«قايرات» – «بارسەلونا» ماتچى الدىنداعى ستاتيستيكا بويىنشا, الماتىلىق ۇجىمنىڭ مەرەيى ۇستەم بولىپ تۇر ەدى. ويتكەنى ەكى كلۋب اراسىنداعى كەيىنگى ءۇش ويىننىڭ ۇشەۋىندە دە قازاقستان چەمپيوندارى قارسىلاستارىنان باسىم تۇسكەن بولاتىن. بىراق ويىنشىلاردىڭ كۇشى بويىنشا «بارسەلونا» جارتىلاي فينالعا تاس-ءتۇيىن دايىن كەلدى. «قايرات» كلۋبى «بەنفيكامەن» وتكەن ويىنعا دەيىن-اق كوماندانىڭ ەڭ ماڭىزدى دەگەن ەكى ويىنشىسىنا سەنىم ارتا المايتىنى بەلگىلى بولعان-دى. ماسەلەن, رۋمىنيالىق قورعاۋشى ساۆيو ۆالادارەس جاراقاتىنا, ال ەكىنشى قاقپاشى دۋدۋ كوروناۆيرۋس جۇقتىرىپ الۋىنا بايلانىستى الماتىلىق كومانداعا ەكى ويىندا دا كومەكتەسە المادى. سونداي-اق شيرەك فينال كەزدەسۋىندە قىزىل قاعاز الىپ, الاڭنان قۋىلعان كلۋبتىڭ نەگىزگى قاقپاشىسى ءارى كاپيتانى يگيتا «قايراتتى» جارتىلاي فينال الدىندا ودان ءارى تىعىرىققا تىرەپ كەتتى. ونىڭ ورنىن 19 جاستاعى جاس قاقپاشى نارۋن سەرىكوۆ جوقتاتپاۋعا تىرىسقانىمەن, ۇلكەن جارىستارعا العاش رەت قاتىسىپ تۇرعان سەرىكوۆكە ءبارىبىر تاجىريبەنىڭ جەتىسپەگەنى انىق بايقالىپ تۇردى.
ءسويتىپ ماتچ قارساڭىندا پسيحولوگيالىق باسىمدىققا يە بولىپ قانا قويماي, مۇنىڭ الدىنداعى ءۇش جەڭىلىستىڭ ەسەسىن قايتارۋ ءۇشىن ۇرىمتال ءسات ەكەنىن سەزىنگەن «بارسەلونا» «قايراتتى» جەڭۋ ءۇشىن بارىن سالدى. كەزدەسۋ ءبىز كۇتكەندەي كاتالونيالىقتاردىڭ شابۋىلىمەن باستالدى. ويىننىڭ كوپ ۋاقىتى «قايرات» قاقپاسىنىڭ ماڭىندا وتكەنىمەن, جەرلەستەرمىز قورعانىستا وتە ساۋاتتى ويىن كورسەتتى. دەگەنمەن تىنىمسىز شابۋىلىنىڭ ناتيجەسىندە «بارسەلونا» ويىنشىلارى ماتچتىڭ 15-مينۋتىندا ءبارىبىر ءوز دەگەندەرىنە جەتتى. قورعاۋشىلاردان وڭاي سىتىلىپ شىققان «بارسەلونا» شابۋىلشىسى فەرراو ەسەپتى اشسا, اراعا بەس مينۋت سالىپ فەرراونىڭ ءوزى تابلوداعى كورسەتكىشتى 2:0-گە جەتكىزدى.
ويىننىڭ ەكىنشى تايمىندا «قايرات» ساپىنان ديەگو فاۆەرو ەسەپ ايىرماسىن قىسقارتقانىمەن, فەرراو تاعى دا ءبىزدىڭ قاقپادان ساڭلاۋ تاۋىپ, حەت-تريك اۆتورى اتاندى. ماتچ اياقتالۋىنا ساناۋلى مينۋتتار قالعاندا الماتىلىقتاردىڭ شابۋىلشىسى فەرناندينو ەسەپ ايىرماسىن 3:2-گە قىسقارتقانىمەن, تارازى باسىن تەڭەستىرۋگە مۇمكىندىكتەرى جەتپەدى. وسىلايشا ءبىر دوپ ايىرماسىمەن جەڭىسكە جەتكەن «بارسەلونا» ءوز تاريحىندا «قايرات» كلۋبىنان تۇڭعىش رەت باسىم ءتۇسىپ, چەمپيوندار ليگاسىنىڭ فينالىنا جولداما الدى. ال الماتىلىق ۇجىم بيىلعى باسەكەنى جارتىلاي فينالدا اياقتاۋعا ءماجبۇر بولدى.
ەندى يسپانيانىڭ «بارسەلونا» كلۋبى فينالدا قازاقستان قۇراماسىنىڭ ويىنشىسى تاينان ونەر كورسەتەتىن «سپورتينگ» كومانداسىمەن كەزدەسەدى. پورتۋگاليا كلۋبى جارتىلاي فينالدا يسپانيانىڭ «ينتەر» كلۋبىنان 5:2 ەسەبىمەن باسىم تۇسكەن بولاتىن. سول ويىندا تاينان دا گول سوعىپ, كومانداسىنىڭ جەڭىسكە جەتۋىنە سۇبەلى ۇلەس قوستى.
