ءبىر تۋىندىدان-اق ءبىر حالىقتىڭ بۇكىل عۇمىربايانىن تانۋعا بولادى. ارينە, اركىم ءوز بيىگىندە. ءبىز دە العاش التىنعا ورانعان ادامدى كورىپ تاڭداي قاققانبىز. الەم ونىڭ قازاقتىڭ قۇنارلى توپىراعىنا بىتكەنىنە قايران قالعان. ءبىزدى مادەنيەتتەن الىس ساناعاندار سان سوققان سول ساتتە. ءسويتىپ, تاريحتىڭ جاڭا پاراعى اشىلدى. بىراق وعان ءالى نە جازارىمىزدى بىلمەيمىز. بۇل دا ءبىر قاسىرەت.
كوڭىلدەگى ويدى كورىكتەي كوتەرگەن قازاقستاننىڭ ەڭبەك سىڭىرگەن ونەر قايراتكەرى اعىمسالى دۇزەلحانوۆتىڭ «التىن ادام» كارتيناسى. ەگەر تىرىدەي كورگىڭىز كەلسە, ۇلتتىق مۋزەيدە ورنالاسقان. قىلقالام شەبەرى اتالعان شىعارمانى 1969-1970 جىلدارى ەسىك قورعانىنان تابىلعان ارحەولوگيالىق جادىگەردىڭ اسەرىمەن جازعان. اسەم اسەر بوياۋعا ۇلاستى. سودان سوڭ كەنەپ بەتىنە تاريح ءبىتتى.
اۆتوردىڭ قيالىنان تۋعان كوركەم بەينە جىگەرىڭدى شىڭدايدى. ءارتۇرلى بەينەدەگى التىن جاپسىرمالارمەن بەزەندىرىلگەن القىزىل كيىم مەن باسىنا كونۋس ءپىشىندى دۋلىعا كيگەن ساق جاۋىنگەرى ەلىمىزدىڭ مەملەكەتتىك سيمۆولىنا اينالدى. ول ەندى بوگەنايى بولەك اڭگىمە. ءبىزدى تامسانتقان – سۋرەتشىنىڭ سىرباز تۋىندىسى.
كارتينانىڭ ورتاسىنا اتتا وتىرعان جاۋىنگەر بەينەلەنگەن. التىن ادامنىڭ باسىنا كونۋس ءپىشىندى ۇزىن باس كيىم كيگىزىلگەن. جاۋىنگەردىڭ بەلىنە قىزىل بىلعارىمەن قاپتالعان قىناپتى قىلىش بايلانسا, قولىنا التىن جاپسىرمالى قىنعا سالىنعان قانجار ۇستاتقان. ەڭ قىزىعى ونىڭ كيىمى اڭ ستيلىندەگى جاپسىرمالارمەن بەزەندىرىلگەن. ات ابزەلدەرىنىڭ پىشىندەرى دە ءارتۇرلى تەمىر جاپسىرمالارمەن ادىپتەلگەن.
سۋرەتتىڭ ەكىنشى پلانىنان التىن ادامنىڭ وتە كوپ اسكەرىن كورەمىز. ولاردىڭ اراسىندا كوپتى كورگەن اقساقالدار دا, كۇشى تاسىعان جاس جاۋىنگەرلەر دە بار. جاۋىنگەردىڭ جۇزىنەن باتىلدىق پەن قايسارلىق بايقالادى. وعان قاراپ تۇرىپ الداعى ساتتە التىن ادام باستاعان مىڭداعان جاۋىنگەردىڭ جورىققا شىعاتىنىنا سەنەسىز.
سۋرەتشى كارتينانىڭ قۇرىلىسىنا الاڭنىڭ تومەنگى جاعىن پايدالانعان. سونىڭ ناتيجەسىندە التىن ادامنىڭ تۇلعاسى الىپ كورىنىپ, كومپوزيتسيانىڭ ورتاسىنا اينالادى. سونىسىمەن جاۋىنگەر بەينەسىنىڭ ماڭىزدىلىعى ارتىپ, وقىرمانعا ايبىندىلىق بەرەدى. ءبىزدىڭ وي وسىنداي.
