شقو پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, ءتارتىپ ساقشىلارى شاھار تۇرعىنىنان ءىرى كولەمدە اقشا تالاپ ەتىپ, بوپسالاۋمەن اينالىسقان قىلمىستىق توپ مۇشەلەرىن قولعا ءتۇسىردى. «20-25 جاس ارالىعىنداعى ءبىر توپ ادام جابىرلەنۋشىنىڭ اۆتوكولىگىن تارتىپ الىپ, ونى قايتارۋ ءۇشىن قوماقتى قاراجات سۇراعان. اتالعان فاكتى بويىنشا جىلدام ارەكەت ەتكەن پوليتسيا قىزمەتكەرلەرى كۇدىكتىلەردى اقشا الۋ بارىسىندا ۇستادى. ولاردان جابىرلەنۋشىنىڭ تراۆماتيكالىق قارۋى مەن اۆتوكولىگى تاركىلەندى», دەدى شقو پد باستىعى ساعات ماديەۆ.
ۇستالعان ەر ادامدار ساقشىلارعا باعىنباي, ۇيلەردىڭ اۋلالارىندا جاسىرىنۋعا تىرىسقان. ولاردىڭ ءبىرى تاپانشامەن قارۋلانعان ەكەن. كۇدىكتىلەرگە قاتىستى قر قك-ءنىڭ 194-بابى بويىنشا سوتقا دەيىنگى تەرگەۋ امالدارى جۇرگىزىلۋدە.
