اقتوبە وبلىسى «سارى» ايماققا قايتا ورالدى. بۇگىن وبلىستىق باس سانيتاريالىق دارىگەرىنىڭ جاڭا قاۋلىسى شىقتى. قاۋلىعا سايكەس ءالى دە ءبىلىم بەرۋ مەكەمەلەرىندەگى اسحانا جۇمىسىنا تىيىم سالىنعان.
سونداي-اق ۇجىمدىق اۋىزاشار وتكىزۋگە بولمايدى. «ASHYQ» جوباسى ەنگىزىلگەن بولسا بوۋلينگ, كومپيۋتەرلىك كلۋبتار, ونىڭ ىشىندە PlayStation كلۋبتارى, بيليارد, كاراوكە ءوز كليەنتتەرىن قابىلداي الادى. ال بالالاردىڭ ويىن-ساۋىق ورتالىقتارى, تۇنگى جانە ويىن كلۋبتارى, كاليان, بۋكمەكەر كەڭسەلەر مەن لوتو-كلۋبتاردىڭ اشىلۋىنا ءالى دە رۇقسات جوق. ادامدار كوپ جينالاتىن كونفەرەنتسيالار, فورۋمدار, ويىن-ساۋىق, سونداي-اق وتباسىلىق, سالتاناتتى, ەستەلىك جانە باسقا دا ءىس-شارالاردى وتكىزۋگە بولمايدى.
«كونتينگەنتى 300 وقۋشىعا شاقتالعان قالالىق جانە اۋىلدىق مەكتەپتەر جۇمىسىن باستايدى. مۇندا ءار سىنىپتاعى بالا سانى 25-تەن اسپاۋى ءتيىس. سونىمەن بىرگە جالپى ءبىلىم بەرەتىن مەكتەپتەردە بارلىق سىنىپ وقۋشىلارى ارالاس فورماتتا ءبىلىم الادى. مۇندا دا بالا سانى 25-تەن اسپاۋى ءتيىس. پاندەردىڭ 70 پايىزىن مەكتەپتە وقيدى. ءبىلىم بەرۋ مەكەمەسى اكىمشىلىگىنىڭ شەشىمى بويىنشا ساباقتان تىس ۋاقىتتا بالا سانىن 15-تەن اسىرماي جەكە وقىتۋ ۇيىمداستىرۋعا رۇقسات. ارنايى, مامانداندىرىلعان ۇيىمدار, ەرەكشە ءبىلىم بەرۋ قاجەتتىلىكتەرى بار بالالارعا ارنالعان ارنايى مەكتەپ-ينتەرناتتار, جالپى تيپتەگى مەكتەپ-ينتەرناتتار جانە دارىندى بالالارعا ارنالعان مەكتەپ-ينتەرناتتار, ورتا جانە جوعارى وقۋ ورىندارىنىڭ I كۋرس ستۋدەنتتەرى ءۇشىن شتاتتىق وقىتۋعا رۇقسات بەرىلەدى», دەپ حابارلادى اقتوبە وبلىستىق سانيتاريالىق-ەپيدەميولوگيالىق باقىلاۋ دەپارتامەنتى.
