كەشەگى كۇننىڭ ءتىرى كۋاگەرى, وتكەن شاقتىڭ شىنايى شەجىرەسى بولعان ازاماتتاردىڭ ءجۇرىپ وتكەن جولى جاستاردىڭ بويىندا وتانسۇيگىشتىك قاسيەتتى قالىپتاستىرۋدا دا ايتارلىقتاي ماڭىزعا يە. بۇگىنگى تاڭدا تاراز قالاسىندا 20 مايدانگەر بار. قازىنالى قارتتارعا قانداي قۇرمەت كورسەتىلسە دە جاراسىمدى.
بيىل ۇلى جەڭىستىڭ 76 جىلدىعى. قانقاساپ قىرعىندا تۋعان جەرىن قىزعىشتاي قورعاعان ارداگەرلەردىڭ قۇرمەتىنە, ۇلى مەرەكە قارساڭىندا قالا كولەمىندە بىرقاتار ءىس-شارالار ۇيىمداستىرىلۋدا. ۇلى جەڭىس مەرەكەسىنە وراي, تاراز قالاسى اكىمدىگى ىشكى ساياسات بولىمىنە قاراستى «جاستار رەسۋرستىق ورتالىعى» مەكەمەسىنىڭ ۇيىمداستىرۋىمەن «ارداگەرلەردى ارداقتايىق» اتتى اكتسيا ۇيىمداستىرىلدى. اكتسيا بارىسىندا «تەمىرقازىق» جانە «جالىن» ۆولونتەرلىق قوزعالىسىنىڭ ەرىكتىلەرى ۇلى وتان سوعىسى ارداگەرلەرىنىڭ تۇرعىلىقتى مەكەن-جايلارىنا بارىپ, ولاردىڭ ءۇي-جايىن جيناستىرۋ, اكتەۋ, جەر قوپارۋ, اۋلالارىن قوقىستان تازارتۋ جۇمىستارىن اتقاردى. قارت مايدانگەرلەر دە جاستارعا اق باتاسىن بەرىپ, ەندى سوعىس اتتى زوبالاڭنىڭ قايتالانباۋىن تىلەدى.
جامبىل وبلىسى
