يتاليادا العاشقى ۆاكتسينالاۋ مەن رەۆاكتسينالاۋ اراسىنداعى ءۇزىلىستى ارتتىرۋ تۋرالى نورما بەكىتىلدى. ەندى دوزالار اراسىنداعى مەرزىم 21 جانە 28 ەمەس, 42 كۇندى قۇرايدى. بۇل Pfizer جانە Moderna ۆاكتسينالارىنا قاتىستى بەلگىلەنگەن. ەل بيلىگىنىڭ ايتۋىنشا, كومپونەنتتەردى ەنگىزۋ اراسىنداعى ۋاقىتتى ەكى ەسە ۇزارتۋ ءبىرىنشى كەزەڭدە ەكپەمەن ءبىراز ادامدى قامتۋعا مۇمكىندىك بەرەدى. اپەننين تۇبەگىندە ۆاكتسينانى جەتكىزۋ بويىنشا ماسەلەلەر ءالى دە بار.
يتاليادا اعىمداعى جىلدىڭ قاڭتارىندا ءبىرىنشى كەزەكتە دارىگەرلەر, قارتتار مەن قارتتار ءۇيىنىڭ قىزمەتكەرلەرى ۆاكتسينا قابىلداي باستادى. جاپپاي ەكپە سالۋ تەگىن جانە ەرىكتى تۇردە جۇرگىزىلۋدە, دەسە دە ەل بيلىگى وتانداستارىنا ۆاكتسيناتسيا جاساۋعا كەڭەس بەرەدى. سەبەبى ەگۋ ناۋقانى جوسپارلاعاننان باياۋ جۇرۋدە. نەگىزگى سەبەپتەردىڭ ءبىرى — ۆاكتسينالاردى جەتكىزۋدەگى ىركىلىستەر.
2021 جىلدىڭ سوڭىنا دەيىن يتاليا حالقىنىڭ 90%-ىن ەگۋ جوسپارلانعان. ءساۋىر ايىنىڭ ورتاسىنداعى مالىمەتتەرگە سايكەس, يتاليادا «كوروناۆيرۋستىق پنەۆمونيا» دياگنوزى راستالعان 110 مىڭنان استام ادام كوز جۇمدى.
ەل عالىمدارى مەن ساياساتكەرلەرىنىڭ باستاماسىمەن رەسەيلىك «سپۋتنيك V» ۆاكتسيناسىن ساتىپ الۋ ماسەلەسى تالقىلانۋدا, سونداي-اق ونى يتاليادا ءوندىرۋ كوزدەلۋدە.
يسپانيا ەلى دە AstraZeneca ۆاكتسيناسىنىڭ دوزالارى اراسىنداعى ارالىقتى ەداۋىر ارتتىردى. 60 جاسقا دەيىنگى ادامدار ءۇشىن ءتورت جانە 12 اپتادان 16 اپتاعا دەيىن ۇزارتتى دەپ حابارلايدى Reuters.
يسپانيا ەۋرووداق مەملەكەتتەرى اراسىندا 2 كومپونەنتتى ەنگىزۋ اراسىنداعى ۋاقىتتى 12 اپتادان اسا ۋاقىتقا سوزعان ءبىرىنشى ەل.
دەنساۋلىق ساقتاۋ مينيسترلىگى رۇقساتتىڭ ارەكەت ەتۋ مەرزىمىن ۇزارتۋ ۆاكتسينانى قولدانۋدىڭ ەڭ قاۋىپسىز ءادىسىن انىقتاۋعا مۇمكىندىك بەرەتىندىگىن مالىمدەدى. باستاپقىدا AstraZeneca پرەپاراتى 18-65 جاس ارالىعىنداعى جۇمىسشىلارعا سالىندى, جاس ادامداردا قان ۇيىپ قالۋ قاۋپىنىڭ تۋىنداۋىنا بايلانىستى ۆاكتسينا تەك 60 جاستان اسقان ادامدارعا سالۋعا رۇقسات ەتىلدى. بيلىكتىڭ مۇنداي قادامى ءبىرىنشى دوزانى العان كەي جاستاردىڭ ەكىنشى دوزانى الۋ مۇمكىندىگىن جوعالتۋىنا اكەلدى.
