پارلامەنت • 07 مامىر، 2021

وزەكتى ماسەلەلەرگە نازار اۋدارىلدى

33 رەت كورسەتىلدى

سەنات دەپۋتاتتارىنىڭ ايماقتارعا جۇمىس ساپارى جالعاسۋدا. ولار وڭىرلەردەگى الەۋمەتتىك ماسەلەلەرگە جانە جەرگىلىكتى تۇرعىنداردىڭ ۇسىنىس-پىكىرلەرىنە نازار اۋدارۋدا.

سەناتورلار – ءابدالى نۇراليەۆ پەن بەكبولات ورىنبەكوۆ جامبىل وبلىسىنا ساپارى كەزىندە قورداي اۋدانىنىڭ تۇرعىندارىمەن كەزدەسىپ، اۋىل تۇرعىندارىمەن وڭىردەگى پروبلەمالاردى تالقىلادى. گۆاردەيسك كەنتىندەگى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ بازاسىندا وتكەن جەرگىلىكتى اكتيۆپەن كەزدەسۋدە سەناتورلار پاندەميا كەزىندە ورتالىق قىزمەتكەرلەرىنىڭ قىزمەتىنە ەرەكشە ءمان بەرىلگەنىن اتاپ ءوتتى. دەپۋتاتتار سونىمەن قاتار كەنەن ازىرباەۆتىڭ ادەبي-مەموريالدىق مۇراجايىندا بولدى. وندا وتكەن جىلى كۇردەلى جوندەۋ جۇرگىزىلگەن بولاتىن.

* * *

سەناتورلار ءالي بەكتاەۆ پەن ءالىمجان قۇرتاەۆ تۇركىستان وبلىسىنا ساپارى بارىسىندا ءماسليحات دەپۋتاتتارىمەن جانە شاردارا، جەتىساي جانە ماقتاارال اۋداندارىنىڭ اكتيۆىمەن ونلاين-كەزدەسۋ وتكىزدى. ءالي بەكتاەۆتىڭ ايتۋىنشا، ەلىمىز پرەزيدەنتىنىڭ جاڭعىرتۋ جونىندەگى كۇن ءتارتىبىن ىسكە اسىرۋ سەناتورلار جۇمىسىنىڭ نەگىزگى باسىمدىقتارى بولدى. كەزدەسۋدە ءماسليحات دەپۋتاتتارى ءالى دە ءوز شەشىمىن تالاپ ەتەتىن ماسەلەلەردى كوتەرىپ، بىرقاتار ۇسىنىس ايتتى. ولاردىڭ قاتارىندا وبلىستىڭ شاردارا جانە جەتىساي اۋداندارىندا فەرمەرلەردى وتىنمەن جانە تىڭايتقىشتارمەن دەر كەزىندە قامتاماسىز ەتۋ، سونداي-اق ساپالى مەديتسينالىق قىزمەت كورسەتۋ ماسەلەسى بار.

* * *

سەنات دەپۋتاتتارى – نۇرجان نۇرسيپاتوۆ پەن التىنبەك نۇح ۇلى پاۆ­لودار وبلىسىنا جاساعان ساپارى اياسىندا ءوڭىر باسشىسى ابىلقايىر سقا­قوۆ­پەن ەپيدەميالىق جاعداي جانە داعدارىسقا قارسى قابىلدانىپ جاتقان شارالار­دى تالقىلادى. دەپۋتاتتار وڭىرگە جۇمىس ساپارى بارىسىندا وب­لىس­تىڭ ۇلت­تىق قاۋىپسىزدىك، قۇقىق قورعاۋ جانە سوت ورگاندارى قىزمەتكەر­لەرى­مەن كەزدەستى.

نۇرجان نۇرسيپاتوۆ پارلامەنت دەپۋتاتتارىنىڭ باستاماسىمەن ازىرلەنگەن «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ مەملەكەتتىك شەكاراسىن كۇزەتۋ جانە ۇلتتىق قاۋىپسىزدىك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭعا توقتالدى. ول سونداي-اق قۇجات ۇلتتىق قاۋىپسىزدىك ورگاندارىنىڭ باسقارۋ قىزمەتىن وڭتايلاندىرۋعا مۇمكىندىك بەرگەنىن ايتتى. ۇقك شەكارا قىزمەتىنىڭ وكىلدەرى دە وسى زاڭنىڭ قابىلدانۋىنىڭ وڭ اسەرىن اتاپ ءوتتى.

* * *

سەنات دەپۋتاتى دۇيسەنعازى مۋسين شىعىس قازاقستان وبلىسىندا اۋىل تۇرعىندارىمەن كەزدەسۋ كەزىندە شاعىن جانە ورتا بيزنەستى قولداۋ، اگروونەركاسىپتىك كەشەندى دامىتۋ ماسەلەلەرى كەڭىنەن تالقىلاندى. ناقتى ايتقاندا، گلۋحوۆكا اۋىلىنىڭ شارۋالارى مەن سالا ماماندارى نەسيەلەندىرۋدى جەڭىلدەتۋ جانە ۆەتەرينارلىق سەكتوردى دامىتۋدىڭ پەرسپەكتيۆالارى جونىندە وزدەرىن الاڭداتقان تۇيتكىلدەرگە توقتالدى. سەناتور وڭىردەگى وزەكتى ماسەلەلەردىڭ ءبىرى كوروناۆيرۋسقا قارسى ەكپە سالدىرۋ جۇمىسىنا دا ەرەكشە نازار اۋداردى. سونىڭ اياسىندا دۇيسەنعازى مۋسين جەرگىلىكتى ەمحانانىڭ جۇمىسىمەن تانىستى. سونىمەن قاتار ول بەسقاراعاي اۋىلىنداعى كوللەدجگە ارنايى باردى. وقۋ ورنىنىڭ ماتەريالدىق-تەحنيكالىق بازاسىمەن تانىسىپ، كوللەدج باسشىلىعىمەن جانە وقىتۋشىلارىمەن بىرگە اگروونەركاسىپتىك كەشەن سالاسىنا قاجەتتى مامان دايارلاۋ ماسەلەسىن تالقىلادى.

* * *

سەناتور ۆلاديمير ۆولكوۆ الماتى وبلىسىنىڭ قاراساي اۋدانىندا بولدى. ول اۋداندىق ءماسليحات دەپۋتاتتارىمەن كەزدەسىپ، سەناتتىڭ زاڭ شىعارۋ قىزمەتىنە، اتاپ ايتقاندا، پارلامەنتتە قارالىپ جاتقان «قازاقستان رەسپۋبليكاسىنىڭ كەيبىر زاڭنامالىق اكتىلەرىنە اۋداندىق، قالالىق جانە اۋىلدىق بيلىك دەڭگەيلەرىنىڭ دەربەستىگى مەن جاۋاپكەرشىلىگىن كەڭەيتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا توقتالدى، وندا جەرگىلىكتى بيلىك ورگاندارىنا قوسىمشا فۋنكتسيالار بەرۋ، بيۋدجەتتىك راسىمدەردى وڭايلاتۋ، ءماسليحاتتاردىڭ تيىمدىلىگىن ارتتىرۋ جانە ت. ب. ماسەلەلەر كوزدەلىپ وتىر. ۆ.ۆولكوۆ ءماسليحات دەپۋتاتتارىن زاڭ شىعارۋ پروتسەسىنە بەلسەندى قاتىسۋعا جانە ءوڭىردىڭ وزەكتى ماسەلەلەرىن شەشۋ ءۇشىن پارلامەنتپەن ءوزارا ءىس-قيمىل جاساۋعا شاقىردى.

 

 

سوڭعى جاڭالىقتار

الداعى ءۇش تاۋلىكتە كۇن سۋىتادى

اۋا رايى • بۇگىن، 11:55

ۇقساس جاڭالىقتار