مەملەكەت باسشىسى قاسىم-جومارت توقاەۆ: «مال ۇرلىعىنا بايلانىستى زاڭدى قاتايتىپ, قىلمىسكەرلەردى سىبايلاستارىمەن قوسىپ, قاتاڭ جازالاۋ كەرەك. قىلمىستىق كودەكسكە ءتيىستى وزگەرتۋلەر ەنگىزۋ قاجەت. پارلامەنت دەپۋتاتتارى وسى باستامانى قولداپ, ماسەلەنىڭ وڭ شەشىم تابۋىنا اتسالىسادى دەپ سەنەمىن», دەپ اتاپ وتكەن بولاتىن. ءسويتىپ زاڭ بارىنشا قاتايتىلعان. الايدا اۋىل ادامدارىنىڭ اۋپىرىمدەپ كۇنىن كورىپ وتىرعان ءتورت ت ۇلىگىن وڭاي ولجا كورەتىندەر ءالى تىيىلماي وتىر.
وبلىستا وتكەن جىلى مال ۇرلىعىنىڭ 186 وقيعاسى تىركەلگەن. ونىڭ 80 پايىزعا جۋىعى – جايىلىمدا بولعان قىلمىس. وبلىستىق پوليتسيا دەپارتامەنتىنىڭ قىزمەتكەرلەرى مال ۇرلىعىنىڭ الدىن الۋ بارىسىندا تۇراقتى جۇمىس جۇرگىزگەنىمەن, وڭاي ولجاعا قىزىعاتىنداردىڭ قاتارى ازايماي تۇر.
تاياۋدا وبلىستىق قىلمىستىق ىستەر جونىندەگى سوت القاسى مال ۇرلىعىنا قاتىستى قىلمىستىق ءىستى قاراپ, سۋىق قولدى ۇرىنىڭ سازايىن بەردى. بۇل ءىستى زەرەندى اۋداندىق سوتى قاراعان بولاتىن. كۇدىكتى بۇرىن ەكى مارتە سوتتالعان جانە سوتتالعان مەرزىمى تولىق وتەلمەگەن مارات ساتكەنوۆ قىلمىستىق كودەكستىڭ 188-بابى 1-تارماعىنىڭ 3) تارماقشاسىنا سايكەس بەس جىلعا سوتتالدى. سوت جازاسىن قىلمىستىق-اتقارۋ جۇيەسىنىڭ توتەنشە قاۋىپتى قىلمىسكەرلەرگە ارنالعان مەكەمەسىندە وتەۋ تۋرالى ۇكىم شىعاردى. قىلمىستىق كودەكستىڭ 14-بابىنىڭ 2-تارماعى, 1) تارماقشاسىنا سايكەس م.ساتكەنوۆ قاۋىپتى قىلمىسكەر دەپ تانىلدى. جازاسىن وتەۋ قاماۋعا الىنعان 2020 جىلدىڭ 19 قىركۇيەگىنەن باستاپ ەسەپتەلىنەتىن بولدى.
كۇدىكتىنىڭ كىناسىن مويىنداتاتىن زاتتاي ايعاقتىڭ بارلىعى بار. ماسەلە بىلاي بولعانعا ۇقسايدى. وزگەنىڭ مالىنا كوزىن الارتقان كۇدىكتى 2020 جىلدىڭ 28 قىركۇيەك كۇنى كەشكى ۋاقىتتا زەرەندى اۋدانىنا قاراستى ەلىكتى اۋىلىنداعى سەرىكتەستىكتىڭ مال قوراسىنىڭ ەسىگىن بۇزىپ اشىپ, 11 جاسار جىلقىنى ۇرلاپ الىپ كەتكەن. سەرىكتەستىك باسشىلارىنىڭ باعالاۋىنشا, ۇرلانعان جىلقىنىڭ قۇنى 350 مىڭ تەڭگە شاماسىندا.
اپپەلياتسيالىق شاعىمىندا كۇدىكتى ءوزىنىڭ مال قوراسىنىڭ ەسىگىن بۇزباعانىن, اتتى جايىلىمدا جايىلىپ جۇرگەن جەرىنەن ۇستاپ العاندىعىن, سوندىقتان سوت ۇكىمىمەن كەلىسپەيتىنىن ايتىپ اقتالعان. ونىڭ ويىنشا, ءوزىن توتەنشە قاۋىپتى قىلمىسكەر دەپ تانۋ دا ارتىق. ءارى ول سوتقا دەيىنگى بارلىق تالاپتى ورىنداپ, جابىرلەنۋشىگە جىلقىنىڭ قۇنىن تولەپ بەرگەندىگىن, قازىر ونىڭ ەشقانداي تالابى جوق ەكەندىگىن جەتكىزىپ جانتالاستى. ءوز پىكىرىن ايتا كەلە, سوت ۇكىمىن جەڭىلدەتۋدى سۇرادى. ادۆوكات س.كۋزمين دە كۇدىكتىنىڭ كەلتىرگەن دالەلدەرىن دۇرىس دەپ ەسەپتەيتىنىن ايتا كەلىپ, بارلىق ماتەريالدى ساراپتاپ, جازانىڭ تىم اۋىر ەكەندىگىن العا تارتتى. بىراق قىلمىستىق ىستەر القاسى قىلمىستىق وقيعانىڭ ءمان-جايىن, العاشقى سوت بارىسىندا جازىلعان اۋديو, بەينەجازبالاردى زەرتتەي كەلە, ۇكىمنىڭ زاڭ اياسىندا شىعارىلعاندىعىن انىقتادى.
سوتتالۋشى قىلمىستىق ارەكەتىن مويىنداپ وتىر. جابىرلەنۋشى مەن كۋاگەرلەردىڭ وسى وقيعا بويىنشا تۇسىنىكتەمەلەرى تولىق. ۇرلانعان جىلقىنىڭ جايىلىمنان ەمەس, مال قوراسىنان اكەتىلگەندىگى بەلگىلى بولدى. مال قورا ەسىگى كىلتكە جابىلعان.
وبلىستىق سوت ايىپتالۋشى مارات ساتكەنوۆتىڭ ءىس-ارەكەتىنە بايلانىستى زەرەندى اۋداندىق سوتىنىڭ ۇكىمىن وزگەرىسسىز قالدىردى. اپپەلياتسيالىق ارىز قاناعاتتاندىرىلعان جوق.
ءبىر جىلقى ءۇشىن بەس جىلعا جازا كەسىلدى. ەگەر مال ۇرلىعىنا بايلانىستى ءدال وسىنداي قاتاڭ ءارى ءادىل جازا قولدانىلاتىن بولسا, ۇرلىق تا ساپ تىيىلار ەدى.
اقمولا وبلىسى
