«اسا قۇرمەتتى ەلباسى نۇرسۇلتان ءابىش ۇلى, ءبىزدىڭ اسسامبلەيانىڭ قۇرمەتتى توراعاسى بولۋ تۋرالى ورتاق ۇسىنىسىمىزدى قابىل الۋىڭىزدى وتىنەمىز. بۇل مارتەبە شىن مانىندە حالىقتىڭ جانە مەملەكەتتىڭ الدىنداعى تاريحي ەڭبەگىڭىزگە بايلانىستى سىزگە تيەسىلى. اسسامبلەيانىڭ بارلىق مۇشەلەرى بۇل ۇسىنىستى قولدايدى دەپ سەنەمىن», دەدى قاسىم-جومارت توقاەۆ.
سونىمەن قاتار مەملەكەت باسشىسى قاستەرلى تاۋەلسىزدىگىمىزدىڭ 30 جىلدىعىندا اسسامبلەيا حالىقتىڭ تالاپ-تىلەكتەرىن ورىنداۋعا باعىتتالعان ناقتى جوبالاردى جۇزەگە اسىرۋعا ايرىقشا ءمان بەرۋى مىندەت ەكەندىگىن باسا ايتتى.
«بارشامىزعا ورتاق جۇمىستىڭ باستى باعدارى ءدال وسىنداي بولۋعا ءتيىس. ءبىز ءبارىمىز بىرلىك پەن ىنتىماقتىڭ ارقاسىندا جاسامپاز ۇلت بولىپ الدىمىزدا تۇرعان تاريحي ماقساتتارعا قول جەتكىزەمىز», دەدى قر پرەزيدەنتى.
وسى رەتتە تۇڭعىش پرەزيدەنتى نۇرسۇلتان نازارباەۆ اسسامبلەيامەن تىعىز جۇمىس ىستەي بەرەتىندىگىن اتاپ ءوتتى.
ەسكە سالا كەتەيىك, ەلباسى نۇرسۇلتان نازارباەۆ قازاقستان حالقى اسسامبلەياسىنىڭ توراعالىعىنان كەتتى. ەندى قازاقستان حالقى اسسامبلەياسىن مەملەكەت باسشىسى قاسىم-جومارت توقاەۆ باسقارادى.
ايتا كەتەيىك, وتىرىسقا مەملەكەت باسشىسى قاسىم-جومارت توقاەۆ قاتىسىپ وتىر. كۇن ءتارتىبى «بىرلىكتىڭ, بەيبىتشىلىك پەن كەلىسىمنىڭ 30 جىلى» تاقىرىبىنا ارنالعان.
سەسسيا جۇمىسىنا ونلاين فورماتتا 550-دەن استام ادام قاتىسىپ وتىر. ولاردىڭ قاتارىندا بارلىق وڭىرلەردەن كەلگەن اسسامبلەيا مۇشەلەرى, رەسپۋبليكالىق جانە وڭىرلىك ەتنومادەني بىرلەستىكتەردىڭ توراعالارى, پارلامەنت دەپۋتاتتارى, ورتالىق اتقارۋشى ورگانداردىڭ, ساياسي پارتيالاردىڭ, ءدىني بىرلەستىكتەردىڭ باسشىلارى, ۇەۇ, عىلىمي, شىعارماشىلىق زيالى قاۋىم جانە باق وكىلدەرى بار.
