پارلامەنت • 26 ءساۋىر, 2021

سەناتورلار جەر قاتىناستارى بويىنشا زاڭ جوبالارىن قارايدى

220 رەت
كورسەتىلدى
1 مين
وقۋ ءۇشىن

سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 2021 جىلعى 29 ساۋىردە وتەتىن سەنات وتىرىسىنىڭ كۇن ءتارتىبىن تالقىلادى, دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ.

سەناتورلار جەر قاتىناستارى بويىنشا زاڭ جوبالارىن قارايدى

پالاتانىڭ الداعى وتىرىسىندا سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارايدى. پرەزيدەنتىمىز قاسىم-جومارت توقاەۆ زاڭ شىعارۋعا باستاماشى بولۋ قۇقىعىن پايدالانىپ, اتالعان قۇجاتتى پارلامەنتكە جولداعان ەدى. بۇل زاڭ جوباسىندا اۋىل شارۋاشىلىعى ماقساتىنداعى جەرلەردى شەتەلدىكتەرگە ساتۋعا جانە جالعا بەرۋگە تىيىم سالۋ تەتىكتەرى قاراستىرىلعان.

سونىمەن قاتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىندا بانكتىك, ميكروقارجىلىق جانە كوللەكتورلىق قىزمەتتى رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا پالاتا وتىرىسىنىڭ كۇن تارتىبىنە شىعارىلدى. تەرىس پيعىلدى كوللەكتورلاردىڭ ارەكەتتەرى قوعامدا ايتارلىقتاي داۋ تۋدىرعانى بەلگىلى. سوعان بايلانىستى مەملەكەت باسشىسى ميكروقارجىلىق جانە كوللەكتورلىق قىزمەتتى ىسكە اسىرۋدىڭ قۇقىقتىق بازاسىن جەتىلدىرۋدى تاپسىرعان ەدى. سوندىقتان اتالعان زاڭ جوباسىندا كوللەكتورلارعا باسقا ادامداردىڭ تەلەفون نومىرلەرىنەن قوڭىراۋ شالۋعا تىيىم سالۋ نورماسى قاراستىرىلعان. سونداي-اق, ولار بورىشكەرلەرمەن اراداعى كەز كەلگەن ءىس-ارەكەت كەزىندە ۆيدەو جانە اۋديوفيكساتسيا جۇرگىزۋگە مىندەتتى بولادى.

ودان بولەك, بيۋرو وتىرىسى كەزىندە ماجىلىستەن كەلىپ تۇسكەن زاڭ جوبالارى سەناتتىڭ تۇراقتى كوميتەتتەرىنە ءبولىنىپ بەرىلدى.

سوڭعى جاڭالىقتار