سارىاعاش اپب-عا جەرگىلىكتى تۇرعىنداردىڭ ءبىرىنىڭ ەسىرتكىنى زاڭسىز وتكىزۋمەن اينالىساتىنى تۋرالى حابارلاما كەلىپ ءتۇستى. حابارلامادا كۇدىكتىنىڭ سارىاعاش اۋدانى تۇرعىندارىنىڭ بىرىنە ماريحۋانا ساتقانى ايتىلعان. اتالعان جايتتى پوليتسيا قىزمەتكەرلەرى سدتبت-عا قر قك-ءنىڭ 297-بابى (ەسىرتكى قۇرالدارىن, پسيحوتروپتىق زاتتاردى, سول تەكتەستەردى وتكىزۋ ماقساتىندا زاڭسىز دايىنداۋ, قايتا وڭدەۋ, ساتىپ الۋ, ساقتاۋ, تاسىمالداۋ, جونەلتۋ نەمەسە وتكىزۋ) بويىنشا تىركەدى.
جەدەل-ىزدەستىرۋ ءىس-شارالارىنىڭ ناتيجەسىندە ەققىقب-نىڭ پوليتسەيلەرى ەسىرتكى ساتۋ قىلمىسىنا كۇدىكتى رەتىندە سارىاعاش قالاسىنىڭ بۇرىن سوتتى بولعان تۇرعىنىن قولعا ءتۇسىردى. جەدەل ۋاكىلدەر ۇستالعان ادامنىڭ تۇرعىلىقتى مەكەنجايىن ءتىنتۋ كەزىندە ءۇيىنىڭ اۋلاسىندا ورنالاسقان قورادان قاعازعا ورالعان ەسىرتكىگە ۇقساس زاتتى تاۋىپ الىپ, تاركىلەدى. ساراپتاماعا سايكەس, تاركىلەنگەن زاتتىڭ جالپى سالماعى 4 گرامعا جۋىق ماريحۋانا بولىپ شىقتى.
بىرەر كۇن وتكەننەن سوڭ ءدال وسىنداي ەسىرتكىگە بايلانىستى بىرنەشە جايت وبلىستا تىركەلدى. ماسەلەن پوليتسەيلەرمەن جۇرگىزىلگەن جەدەل ءىس-شارالاردىڭ ناتيجەسىندە بايدىبەك اۋدانىندا ءوز ۇيىندە ءۇش كەلىدەن استام ماريحۋانا ساقتاعان, ال سايرام اۋدانىندا ماريحۋانا ساتقان ەر ازامات ۇستالدى. ونىڭ دا تۇرعىلىقتى مەكەنجايىنان 2 گرامنان استام ماريحۋانا تاركىلەندى. وسى اتالعان ءۇش جايت بويىنشا كۇدىكتىلەر قاماۋعا الىندى.
بايدىبەكتىك كۇدىكتىگە قاتىستى قر قك-ءنىڭ 296-بابى بويىنشا, ال سايرامدا ۇستالعان كۇدىكتىگە قاتىستى قر قك-ءنىڭ 297-بابىمەن سوتقا دەيىنگى تەرگەۋ امالدارى جۇرگىزىلۋدە.
تۇركىستان وبلىسىنىڭ پوليتسەيلەرى ەسىرتكىنىڭ زاڭسىز اينالىمى مەن تارالۋىنا بايلانىستى قىلمىس جاساعانى ءۇشىن قىلمىستىق جاۋاپكەرشىلىك قاراستىرىلعانىن ەسكەرتەدى.
