سوناۋ 1909 جىلدان بەرى ۇيىمداستىرىلىپ كەلە جاتقان ءدۇبىرلى دودا بيىل 104-مارتە وتكىزىلەدى. يتاليا تاس جولدارىنداعى ءداستۇرلى جارىستا قازاقستاندىق كوماندا جىل سايىنعى باسەكەدە ءتاۋىر ونەر كورسەتىپ ءجۇر. ءتىپتى «استانانىڭ» ەكى ۆەلوشاباندوزى ءۇش رەت جارىس جەڭىمپازى اتانعان. اتاپ ايتساق, 2008 جىلى يسپانيالىق البەرتو كونتادور ءبىر رەت جانە 2013, 2016 جىلدارى يتاليالىق ۆينچەنتسو نيبالي ەكى مارتە وسى جارىستىڭ باس جۇلدەسىن ولجالاپ, «استانانىڭ» ابىرويىن اسقاقتاتقان ەدى. سونىمەن قاتار جەكەلەگەن كەزەڭدەردە باسقا دا ۆەلوشاباندوزدارىمىز تۇعىردىڭ بيىك ساتىسىنان كورىندى.
Astana-Premier Tech ۆەلوكلۋبىن اپەننين تۇبەگىنە بيىلعى «پاريج – نيتستسا» جارىسىندا ەكىنشى جانە ء«الپى تۋرىندا» ءۇشىنشى ورىن العان رەسەيلىك الەكساندر ۆلاسوۆ باستاپ بارادى. سونىمەن قاتار «دجيرو د’يتالياعا» يسپانيا چەمپيونى لۋيس لەون سانچەس پەن گوركا يساگيررە, يتاليالىق ۆەلوشاباندوز سامۋەلە باتتيستەللا, فابيو فەللينە, ماتتەو سوبرەرو, كولۋمبيالىق حارولد تەحادا جانە قازاقستاندىق سپورتشى ۆاديم پرونسكي قاتىسادى.
«الەكساندر ۆلاسوۆ – ءبىزدىڭ «دجيرو د’يتاليا» جارىسىنداعى كوشباسشىمىز جانە ول وسى دودانىڭ جالپى ەسەبىندە جوعارى ورىنعا يە بولۋ ءۇشىن بارىن سالادى. وعان كوماندا وكىلدەرى بارىنشا قولداۋ كورسەتەدى دەپ سەنەمىز. ءبىز ء«الپى تۋرىندا» ۆلاسوۆتىڭ بابى جاقسارىپ كەلە جاتقانىن بايقادىق. سوندىقتان ول «دجيرو» فاۆوريتتەرىنىڭ ءبىرى بولا الاتىنىنا سەنىمدىمىن. ۆلاسوۆ يتاليادا توپ جارۋ ءۇشىن قولىنان كەلگەننىڭ ءبارىن جاسايدى. سونىمەن قاتار ءبىزدىڭ قۇرامدا بەلگىلى ءبىر كەزەڭدەردە سىنعا تۇسەتىن مىقتى جانە تاجىريبەلى شاباندوزدار دا بار. مەن, ەڭ الدىمەن, لۋيس لەون سانچەس پەن گوركا يساگيررانى ايتقىم كەلەدى. بۇل ەكى يسپانيالىق ۆەلوشاباندوز گراند-تۋرلاردا قالاي جەڭىسكە جەتۋ كەرەكتىگىن جاقسى بىلەدى. ەكەۋى دە قازىر ناعىز بابىندا جانە كوماندانى العا جەتەلەۋگە تولىق دايىن. دەي تۇرعانمەن, وسى دوداعا قاتىسىپ جاتقان ءبىزدىڭ كەز كەلگەن سپورتشىمىز بارلىق كەزەڭدە جەڭىسكە جەتۋ ءۇشىن كۇرەسە الاتىنىن بىلەمىن. فابيو فەللينە مەن سامۋەلە باتيستەللا شاعىن پەلوتوننان سپرينتتىك جارىسقا قاتىسا الادى. ماتتەو سوبرەرو ۋاقىتقا ارنالعان جەكەلەگەن جارىستاردا ءوزىنىڭ قانداي دارەجەدە ەكەنىن كورسەتتى. سوندىقتان ءبىزدىڭ سپورتشىلار تۋريننەن جارىستى ءساتتى باستايدى دەپ ويلايمىن», دەدى Astana-Premier Tech كوماندانىڭ سپورت ديرەكتورى دجۋزەپپە مارتينەللي.
ايتا كەتەيىك, بيىلعى «دجيرو د’يتاليا» ۆەلوكوپكۇندىگىنە 23 كوماندانىڭ 148 ۆەلوشاباندوزى قاتىسادى دەپ جوسپارلانۋدا. ال 21 تۋرعا سوزىلاتىن جارىستا سپورتشىلار تۋرين مەن ميلانعا دەيىن 3479,9 شاقىرىم جولدى ءجۇرىپ وتەدى.
