ءبىلىم جانە عىلىم ۆيتسە-ءمينيسترى ميراس داۋلەنوۆ ۇمىتكەرلەردىڭ «بولاشاق» باعدارلاماسىنىڭ تىزىمىندە بەكىتىلگەن الەمدىك بەدەلى جوعارى وقۋ ورىندارىنىڭ بىرىنە وزدەرى تۇسەتىنىن جەتكىزدى.
– ۇمىتكەرلەر ءۇشىن ەڭ ماڭىزدى قۇجات – «بولاشاق باعدارلاماسىمەن وقۋعا بولاتىن باسىم ماماندىقتاردىڭ ءتىزىمى. بىلتىر «بولاشاق» باعدارلاماسىنىڭ ۇمىتكەرلەرىن ىرىكتەۋگە جانە كونكۋرستىق قۇجاتتاماعا قاتىستى تالاپتارعا وزگەرىستەر ەنگىزىلگەن بولاتىن. سوعان سايكەس ەندى بارلىق ۇمىتكەرلەر (مەيلى ماگيستراتۋراعا, دوكتورانتۋراعا, رەزيدەنتۋراعا تاپسىراتىن) «بولاشاق» باعدارلاماسىنىڭ تىزىمىندە بەكىتىلگەن الەمدىك بەدەلى جوعارى وقۋ ورىندارىنىڭ بىرىنە وزدەرى تۇسۋگە مىندەتتى بولادى. وقۋعا تۇسكەنىن دالەلدەيتىن قۇجاتپەن عانا ستيپەندياعا ۇمىتكەر بولا الادى. قۇرامىنا ءبىلىم جانە عىلىم سالاسىنىڭ ساراپشىلارى, قوعام قايراتكەرلەرى كىرەتىن رەسپۋبليكالىق كوميسسيا وتىرىسىندا 2021 جىلعا ارنالعان باسىم ماماندىقتاردىڭ ءتىزىمى بەكىتىلدى. ونىڭ قاتارىندا جاڭا تەحنولوگيالار, روبوتتەحنيكا, بيولوگيا, بيوتەحنولوگيا, رەابيليتولوگيا, يممۋنولوگيا, ۆيرۋسولوگيا, ۆاكتسينولوگيا سالاسىنىڭ ماماندىقتارى قامتىلعان, – دەدى ۆيتسە-مينيستر.
اتالعان ورتالىق مەملەكەت باسشىسىنىڭ جولداۋدا بەرىلگەن 500 عالىمنىڭ الەمدەگى جەتەكشى زەرتتەۋ ورتالىقتارىندا جىل سايىن تاعىلىمدامادان ءوتۋىن قامتاماسىز ەتۋگە قاتىستى تاپسىرماسى بويىنشا جۇمىستى دا ۇيىمداستىرادى.
– شەتەلدە كادرلار دايارلاۋ جونiندەگى رەسپۋبليكالىق كوميسسيانىڭ شەشىمىمەن تاعىلىمدامانىڭ ساناتتارى بەكىتىلدى. ەندى تاعىلىمداما قاتارىنا عالىمدارعا ارنالعان جاڭا سانات قوسىلدى. عالىمدارعا ارنالعان تاعىلىمداما 9-دان 12 ايعا دەيىن سوزىلاتىنىن اتاپ وتكەن ءجون. بۇل وتاندىق عالىمدارعا الەمنىڭ جەتەكشى عىلىمي زەرتتەۋ ورتالىقتارىندا ءىس-تاجىريبەدەن وتۋگە جانە شەتەلدىك ارىپتەستەرىمەن بىرلەسە جۇمىس ىستەۋگە جول اشادى. تاعى ءبىر توقتالا كەتەتىن ماڭىزدى جايت, تاعىلىمداما ماگيستراتۋرا, دوكتورانتۋرا, رەزيدەنتۋرا باعدارلامالارى بويىنشا دا قاراستىرىلعان, – دەدى م.داۋلەنوۆ.
ال «بولاشاق» حالىقارالىق باعدارلامالار ورتالىعى» اق پرەزيدەنتى اينۇر كارىبوزوۆا اتالعان باسىم ماماندىقتاردىڭ ءتىزىمى قالاي جاساقتالعانىن ءتۇسىندىردى.
– «بولاشاق» باعدارلاماسىمەن وقۋعا بولاتىن باسىم ماماندىقتاردىڭ ءتىزىمى ەڭبەك نارىعىنداعى مۇددەلى ۇيىمداردىڭ ۇسىنىس-پىكىرى, بولجامدارى, ءبىلىم جانە عىلىم مينيسترلىگىنىڭ مەملەكەتتىك تاپسىرىسى بويىنشا بولاشاقتا قاجەت بولاتىن كادرلاردىڭ بولجامىنا قاتىستى ساراپتامانىڭ نەگىزىندە, سونداي-اق ءار سالانىڭ ساراپشىلارىمەن تالقىلاۋ ارقىلى ازىرلەندى. بۇدان بولەك قۇجاتتاردى قابىلداۋ مەن ۇمىتكەرلەردى ىرىكتەۋ بارىسى تولىعىمەن اۆتوماتتاندىرىلدى. سوندىقتان بيىلعى ۇمىتكەرلەر 4 مامىردان باستاپ قۇجاتتارىن ەلەكتروندى ۇكىمەت پورتالى ارقىلى تاپسىرادى. قۇجاتتارىنىڭ تالاپتارعا سايكەستىگى راستالعان ۇمىتكەرلەر كونكۋرستىق ىرىكتەۋگە جولداما الادى. وسى كەزەڭدە ۇمىتكەر پورتالداعى جەكە كابينەتىنە كىلت الىپ, جەكە دەرەكتەرىن ساقتاي وتىرىپ, ىرىكتەۋدىڭ بارلىق كەزەڭىنەن وتەدى, – دەدى ا.كارىبوزوۆا.
ورتالىق وكىلىنىڭ ايتۋىنشا, ۇمىتكەرلەردى ىرىكتەۋ كونكۋرسىنىڭ كەزەڭدەرىنە سايكەس اۋەلى تولىعىمەن ەلەكتروندى فورماتتا كەشەندى تەستىلەۋ وتكىزىلەدى. ەكىنشى كەزەڭدە تاۋەلسىز ساراپشىمەن جەكە سۇحبات بولادى. سوڭعى كەزەڭدە شەتەلدە كادرلار دايارلاۋ جونiندەگى رەسپۋبليكالىق كوميسسيانىڭ مۇشەلەرى كانديداتۋرالاردى قاراستىرادى.
