ايماقتار • 06 مامىر، 2021

جامبىل وبلىسىندا كەنەدەن زارداپ شەككەندەر كوبەيۋدە

26 رەت كورسەتىلدى

جامبىل وبلىسىندا كەنەدەن زارداپ شەككەندەر كوبەيۋدە، دەپ حابارلايدى Egemen.kz.

جامبىل وبلىسىندا 48 ەلدى-مەكەن كونگو-قىرىم گەمورراگيا­لىق قىزباسىنىڭ تابيعي وشاعى بولىپ ەسەپتەلەدى. جىل باسىنان بەرى وڭىردە 34 ادامدى كەنە شاعىپ، ولار مەديتسينالىق كومەككە جۇگىنگەن. ونىڭ 15-ءى بالالار ەكەن. الايدا، بۇل وتكەن جىلدىڭ وسى كەزەڭىمەن سالىستىرعاندا2 ەسەگە از بولعانىمەن، وبلىستىق دەنساۋلىق ساقتاۋ باسقارماسىنىڭ ماماندارى ءاربىر تۇرعىننىڭ جەكە باس ساقتىق شارالارىن ەسىنەن شىعارماۋى ءتيىس ەكەنىن ەسكەرتۋدە.

كەنە شاعۋ بويىنشا بيىل تاراز قالاسىنىڭ اۋماعىندا11، بايزاق اۋدانىندا 10، جامبىل، قورداي، مەركى، ت.رىسقۇلوۆ جانە شۋ اۋداندارىندا ەكى جاعدايدان، مويىنقۇم جانە سارىسۋ اۋداندارىندا ءبىر جاعدايدان انىقتالىپ وتىر. دەنساۋلىق ساقتاۋ باسقارماسى تاراتقان حابارلامادا ۋلى جاندىكتەن زارداپ شەككەندەردىڭ بارلىعى 14 كۇنمەديتسينالىق باقىلاۋدا بولۋى ءتيىس ەكەنى، بۇگىندە 17 ادامنىڭ اتالعان مەرزىمنىڭ وتۋىنە بايلانىستى باقىلاۋدان الىنعانى ايتىلعان. «اۋرۋدىڭ دەڭگەيىن تومەندەتۋ، ەپيدەميالىق احۋالدى كۇردەلەندىرمەۋ، دەرتتى دەر كەزىندە انىقتاپ، قاتەرلى جاعدايعا جىبەرمەي ۇستاپ تۇرۋ شارالارىن جۇرگىزۋ – تەك قانا مەديتسينا، ۆەتەريناريا قىزمەتكەرلەرىنىڭ نەمەسە جەرگىلىكتى اكىمشىلىكتەردىڭ جۇمىستارى عانا ەمەس، وعان وشاق ايماقتارىندا تۇراتىن ەلدى-مەكەندەردىڭ تۇرعىندارى دا اتسالىسۋعا ءتيىس»، دەلىنگەن حابارلامادا. سونداي-اق، ماماندار كەنە شاققان ۋاقىتتا ونى ادامنىڭ ءوزى الىپ تاستاۋىنا بولمايتىنىن، ءاربىر تۇرعىن تۇرعىلىقتى مەكەن-جايى بويىنشا مەديتسينالىق كومەككە جۇگىنۋى كەرەكتىگىن، ول جەردە كەنەدەن زارداپ شەككەن ادامعا گەمورراگيالىق قىزبانىڭ الدىن الۋ شارالارى جۇرگىزىلىپ، كومەك كورسەتۋمەن قاتار، نە ىستەۋ كەرەكتىگى ەسكەرتىلەتىنىن ايتۋدا. «بۇل اۋرۋدىڭ بەلگىلەرى كەنە شاققاننان كەيىن 2-7 كۇن ىشىندە بىلىنەدى. ناۋقاس ادامنىڭ دەنە ىستىعى كوتەرىلەدى. باسى، بۋىندارى قاتتى سىرقىراپ اۋىرادى. كوزى مەن تاماعى قىزارادى، تاماققا تابەتى بولمايدى»، دەيدى ماماندار. سونداي-اق، بۇدان باسقا دا قاۋىپتەرى بار. سونىمەن قاتار، مۇنىڭ جۇقپالى ەكەنىن دە ەستەن شىعارماعان ءجون.
كەنە شاققان ادامدار مىندەتتى تۇردە ەكى اپتا بويى ەمدەۋ مەكەمەسىندە ديسپانسەرلىك باقىلاۋدا بولۋى كەرەك ەكەن. اتالعان تالاپتاردىڭ بارلىعى دەرتتىڭ قاۋىپتىلىگىن تومەندەتەدى.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار