا كوماندالاردىڭ كۇشتەرى تەڭ بولدى.

تۋردىڭ ورتالىق ويىنى جام­بىلدا جەرگىلىكتى «تاراز» بەن تۋر­نير كەستەسىندە جەكە-دارا كوش باس­تاپ كەلە جاتقان ەلوردانىڭ «اس­تانا» كلۋبتارى اراسىندا ءوتتى. جىل باسىندا اۋتسايدەرلەر قا­تارىندا بولادى دەپ كۇتىلگەن «تاراز» چەمپيوناتتىڭ جەتى تۋرىندا ءتورت مارتە جەڭىسكە جەتىپ، ەكى ويىندا قارسىلاستارىمەن ۇپاي ءبولىسىپ، جۇلدەگە ءۇمىتتى كلۋبتار قاتارىنان ءبىر-اق شىقتى. وتكەن تۋردا «توبىلدان» جەڭىلگەن سوڭ الاڭ قوجايىندارى بۇل جولى «استانادان» ۇپاي الۋعا تىرىسقان بولاتىن. الايدا 10 تۋردان بەرى قارسىلاس شىداتپاي كەلە جاتقان ەلوردالىق ۇجىم «تارازدى» دا تىزە بۇكتىردى. ويىنداعى جالعىز ءارى جەڭىستى گولدى ماتچتىڭ 34 مينۋتىندا ابزال بەيسەبەكوۆ سوقتى. وسى 10 تۋردا 13 كوماندا كەمىندە ءبىر مارتە جەڭىلىستىڭ كەر­مەك ءدامىن تاتسا، ازىرگە تەك «اس­تانا» عانا جەڭىلىستىڭ نە ەكەنىن بىلمەي كەلە جاتىر. ەلوردالىق كلۋبتى ەندى قاي كوماندا توقتاتا الادى ەكەن؟

چەمپيوناتتا ءبىرىنشى بولىپ باپكەر اۋىستىرعان «شاحتەر» جاڭا جاتتىقتىرۋشىمەن جاقسى ناتيجەگە قول جەتكىزە باستادى. ماسەلەن، وسى تۋردا الماتىعا ساپار شەككەن «كەنشىلەر» بىلتىرعى ەل چەمپيونى «قايراتتان» ۇپاي الدى. ءبىرىنشى تايمدا كو­مان­دالاردىڭ كۇشى تەڭ بولدى. ال ەكىنشى تايمدا الاڭعا تىڭنان قو­سىلعان شابۋىلشى ارتۋر شۋ­شەناچەۆ 51 مينۋتتا گول سوعىپ، «قايراتتى» ەسەپتە العا شىعاردى. تابلوداعى كورسەتكىش 90 مينۋتقا دەيىن وزگەرىسسىز قالىپ، ويىن «قايراتتىڭ» جەڭىسىمەن اياقتالۋعا جاقىن تۇرعان ەدى. بىراق تورەشى تاراپىنان ەكىنشى تايمعا قوسىلعان ءتورت مينۋتتىڭ سوڭعى مينۋتىندا «شاحتەردىڭ» قاقپاشىسى تي­مۋربەك زاكيروۆ 90 مينۋت بويى شابۋىلشىلار سوعا الماعان گولدى ءوزى سالىپ، كومانداسىن جەڭىلىستەن قۇتقارىپ قالدى.

تۋرنير كەستەسىندە سوڭعى ورىنداردا كەلە جاتقان «تۇران­نان» 1:0 ەسەبىمەن ماسقارا بولىپ جەڭىلگەن «ورداباسى» بۇل جولى ارەڭ دەگەندە سىرت الاڭدا «كاسپيمەن» تەڭ وينادى. ەكى كومانداعا دا جانكۇيەرلەرىن قۋانتۋ ءۇشىن جەڭىسكە جەتۋ وتە ماڭىزدى بولاتىن. ويتكەنى «كاس­پي» دە وتكەن تۋردا «اتىراۋدان» 2:1 ناتيجەسىمەن جەڭىلگەن ەدى. بىراق ەكى ۇجىم دا 90 مينۋت بويى ءبىر-ءبىرىنىڭ وسال تۇسىن تابا المادى. كەزدەسۋ 0:0 ەسەبىمەن تەڭ اياق­تالدى.
ورالدىڭ «اقجايىق» كلۋبىن قابىلداعان «قايسار» قى­زىلوردادا 1:0 ەسەبىمەن قارسى­لاستارىنا جول بەردى. ماتچتىڭ شە­شۋشى گولىن 76 مينۋتتا رەسەيلىك شابۋىلشى دميتري ميچۋرەنكوۆ سوقتى. ەكىنشى ماتچ قاتارىنان ءۇش ۇپايعا قول جەتكىزگەن «اقجايىق» 15 ۇپايمەن سەگىزىنشى ورىننان بەسىنشى ورىنعا كوتەرىلدى. ال ءتورت ويىندا ءۇشىنشى مارتە جەڭىلگەن قىزىلوردالىق كوماندا التى ۇپاي­مەن 13-ورىنعا سىرعىدى.

كەلەسى كۇنى العاشقى بولىپ جاسىل الاڭعا «جەتىسۋ» مەن «اق­توبە» شىقتى. بۇل كەزدەسۋ 10-تۋرداعى ستاتيستيكاعا باي ويىن­­نىڭ ءبىرى بولدى دەپ اي­تا الامىز. ياعني ونىنشى تۋرداعى ەڭ كوپ گول دا، ەڭ كوپ «سارى» جانە «قىزىل» قاعاز دا وسى ويىندا كور­سەتىلدى.

تالدىقورعانداعى الا دوپ باسەكەسىندە التى گول سوعىلىپ، تورەشى ەكى ويىنشىنى الاڭنان قۋسا، 9 فۋتبولشىعا «سارى» قاعاز كورسەتتى. اسا شيەلەنىستى وتكەن ويىندا «اقتوبە» وزبەكستاندىق شا­بۋىلشى يگور سەرگەەۆتىڭ حەت-تريگى جانە يۋري پەرتسۋح پەن بويان ءدۋبايچتىڭ سوققان ءبىر-ءبىر گولدارىنىڭ ارقاسىندا 5:1 ەسەبىمەن «جەتىسۋدىڭ» تاس-تال­قانىن شىعاردى. بۇل – «اقتوبەنىڭ» كەيىنگى بەس ماتچتاعى العاشقى جەڭىسى. ايتپاقشى، «اقتوبە» قا­تا­رىنان ءتورت ويىندا جەڭىلگەن سوڭ بۇرىنعى باس باپكەرى الەكسەي با­گانى وتستاۆكاعا جىبەرگەن بولاتىن.

قوستانايدا «توبىل» مەن «اتى­راۋ» شەبەرلىك بايقاستى. بۇل ماتچ­تا ەكى كلۋب ويىنشىلارى 80 مينۋت بويى ءبىر-ءبىرىنىڭ قاقپا كىل­تىن تابا الماي، ءبىراز ابىگەرگە ءتۇس­تى. بىراق ماتچ اياقتالعانعا دەيىن «توبىل ارەناعا» جينالعان جان­كۇيەرلەر ءبىر ەمەس، ەكى گولدىڭ كۋاسى بولدى. «توبىل» ساپىنان ەكىنشى تايمدا الاڭعا شىققان سەرىكجان مۋجيكوۆ 80 مينۋتتا قوستانايلىقتاردى ەسەپتە العا جەتەلەسە، قوسىمشا ۋاقىتتا جەرەمي مان­زوررو وسى ماۋسىمداعى ال­عاشقى گولىن سوعىپ، كومانداسىنا جەڭىس سىيلادى. بيىلعى سۋ­پەركۋبوك يەلەرى ماڭىزدى ءۇش ۇپايعا قول جەتكىزىپ قانا قوي­ماي، «اتىراۋدىڭ» بەس ويىنعا جال­عاسقان جەڭىلىسسىز سەريا­سىنا نۇكتە قويدى.
قازاقستان چەمپيوناتىنا بيىل عانا قوسىلعان تۇركىستان وب­لىسىنىڭ «تۇران» كلۋبى ەكىنشى تۋر قاتارىنان سەنساتسيا جاساپ كە­لەدى. وتكەن تۋردا جۇلدەلى ورىنداردان ءۇمىتتى «ورداباسى» كومانداسىن سىرت الاڭدا 1:0 ەسەبىمەن تىزە بۇك­تىرسە، بۇل تۋردا پەتروپاۆلدىڭ «قىزىلجار» ۇجىمىنان ءدال سونداي ەسەپپەن ايلاسىن اسىرىپ كەتتى. ويىنداعى جالعىز ءارى جەڭىستى گولدى پەنالتيدەن ستەفان جيۆكوۆيچ سوقتى.
14 جانە 15 مامىر كۇندەرى وتەتىن 11-تۋردا «اقتوبە» – «قاي­سار»، «استانا» – «جەتىسۋ»، «شاحتەر» – «تۇران»، «اقجايىق» – «قاي­رات»، «ورداباسى» – «توبىل»، «قىزىلجار» – «كاسپي» جانە «اتىراۋ» – «تاراز» كوماندالارى كەزدەسەدى.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار