25 ساۋىردە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ ءىس باسىنداعى توراعاسى, قازاقستاننىڭ مەملەكەتتىك حاتشىسى – سىرتقى ىستەر ءمينيسترى قانات ساۋداباەۆ امەريكا قۇراما شتاتتارىنىڭ مەملەكەتتىك حاتشىسى حيللاري كلينتونمەن تەلەفون ارقىلى سويلەستى, دەپ باستادى كەشەگى بريفينگى ءسىم-ءنىڭ رەسمي وكىلى اسقار ابدراحمانوۆ.
اڭگىمەلەسۋشىلەر ەكىجاقتى قارىم-قاتىناستىڭ كەڭ اۋقىمدى ماسەلەلەرىن, سونىڭ ىشىندە ايماقتىق قاۋىپسىزدىك جانە ەۋروپاداعى قاۋىپسىزدىك جانە ىنتىماقتاستىق ۇيىمىنىڭ شەڭبەرىندە ءوزارا ىقپالداستىق ماسەلەلەرىن تالقىلادى. قانات ساۋداباەۆ پەن حيللاري كلينتون قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ پەن اقش پرەزيدەنتى باراك وبامانىڭ جاقىندا ۆاشينگتوندا وتكەن ەكىجاقتى كەزدەسۋىنىڭ ناتيجەسى ەكى ەلدىڭ ستراتەگيالىق ارىپتەستىگىنە جاڭا سەرپىلىس بەرگەنىن جانە قول جەتكىزگەن كەلىسىمدەردىڭ ۋاقتىلى جانە تولىعىمەن جۇزەگە اسۋىنىڭ ماڭىزدىلىعىن اتاپ ءوتتى. سونىمەن قاتار, تاراپتار الەمدى يادرولىق قاۋىپتەن ساقتاۋعا ماڭىزدى ۇلەس قوسقان يادرولىق قاۋىپسىزدىك جونىندەگى جاھاندىق ءسامميتتىڭ حالىقارالىق قوعامداستىقتىڭ ۇلكەن جەتىستىگىنە اينالعانىن ەرەكشە اتادى. حيللاري كلينتون پرەزيدەنت نۇرسۇلتان نازارباەۆتىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا توراعا مەملەكەتتىڭ باسشىسى رەتىندە قىرعىزستانداعى جاعدايدى تۇراقتاندىرۋعا قوسقان زور ۇلەسى ءۇشىن اقش اتىنان العىسىن ءبىلدىرىپ, اتالمىش ۇيىم شەڭبەرىندە استانا مەن ۆاشينگتون الداعى ۋاقىتتا دا قىرعىز ەلىن ساياسي داعدارىستان شىعارۋدا, قوعامدا تۇراقتىلىق ورناتۋ مەن كونستيتۋتسيالىق دامۋىن قامتاماسىز ەتۋدە تىعىز بايلانىستا بولۋعا قىزىعۋشىلىعىن تانىتتى. سونداي-اق, ەكى ەلدىڭ سىرتقى ساياسي ۆەدومستۆولارىنىڭ باسشىلارى الماتىدا ۇستىمىزدەگى جىلدىڭ 16 جانە 17 شىلدەسى ارالىعىندا وتەتىن ەۋروپاداعى قاۋىپسىزدىك جانە ىنتىماقتاستىق ۇيىمىنا مۇشە مەملەكەتتەر سىرتقى ىستەر مينيسترلەرىنىڭ بەيرەسمي كەڭەسى تۋرالى جانە جوسپارلانىپ وتىرعان ۇيىم ءسامميتىنىڭ كۇن ءتارتىبىنىڭ مازمۇنىن انىقتاۋ جونىندە پىكىر الماستى. 27 جانە 28 ساۋىردە, دەپ جالعادى ءسوزىن رەسمي وكىل, ناتو باس حاتشىسىنىڭ ورتالىق ازيا مەن كاۆكاز بويىنشا ارنايى وكىلى روبەرت سيممونستىڭ قازاقستانعا جۇمىس ساپارى بولادى. ساپار باعدارلاماسىنا سايكەس روبەرت سيممونس بىرقاتار مەملەكەتتىك ورگانداردىڭ باسشىلىعىمەن كەزدەسۋلەر وتكىزىپ, قازاقستاننىڭ قورعانىس مينيسترلىگى جانىنداعى اسكەري ينستيتۋتتىڭ “بەيبىتشىلىك ءۇشىن سەرىكتەستىك” وقۋ ورتالىعى جۇمىسىمەن تانىسادى جانە ەۋرازيالىق مەديا فورۋمعا قاتىسادى. 29 ءساۋىر مەن 1 مامىر ارالىعىندا, دەدى قورىتىندىسىندا رەسمي وكىل, قازاقستاننىڭ پرەمەر-ءمينيسترى كارىم ءماسىموۆتىڭ شانحاي قالاسىندا وتەتىن “ەكسپو-2010” دۇنيەجۇزىلىك كورمەنىڭ رەسمي اشىلۋ راسىمىنە قاتىسۋىمەن ۇشتاستىرىلعان قىتاي حالىق رەسپۋبليكاسىنا جۇمىس ساپارى بولادى. ۇكىمەت باسشىسى ساپار بارىسىندا قىتاي حالىق رەسپۋبليكاسىنىڭ ساياسي باسشىلىعىمەن جانە قازاقستاندا جۇمىس ىستەيتىن ءىرى قىتاي كومپانيالارىنىڭ جەتەكشىلەرىمەن بىرقاتار كەزدەسۋلەر وتكىزبەك. كەلىسسوزدەر بارىسىندا ەكى مەملەكەت اراسىنداعى ەكىجاقتى ىقپالداستىقتىڭ كوكەيكەستى ماسەلەلەرى جانە بولاشاق ىنتىماقتاستىق ماسەلەلەرى تالقىلانادى. “ەگەمەن-اقپارات”.
