پارلامەنت جەردى شەتەلدىكتەرگە ساتپاۋدى كوزدەيتىن زاڭ جوباسىن قابىلدادى.
«اگرارلىق ماسەلەلەر كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قر زاڭ جوباسىنا قر پارلامەنتى سەناتى ەنگىزگەن وزگەرىس پەن تولىقتىرۋدى قاراپ شىقتى. سەنات ۇسىنعان وزگەرىستەر مەن تولىقتىرۋلار شەتەلدىك جەر پايدالانۋشىلاردىڭ جانە شەتەلدىك قاتىسۋى بار زاڭدى تۇلعالاردىڭ, سونداي-اق اۋىل شارۋاشىلىعى ماقساتىنداعى جەر ۋچاسكەلەرىن جەكە مەنشىك جانە جەر پايدالانۋ قۇقىعىمەن كانداستاردىڭ يەلەنۋىنە تىيىم سالۋدى ەنگىزۋدى كوزدەيتىن زاڭ جوباسىنىڭ ءماجىلىس ماقۇلداعان تۇجىرىمداماسىن بۇزبايدى جانە ونىڭ مازمۇنىن ناشارلاتپايدى. باياندالعاندى ەسكەرە وتىرىپ, اگرارلىق ماسەلەلەر كوميتەتى اتالعان زاڭ جوباسىنا قر پارلامەنتى سەناتى ەنگىزگەن وزگەرىسپەن جانە تولىقتىرۋمەن كەلىسۋدى ۇسىنادى», دەدى اگرارلىق ماسەلەلەر كوميتەتىنىڭ حاتشىسى بەرىك وسپانوۆ ءماجىلىستىڭ جالپى وتىرىسىندا.
29 ءساۋىر كۇنى سەنات «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ماجىلىسكە قايتارعان ەدى.
ۇسىنىلعان زاڭ جوباسىندا اۋىل شارۋاشىلىعى جەرلەرىن شەتەلدىكتەرگە جانە شەتەلدىك كومپانيالارعا, شەتەلدىك ۇلەسى بار قازاقستاندىق كومپانيالارعا, ازاماتتىعى جوق ادامدارعا, حالىقارالىق قاتىسۋ ۇلەسى بار عىلىمي ورتالىقتارعا, سونداي-اق قانداستارعا بەرۋگە تولىقتاي تىيىم سالۋ كوزدەلگەن.
ودان بولەك, زاڭ جوباسىندا بۇدان بۇرىن شەتەلدىكتەر جانە شەتەلدىك ۇلەسى بار قازاقستاندىق كومپانيالار جالعا العان اۋىل شارۋاشىلىعى جەرلەرىن پايدالانۋ مەرزىمى ۇزارتىلمايتىنى جانە ولار پايدالانۋ مەرزىمى اياقتالعانعا دەيىن عانا يەلىكتە بولاتىنى كوزدەلگەن.
