رۋحانيات • 07 مامىر، 2021

قادىر ءتۇنىنىڭ قاسيەتى

1336 رەت كورسەتىلدى

قاسيەتتى رامازان ايىندا كۇللى مۇسىلمان بالاسىنا پارىز بولعان ورازا قۇلشىلىعىنىڭ ىشىندە مىڭ ايدان دا قادىرلى «قادىر ءتۇنى» بار. بۇل كۇن بيىل مامىردىڭ 8-ىنەن 9-ىنا قاراعان تۇنگە سايكەس كەلۋدە.

اللا تاعالا قادىر ءتۇنىنىڭ دارەجەسىن كوتەرگەن. ويتكەنى بۇل تۇندە تىلەگەن دۇعا-تىلەكتەر قابىل بولادى. راببىمىز پەندەسىنە باسقا تۇندەردە بەرمەگەن ريزىق-نەسىبەسىن وسى تۇندە ۇلەستىرەدى. سول سەبەپتى، مۇسىلمان قاۋىمى بۇل قۇلشىلىقتى قۇر جىبەرىپ الماۋعا تىرىسادى.

جالپى، قادىر ءتۇنىنىڭ قاسيەتى قانداي، دەگەنگە توقتالساق: بىرىنشىدەن بۇل تۇندە پايعامبارىمىزعا (س.ع.س) العاشقى قۇران اياتى تۇسكەن. قاسيەتتى كىتاپتىڭ «قا­دىر» سۇرەسىنىڭ 1-اياتىندا: «راسىندا، ءبىز ونى (قۇران كارىمدى) قادىر ءتۇنى تۇسىر­دىك» دەيدى.

ەكىنشى قاسيەتى – بۇل ءتۇندى قۇلشىلىقپەن وتكىزگەن پەندەنىڭ جاراتۋشىسى الدىندا دارەجەسى ارتادى، تىلەگەن دۇعاسى قابىل بولادى. بۇل تۋرالى ۇلكەن عۇلاما جازايري: «قادىر ءتۇنى – ءسوزسىز ەڭ جاقسى ءتۇن! اللا تاعالا ونى بەرەكەلى ەتتى. ول ءتۇنى قۇراندى ءتۇسىرىپ، باسقا تۇندەردەن ەرەكشەلەدى. سون­داي-اق وسى ءتۇندى قۇلشىلىقپەن وتكىزگەن ادامعا سەكسەن ءۇش جىل عيبادات ەتكەننىڭ ساۋابى جازىلادى»، دەگەن ەكەن.

ءۇشىنشى قاسيەتى – بۇل ءتۇنى ادامنىڭ تاعدىرى بەكىتىلەدى. بۇل تۋرالى عۇلاما عالىم مۋجاھيت: «قادىر ءتۇنى – تاعدىر ءتۇنى. اللا تاعالا بۇل ءتۇنى كەلەسى جىلعى وسى تۇنگە دەيىن كىمنىڭ اجالى جەتەتىنىن، كىمگە قانشا ريزىق-نەسىبە بولىنەتىنىن، ت.ب. ۇكىم­دەردى بەلگىلەيدى»، دەگەن ەكەن.

ءتورتىنشى قاسيەتى – بۇل تۇندە ازعىرۋشى ءازازىل تۇساۋلانادى. بۇل ۇكىم جايلى ۇلكەن ساحابا يبن ابباستىڭ: «بۇل – اماندىق، ەسەندىك، تىنىشتىق ءتۇنى. بۇل ءتۇنى شايتاندار ادامدارعا تىنىشتىق بەرەدى. ولار ادامدارعا جاقىندامايدى، ازعىرىپ، تۋرا جولدان تايدىرا المايدى»، دەگەن ۇكىمى بار.

بەسىنشى قاسيەتى – كۇنالار كەشىرىلەدى. پايعامبارىمىز (س.ع.س): «كىمدە-كىم وسى تۇندە اللاعا يمان كەلتىرىپ، ساۋابىنان ۇمىتتەنىپ، قۇلشىلىق ەتەتىن بولسا، اللا تاعالا ونىڭ بۇرىنعى ىستەگەن بارلىق كۇناسىن، كەمشىلىكتەرىن، قاتەلىكتەرىن كەشىرەدى»، دەگەن.

كەلەسى سۇراق: «قادىر ءتۇنىن قالاي وتكىز­گەن دۇرىس؟» دەگەنگە توقتالساق، يسلام عۇلامالارى ءبىراۋىزدان تومەندەگى ۇكىمدەردى دۇرىس دەپ تاپقان. ەڭ اۋەلى، بۇل تۇندە اللا ريزاشىلىعى ءۇشىن عي­بادات جاساپ، قۇران نەمەسە ناماز وقىپ، قۇلشىلىق سەزىمدەرىمىزدى ارتتىرۋىمىز كەرەك ەكەن. ودان كەيىن قادىرلى پايعامبارىمىزعا (س.ع.س) سالاۋات ايتىپ، ونىڭ شاپاعاتىنا ءۇمىت ەتۋمەن قاتار، ۇمبەتى ەكەنىمىزدى سەزىنىپ، اللا ەلشىسىنىڭ حاديستەرىنە امال ەتكەن دۇرىس دەگەن پايىم بار. سونىمەن قاتار ادامدى ىزگىلىككە باستايتىن ۋاعىز-ناسيحات تىڭداپ، سۇحباتتار قۇرىپ، كۇندەلىكتى كۇيبەڭ تىر­شىلىك بارىسىندا جۇرەككە تۇسكەن كىر­بىڭدى جۋىپ-شايىپ، كوڭىلگە ۇيالاعان كومەسكىلىكتەن ارىلۋعا ءتيىستىمىز.

ءسوز سوڭىندا ايتارىمىز، قادىر ءتۇنىنىڭ قۇرمەتىنە راببىمىزدان ەلىمىز امان، جۇرتىمىز تىنىش بولسىن دەپ تىلەۋىمىز كەرەك. سونداي-اق قادىر ءتۇنى جاساعان دۇعالار جاقسىلىققا مۇرىندىق بولۋىن، دوستىق پەن باۋىرماشىلدىقتى ارتتىرىپ، يسلام الەمىنىڭ بىرتۇتاستىعىن جانە كۇللى ادامزاتتى اپاتتاردان ساقتا دەپ تىلەۋىمىز شارت ەكەن. مىڭ ايدان دا قايىرلى قادىر تۇنىندە تىلەگەن تىلەكتەرىمىز بەن قۇل­شى­لىقتارىمىزدى اللا تاعالا قابىل ەتكەي!

سوڭعى جاڭالىقتار

الەكسەي تسوي وتستاۆكاعا كەتە مە؟

قازاقستان • بۇگىن، 15:37

كەڭەستەردىڭ قىزمەت اياسى كەڭەيدى

قازاقستان • بۇگىن، 08:37

5 جىلدا – 2 ملرد اعاش

قازاقستان • بۇگىن، 08:36

ءسۇت زاۋىتىنداعى سىناق

ايماقتار • بۇگىن، 08:27

«قارا باۋىر قاسقالداق»

رۋحانيات • بۇگىن، 08:25

ۇقساس جاڭالىقتار