ارۋجان ساين قاسىم-جومارت توقاەۆقا بالالار اراسىنداعى مۇگەدەكتىك دەڭگەيىن تومەندەتۋگە باعىتتالعان مۇمكىندىگى شەكتەۋلى بالالاردىڭ تۇرمىس ساپاسىن ارتتىرۋ جونىندەگى جول كارتاسىنىڭ ورىندالۋى جايىندا مالىمەت بەردى. ونىڭ ايتۋىنشا, تالما, ورفاندىق جانە باسقا دا اۋرۋلارعا شالدىققان بالالاردى ءدارى-دارمەكپەن قامتاماسىز ەتۋگە بايلانىستى بىرقاتار شەشىلمەگەن پروبلەمالار بار.
بالالار ومبۋدسمەنى 2020 جىلعى 30 جەلتوقساندا پرەزيدەنت قول قويعان زاڭنىڭ كۇشىنە ەنۋىنە بايلانىستى قالىپتاسقان احۋال جايىندا ايتتى. اتالعان زاڭ مەملەكەتتىك شىعارماشىلىق جانە سپورتتىق تاپسىرىستار تۋرالى تۇسىنىكتى زاڭنامالىق تۇرعىدان بەكىتىپ, شىعارماشىلىق ۇيىرمەلەر مەن سپورت سەكتسيالارىنا قاتىساتىن بالالاردى بارىنشا قامتۋ ءۇشىن جان باسىنا شاققانداعى قارجىلاندىرۋدى كوزدەيدى. بۇل رەتتە ارۋجان ساين مەملەكەتتىك تاپسىرىستى ورىنداۋ ءۇشىن اكىمدىكتەر بولگەن بيۋدجەت قارجىسىنىڭ از ەكەنىنە الاڭداۋشىلىق ءبىلدىردى.
بالا قۇقىقتارى جونىندەگى ۋاكىل پرەزيدەنتكە دەنساۋلىق ساقتاۋ, الەۋمەتتىك قورعاۋ جانە ءبىلىم بەرۋ جۇيەلەرىندەگى مەكەمەلەردە, ونىڭ ىشىندە, ينتەرناتتا, بالالار ۇيىندە جانە مامانداندىرىلعان ينتەرناتتاردا ءبىلىم الاتىن بالالاردىڭ قۇقىقتارىن قورعاۋعا باعىتتالعان بىرقاتار ۇسىنىس ايتتى. سونداي-اق بالالار قۇقىعىن قورعاۋعا بايلانىستى زاڭ بۇزۋشىلىقتار انىقتالعانىن اتاپ ءوتتى.
سونىمەن قاتار ۋاكىل ينستيتۋتىن «ومبۋدسمەن تۋرالى» زاڭ قابىلداۋ جانە مەملەكەتتەگى قۇقىق قورعاۋ تەتىكتەرىنىڭ تيىمدىلىگىن ارتتىرۋ تۇرعىسىنان قولداۋ ماسەلەسى تالقىلاندى.
قاسىم-جومارت توقاەۆ بالالاردىڭ قۇقىقتارىن قورعاۋدىڭ اسا ماڭىزدى ەكەنىن ايتا كەلە, كوتەرىلگەن ماسەلە بويىنشا بىرقاتار تاپسىرما بەرىپ, مۇنى ارقاشان ءجىتى باقىلاۋىندا ۇستايتىنىن ايتتى. پرەزيدەنت بارلىق بالانىڭ قۇقىعىن قامتاماسىز ەتۋ جونىندەگى مەملەكەت مىندەتتەمەلەرىنىڭ ءسوزسىز ورىندالۋى, بالالاردىڭ مۇقتاجدىعى ءۇشىن بولىنگەن بيۋدجەت قارجىسى ولاردىڭ ناقتى قاجەتتىلىگىنە جۇمسالۋى ءتيىس ەكەنىن جەتكىزدى. مەملەكەت باسشىسى بالالاردىڭ قۇقىعىنا قاتىستى زاڭ بۇزۋشىلىقتارعا الىپ كەلەتىن كەز كەلگەن قياناتتى ءىس-ارەكەتتەردىڭ جولى كەسىلىپ, كىنالىلەر جازالانۋى كەرەك دەپ سانايدى.
