«بۇگىن قالانى ارالاۋ بارىسىندا بىرقاتار مەكتەپتىڭ قۇرىلىس بارىسىمەن تانىستىم. وقجەتپەس پەن ش.بوكەەۆ (سارىارقا اۋدانى) كوشەلەرىنىڭ قيىلىسىندا ورنالاسقان مەكتەپ قۇرىلىسى ۇزاققا سوزىلدى. مەكتەپ قۇرىلىسى 2017 جىلى باستالدى. قۇرىلىستى قالپىنا كەلتىرۋ ءۇشىن جوبالىق-سمەتالىق قۇجاتتاماعا تۇزەتۋ جۇرگىزىلدى, قارجىلاندىرۋ ءبولىندى. وسىلايشا مەكتەپتىڭ قۇرىلىسى قايتا باستالدى. اتالعان مەكتەپ ەكى اۋىسىمدا 2400 وقۋشى ورنىن قۇرۋعا مۇمكىندىك بەرەدى. بۇل سول اۋدان تۇرعىندارىنىڭ قاجەتتىلىگىن قاناعاتتاندىرۋعا مۇمكىندىك بەرەدى», دەپ جازدى اكىم.
سونداي-اق ول مەملەكەت باسشىسى بارعان №23 ورتا مەكتەپ اۋماعىندا بەس قاباتتى مەكتەپتىڭ قۇرىلىسى ءجۇرىپ جاتقانىن ايتتى. وقۋ ورنى ءوندىرىس ەلدى مەكەنىندە (بايقوڭىر اۋدانى) ورنالاسقان.
«بيىل وتكەن جىلدارمەن سالىستىرعاندا كوبىرەك مەكتەپ سالامىز. ۇلكەن 16 مەكتەپ سالىنباق. ولار بيىل 40 مىڭنان استام وقۋشى ورنىن قۇرۋعا مۇمكىندىك بەرەدى. وتكەن جىلمەن سالىستىرعاندا وقۋشى ورىندارىنىڭ سانى 2 ەسەدەن ارتىق, ال 2019 جىلمەن سالىستىرعاندا 4 ەسەدەن ارتىق ۇلعايادى. كەشەندى جوسپار اياسىندا 5 جىلدىق كەزەڭدە 50-گە جۋىق مەملەكەتتىك مەكتەپ سالۋ جوسپارلانعان. سونداي-اق مەكتەپ قۇرىلىسىنا جەكە ينۆەستيتسيالار تارتامىز. ينۆەستيتسيالىق كەڭەستەردە 30-دان استام جەكەمەنشىك وقۋ ورىندارىنىڭ قۇرىلىسى قولداۋ تاپتى. ءۇش اۋىسىمدى وقىتۋ جانە تىعىزدالعان رەجيمى بار مەكتەپتەر سانىن ازايتۋ بويىنشا جۇيەلى جۇمىس جۇرگىزۋدەمىز», دەپ جازدى ەلوردا اكىمى.
