پارلامەنت • 06 مامىر، 2021

وڭىرلەردە كەزدەسۋلەر وتكىزدى

20 رەت كورسەتىلدى

سەنات دەپۋتاتتارى جۇمىس ساپارىمەن ايماقتاردا ءجۇر. ولار ەڭبەك ۇجىمدارىمەن، جەرگىلىكتى تۇرعىندارمەن كەزدەسىپ، وڭىرلەردەگى شەشىمىن كۇتكەن ماسەلەلەردى تالقىلاۋدا.

سەنات دەپۋتاتى رىسقالي ابدىكەروۆ قاراعاندى وبلىسى ۇلىتاۋ اۋداندىق پوليتسيا ءبولىمى قىزمەتكەرلەرىمەن كەزدەسۋ بارىسىندا مال ۇرلىعىن الدىن الۋ، ەسىرتكىگە قارسى كۇرەس، زورلىق-زومبىلىقتى بولدىرماۋ قاجەتتىگىن اتاپ ءوتتى. سونىمەن قاتار كەزدەسۋدە مەدياتسيا ارقىلى سوتقا جەتكىزبەي تاتۋلاستىرۋ، سوت جۇيەسىن قالىپتاستىرۋ، پوليتسيا قىزمەتكەرلەرىن تۇرعىن ۇيمەن قامتاسىز ەتۋ قاجەت ەكەندىگى ايتىلدى. سەناتور سونىمەن قاتار « ۇلىتاۋ» قورىق-مۇراجايىن ارالادى جانە بيىلعى جىلى پايدالانۋعا بەرىلەتىن تۋريستىك ساپار ورتالىعىنىڭ جۇمىسىمەن تانىستى. سەناتور اۋداندا تاريحي تۋريزم، ەكوتۋريزم، اگروتۋريزم جانە كيەلى مەكەندەردى ارالاۋ باعىتتارىن دامىتۋ، تۋريستەر ءۇشىن قىزمەت كورسەتۋ ساپاسىن  ارتتىرۋعا اسا كونىل ءبولۋ قاجەتتىگىن اتاپ ءوتتى. ر.ابدىكەروۆ ۇلىتاۋ اۋدان اكىمدىگىندە اۋدان تۇرعىندارىمەن، جۇرتشىلىقپەن جانە اكتيۆ مۇشەلەرىمەن كەزدەستى. جۇزدەسۋدە اۋىل تۇرعىندارى كوكەيدە جۇرگەن ماسەلەلەرىن ورتاعا سالدى. اسىرەسە، اۋىزسۋ مەن ەلەكتر ەنەرگياسى، ۇلىتاۋ-جەزقازعان باعىتىنداعى جول قاتىناسى جانە سول باعىتتا جۇرەتىن جولاۋشىلار كولىگىنىڭ نەگىزگى ماسەلەلەرى تالقىلاندى. سەنات دەپۋتاتى جەزدى كەنتىندە سالىنىپ جاتقان سپورت كەشەنىنىڭ قۇرىلىسىن ارالاپ كوردى.

 * * *

سەناتور قايرات قوجامجاروۆ قازاقستان قارۋلى كۇشتەرى اەروموبيلدى اسكەرىنىڭ №68665 اسكەري بولىمىندە بولىپ، كازارمالىق-تۇرعىن ءۇي قورى، اسكەري قىزمەتشىلەردى تاماقتاندىرۋدى ۇيىمداستىرۋ، قارۋ-جاراق پەن اسكەري تەحنيكا ۇلگىلەرى، سونداي-اق اسكەري ءبولىمدى ماتەريالدىق-تەحنيكالىق جابدىقتاۋ بارىسىمەن تانىستى. قورعانىس ءمينيسترىنىڭ ورىنباسارى رۋسلان شپەكباەۆ قاتىسقان جۇمىس كەڭەسىندە قارۋلى كۇشتەردىڭ 2021-2023 جىلدارداعى قاجەتتىلىكتەرىن جەتكىلىكتى قارجىلاندىرۋ، اسكەري قىزمەتشىلەردى الەۋمەتتىك قولداۋ جانە پاندەميا كەزىندەگى اسكەري قىزمەتتى اتقارۋدىڭ ەرەكشەلىكتەرى تالقىلاندى. وتىرىسقا قاتىسۋشىلار سونىمەن قاتار ارميانىڭ جاۋىنگەرلىك ازىرلىگى مەن جاۋىنگەرلىك قابىلەتىن ودان ءارى نىعايتۋعا، اسكەري قىزمەتشىلەر مەن  ولاردىڭ وتباسىنىڭ تۇرعىن ءۇي-تۇرمىستىق جاعدايلارىن جاقسارتۋعا باعىتتالعان بىرقاتار زاڭنامالىق باستامالاردى تالقىعا سالدى. اتاپ ايتقاندا، اسكەري پوليتسيا، اسكەري قىزمەت ماسەلەلەرى، ارناۋلى مەملەكەتتىك ورگانداردىڭ قىزمەتكەرلەرى مەن اسكەري قىزمەتشىلەردىڭ تۇرعىن ءۇي قاتىناستارىنا قاتىستى زاڭ جوبالارى قارالدى.

 * * *

سەنات دەپۋتاتتارى نۇرتورە ءجۇسىپ، ءلاززات سۇلەيمەن، دينار نوكەتاەۆا، سۇلتانبەك ماكەجانوۆ «قازاق گازەتتەرى» جشس ۇجىمىمەن كەزدەستى. سەرىكتەستىككە قاراس­تى باسىلىمداردىڭ باس رەداكتورلارىمەن وتكەن كەزدەسۋدە ءباس­پاسوزدىڭ بۇگىنگى ماسەلەلەرىمەن تانىستى. سەنات قابىرعاسىندا قابىلدانعان زاڭدار مەن پارلامەنتتىك تىڭداۋلار تۋرالى جۋرناليستەرگە ايتىپ بەردى. ۇلتتىق قۇندىلىقتار ماسەلەسىنىڭ دە باستى نازاردا ەكەنىن جەتكىزدى.

سەناتورلار ۇلتتىق باسپاسوزدە كوتەرىلىپ جاتقان ماسەلەنىڭ بارلىعىنا بىردەي مۇمكىندىگىنشە نازار اۋدارىلاتىنىنا سەندىردى. ۇلتتىق تاربيە، جەر ماسەلەسى، ۇلتتىق بىرەگەيلىك پەن جاھاندانۋ جاعدايىندا ءتىل، ءدىل تازالىعىن ساقتاپ قالۋ، اسىرەسە بالالار باسىلىمىنىڭ جاي-كۇيى، جالپى باسپاسوزگە جازىلۋ، باسىلىمداردى تاراتۋ ىسىندە كەزدەسىپ وتىراتىن كەدەرگىلەر تۋرالى گازەت-جۋرنالداردىڭ باس رەداكتورلارى مەن سەناتورلار دوڭگەلەك ۇستەل سيپاتىنداعى وتىرىستا جان-جاقتى تالقىلادى.

 * * *

سەناتور ولگا بۋلاۆكينا شىعىس قازاقستان وبلىسى بورودۋليحا اۋدانىندا بولدى. سەناتور ساپارى بورودۋليحا اۋىلىنداعى دەنە شىنىقتىرۋ-ساۋىقتىرۋ كەشەنىن كورۋدەن باستالدى. دەپۋتات قۇرىلىس بارىسىمەن تانىسا كەلىپ، ەلىمىزدەگى بۇقارالىق جانە بالالار سپورتىن دامىتۋعا جوعارى دەڭگەيدە ەرەكشە نازار اۋدارىلىپ وتىرعانىن اتاپ ءوتتى. سەناتور مۇنداي نىسانداردىڭ قۇرىلىسى بۇقارالىق سپورتتى دامىتۋعا سەرپىن بەرەتىنىن، دەمەك، سالاۋاتتى ءومىر سالتىن ۇستانۋشىلار سانى ارتا تۇسەتىنىن جەتكىزدى.

سەناتوردىڭ دارىگەرلەرمەن جانە ورتالىق اۋداندىق اۋرۋحانانىڭ باسشىلارىمەن كەزدەسۋىندە اۋداننىڭ دەنساۋلىق ساقتاۋ جۇيەسىنىڭ جاعدايى تۋرالى ايتىلدى. قازىر ينفەكتسيالىق ستاتسيوناردا 22، جانساقتاۋ بولىمىندە 4 ورىن بولسا، 50 توسەكتىك ورىن رەزەرۆتە جابدىقتالىپ تۇر.

ولگا بۋلاۆكينا اۋداننىڭ شارۋا قوجالىقتارىنىڭ باسشىلارىمەن كەزدەسۋ بارىسىندا فەرمەرلەردى ءىرى قارا مال باسىن كوبەيتۋگە جانە اسىل تۇقىمدى بازانى جاقسارتۋعا ارنالعان بورداقىلاۋ الاڭدارىن جاساۋدا بەلسەندى بولۋعا شاقىردى.

 * * *

سەناتور سەرگەي ەرشوۆ قاراعاندى وبلىسى جۇمىس ساپارى بارىسىندا «استانا» وڭىرلىك قولباسشىلىعى باسشىلىعىمەن جانە №31775 اسكەري ءبولىمنىڭ اسكەري قىزمەتشىلەرىمەن كەزدەستى. قاراعاندى قالاسىندا ورنالاسقان مەحانيكالاندىرىلعان بريگادادا بولعان كەزدە دەپۋتات وفيتسەرلەرمەن جانە سەرجانتتارمەن بىرگە اسكەري بولىمدەگى اسكەري قىزمەتشىلەردىڭ تۇرعىن ءۇي جاعدايلارىن جاقسارتۋ جانە  ولاردىڭ ەڭبەك قاتىناستارىنا بايلانىستى وزەكتى ماسەلەلەردى تالقىعا سالدى. سەرگەي ەرشوۆ سونىمەن قاتار №36352 «سپاسسك» اسكەري بولىمىندەگى وقۋ ورتالىعىنىڭ اسكەري قىزمەتشىلەرىمەن كەزدەستى. اسكەري قىزمەتشىلەر كەزدەسۋ بارىسىندا زەينەتكەرلىككە شىققاننان كەيىن يپوتەكا تولەۋگە اقشاسىنىڭ جەتىسپەۋى نەمەسە دەنساۋلىعىنا بايلانىستى شۇعىل كوميسسيالانعاندا سوزىلمالى ناۋقاسى بار بالالارى بار اسكەري وتباسىلاردىڭ قوسىمشا تۇرعىن ءۇي الۋ قۇقىعىنىڭ بولماۋى، راپورت جازعان كەزدەن باستاپ ەمەس، اسكەري قىزمەتتى باستاعان ساتتەن باستاپ تۇرعىن ۇيگە كەزەككە قويۋ، يپوتەكا العاندا بانكتىك پايىزدىق مولشەرلەمەلەردى تومەندەتۋ قاجەتتىگى جانە باسقا ماسەلەلەر تۋرالى ايتىلدى.

قاراعاندى وبلىسىنا ساپارى بارىسىندا دەپۋتات قازىرگى ۋاقىتتا قازاقستان حالقىن ۆاكتسيناتسيالاۋدا كەڭىنەن پايدالانىلاتىن سپۋتنيك V ۆاكتسيناسى شىعارىلاتىن قاراعاندى فارماتسەۆتيكا كەشەنىنىڭ قىزمەتكەرلەرىمەن دە كەزدەستى.

 

 

 

سوڭعى جاڭالىقتار

اسىل اعانىڭ شاراپاتى

رۋحانيات • كەشە

قۇيماقۇلاق

رۋحانيات • 26 قازان، 2021

قوعامنىڭ بىتەۋ جاراسى

قوعام • 26 قازان، 2021

گاز باعاسى نەگە قىمبات؟

ايماقتار • 26 قازان، 2021

فرانتسيا تىزگىنى ءۇشىن تايتالاس

ساياسات • 26 قازان، 2021

ەربوسىن ۇلىن اۋىر سىناق كۇتىپ تۇر

كاسىپقوي بوكس • 26 قازان، 2021

ۇقساس جاڭالىقتار