سامال «نيكا» سىيلىعىن الدى

رەسەيلىك ۇزدىك كينو تۋىندى­لارعا جىل سايىن بەرىلەتىن ايتۋلى جۇلدەنى تابىستاۋ ءراسىمى بىلتىر پاندەمياعا بايلانىستى وتكىزىلمەي قالعان ەدى. بيىل سول ولقىلىقتىڭ ورنىن تولتىرىپ، رەسەيلىك كينو ماماندار ەكى جىلدىڭ قورىتىندىسىن قاتار شىعاردى. ناتيجەسىندە، 2019 جىلدىڭ قورىتىندىسى بويىنشا رەجيسسەر سەرگەي دۆورتسەۆويدىڭ «ايكا» فيل­مىندەگى جارقىن ىزدە­نىسى ءۇشىن سامال ەسلياموۆا ۇزدىك اكتري­­سا دەپ تانىلىپ، «نيكا» سىي­لى­­عى­مەن قانجىعا مايلادى.

– وتە قۋانىشتىمىن. بۇل مەنىڭ عانا ەمەس، فيلم تۇسى­رى­لىمىنە اتسا­لىسقان بارشا شى­­عار­ماشىلىق ۇجىم­نىڭ جە­ڭىسى دەپ بىلەمىن. الاي­دا ءوزىم ماسكەۋدە وتكەن ما­راپات­تاۋ راسىمىنە بارا المادىم. سىيلىقتى مەن ءۇشىن ءفيلمنىڭ ەكىنشى رەجيسسەرى، اكتەر ۆياچە­سلاۆ اگاشكين الدى. سلاۆا بول­ما­سا، بۇل فيلم ءسال وزگەشە بولار ما ەدى؟.. ول جۇگىرىپ ءجۇرىپ، ءتۇسىرىلىم ورىندارىن، ارتىستەردى دە ءوزى تاپقان وتە ەڭبەكقور ادام. وسى ءساتتى پايدالانىپ مەن تاعى ءبىر مارتە «ايكا» فيلمىندەگى بارلىق ارىپتەستەرىمە راحمەت ايتقىم كەلەدى، – دەدى اكتريسا سا­مال ەسلياموۆا اعىنان جارى­­لىپ.

فيلم جات ەلدە زاڭسىز جالدامالى جۇمىس ىستەيتىن جاندار­دىڭ قيىن دا قايشىلىقتى ءومىرىن بوياماسىز سۋرەتتەيدى. جوس­پاردان تىس جۇكتى بولىپ، جاس­تىق البىرتتىقپەن ءسابيىن پەر­زەنتحانادا تاستاپ كەتۋگە ءماجبۇر بولعان، كەيىن قاتەسىن ءتۇ­سىنىپ بالاسىن ىزدەۋگە بەل بۋعان قىرعىز قىزىنىڭ باسى­نان وتكەن قيىندىق پەن تاۋقىمەتكە تولى پسيحولوگيالىق كۇيدى بايان­­دايتىن كارتينا ءوزىنىڭ تاقى­­رىپ اۋقىمدىلىعى ءھام شى­­نايىلىعىمەن جالپى حا­لىق­تىق پروكاتقا شىقپاي تۇ­رىپ-اق، 2018 جىلى كانن كينو­فەستيۆالىندە ۇزدىك اتانىپ، كينو الەمىن ءدۇر سىلكىنتكەن بولاتىن. سىن­شى­لاردىڭ جوعارى باعاسىنا يە بو­لىپ، تالاي بايقاۋدا ۇزدىكتەر تۇعى­رىنان كورىنىپ جۇرگەن تۋىن­دىنىڭ بۇل كەزەكتى جۇلدەسى دە سول تىنىمسىز ەڭبەك پەن ماڭداي تەردىڭ جەمىسى بولسا كەرەك.

– اكتەرگە تۋا ءبىتتى تالانتتان بولەك، مىنەز دە قاجەت. سامالدىڭ بويىندا قولعا العان ءىسىن سوڭىنا جەتكىزبەي تىنبايتىن قايسار دا وجەت مىنەز بار. سىرتتاي وتە نازىك كورىنگەنىمەن، ىشكى قۋاتى مىقتى. سامال جارق-جۇرقتى باستى پلانعا شىعارعان يلليۋستراتور ەمەس، شىن مانىندەگى سەزىمنىڭ اكتريساسى. وسى تۇرعىدان كەلگەندە ءبىز جاقسى تۇسىنىستىك. «ايكانىڭ» كەزەكتى جەڭىسى دە سول ىزدەنىس پەن تەرەڭدىكتىڭ ناتيجەسى ەكەنى ءسوزسىز، – دەدى فيلم رەجيسسەرى سەرگەي دۆورتسەۆوي.

«ايكا» – رەجيسسەر سەرگەي دۆورتسەۆويدىڭ 2018 جىلى جارىق كورگەن درامالىق ءفيلمى. كارتينا سول جىلى 71-ءشى كانن كينوفەستيۆالىنىڭ باستى بايقاۋ باعدارلاماسىنا قاتىسىپ، وندا سامال «ۇزدىك اكتريسا» اتانسا، ىلە كوتبۋستە (گەرمانيا) وتكەن 28-ءشى حالىقارالىق كينوفەستيۆالدىڭ جانە توكيو كينوفەستيۆالىنىڭ گران-ءپريىن يەلەندى. ودان بولەك تۇركيانى دا ءتانتى ەتكەن تۋىندى، كەزەكتى تۇرىك كينوفەستيۆالىندە سىنشىلار قاۋىمىنىڭ ءىلتيپا­تىنا بولەنىپ، «ۇزدىك اكتريسا» اتا­لىمىنداعى جۇلدەنى قازاق قىزى­نىڭ قانجىعاسىنا بايلاپ بەرگەن بولاتىن. ەندى مىنە، رەسەي كينو ماماندارىنىڭ دا جوعارى باعا­سىن الىپ، ءبىراۋىزدان قول­داۋى­نا يە بولعان سامالدىڭ تالانتى «نيكا» سىيلىعىمەن جانە ءبىر مارتە مو­يىندالىپ وتىر.

ءيا، ەڭبەك پەن ىزدەنىس بار جەر­­دە جەڭىستىڭ دە قاتار ءجۇرۋى زاڭ­دى. سامالدىڭ تالانتى مەن ەكران­داعى شىنايى ويىنى ءھام كينو كەڭىس­تىگىندەگى جەمىستى جو­لى سو­نىڭ ايعاعى. از عانا ۋاقىت ىشى­ندە تورتكۇل دۇنيە نازارىن وزىنە بۇرعىزىپ، تاقىرىپ اۋقىم­دى­لى­عىمەن دە، كوركەمدىك ساپا دەڭ­گەيىمەن دە تالايدى ءتانتى ەتكەن ءفيلمنىڭ الداعى ۋاقىتتا دا باعىن­دىرار بەلەسى مول بولسىن دەمەكپىز.