سالتاناتتى اشىلۋ راسىمىنە سانيتارلىق تالاپتار ساقتالا وتىرىپ, شەكتەۋلى ادام قاتىستى. مەرەكەلىك جيىننىڭ شىمىلدىعىن اشقان وبلىس اكىمى سەرىكباي تۇرۇموۆ تۇرعىنداردى مەرەكەمەن قۇتتىقتاپ, سپورت كەشەنىنىڭ جۇمىسىنا ساتتىلىك تىلەدى. «بۇگىنگى كۇن – ءاربىر قازاقستاندىق ءۇشىن تۋعان جەرگە دەگەن سۇيىسپەنشىلىك پەن ادالدىق, ازاماتتىق بورىش پەن جالپىۇلتتىق كەلىسىمنىڭ مەرەكەسى. وسى ءبىر ايتۋلى كۇنى اقشۇقىر اۋىلىندا سوڭعى ۇلگىدەگى جاڭا سپورت كەشەنى بوي كوتەرىپ وتىر. مەملەكەت باسشىسى قاسىم-جومارت توقاەۆ «بارلىق جاستاعى ەل ازاماتتارى اراسىندا بۇقارالىق سپورتتى دامىتۋ ماڭىزدى. دەنە شىنىقتىرۋدى وركەندەتۋ ءىسى جاڭا چەمپيوندار شىڭىنا شىعاتىن پيراميداعا اينالۋى ءتيىس», دەگەن بولاتىن. بۇل باعىتتا ماڭعىستاۋ وبلىسى اۋماعىندا اتقارىلىپ جاتقان اۋقىمدى ىستەر بارشىلىق. قالا, اۋىل تۇرعىندارىنا تەگىن سپورتپەن شۇعىلدانۋعا قاجەتتى جاعداي جاسالعان. تۇپقاراعان اۋدانىندا 14 اشىق سپورت الاڭى, 5 فۋتبول الاڭى, 5 كوشە ترەناجەرى بار. بارلىعى سپورتتىق قۇرال-جابدىقتارمەن تولىق قامتىلعان.
