جالپى, تۇرعىندارىنىڭ 80 پايىزعا جۋىعى اۋىلدى مەكەندەيتىن ايماق ءۇشىن بۇل كورسەتكىش جاقسى بولعانىمەن, ماسەلەنى تولىق شەشە المايدى ەكەن. ياعني وبلىستاعى 2 ملن جاننىڭ باسىنا شاققاندا العاشقى مەديتسينالىق كومەك كورسەتەتىن ورىنداردىڭ تاپشىلىعىن جويۋ ءۇشىن ءالى دە ءبىراز ۋاقىت كەرەك. ال اتقارۋشى بيلىك ەلدى مەكەندەردەگى سۇرانىسقا يە ەمحانالاردىڭ جۇمىسىن جانداندىرۋعا كۇش سالىپ-اق كەلەدى. قازىرگىدەي پاندەميا جاعدايىندا اقجەلەڭدى ابزال جانداردىڭ جۇمىسىنا دەگەن قۇرمەت پەن سىن دا ارتاتىنى ءسوزسىز. جەتىسۋلىق دارىگەرلەر وسى تالاپ ۇدەسىنەن شىعىپ وتىر دەۋگە تولىق نەگىز بار.
مىسالى, جۇقپالى ىندەتپەن كۇرەس جاعدايىندا قالتقىسىز قىزمەت كورسەتىپ وتىرعان مەديتسينا مەكەمەسىنىڭ ءبىرى – ىلە اۋدانىنا قاراستى بورالداي كەنتىندەگى اۋداندىق اۋرۋحانا. بۇل مەكەمە بورالداي كەنتى, ۆودنيك, كازتسيك, كومسومول, چاپاي, مەجدۋرەچەنسك اۋىلدارى تۇرعىندارىنا مەديتسينالىق قىزمەت كورسەتىپ وتىر ءارى وتەگەن باتىر كەنتىندەگى ورتالىق اۋرۋحانادان كەيىنگى اۋداندىق اۋرۋحانا مارتەبەسىنە يە. قازىر مۇندا ستاتسيونار ءبولىمى, كۇندىزگى ستاتسيونار ءبولىمى, قابىلداۋ ءبولىمى, ونكولوگ-مامولوگ, ەندوكرينولوگ, ستوماتولوگ, حيرۋرگ, گينەكولوگ, نەۆروپاتولوگ, رەنتگەنولوگ, وكۋليست, ۋدز كابينەتى, پسيحولوگ, الەۋمەتتىك قىزمەتتەر ماماندارى, ۋچاسكەلىك جالپى تاجىريبەلىك دارىگەرلەر ءبولىمى جۇمىس ىستەيدى. اۋرۋحاناداعى زامان تالابىنا ساي الىنعان لاپاروسكوپيا اپپاراتى تۇرعىنداردىڭ دەرتىن ءدوپ باسىپ انىقتاپ, دەرتىنە شيپا بولىپ تۇرعانىنا ناۋقاستار ءدان ريزا.
– لاپاروسكوپيالىق تەحنولوگيا دەگەنىمىز – ناۋقاستىڭ ىشكى اعزاسىنا وتانى تىلىك جاساماي ەمدەيتىن حيرۋرگيانىڭ جاڭا ءادىس. وسى تاسىلمەن ءارتۇرلى وتا جاسالۋدا. بۇل جۇمىستى ءوز ءىسىنىڭ مامانى, اۋرۋحانانىڭ حيرۋرگيا ءبولىمىنىڭ مەڭگەرۋشىسى نۇربول نۇرجانوۆ قولعا العان. سونداي-اق ەمحانادا ۋلترادىبىستىق زەرتتەۋ, ءسۇت بەزدەرىنىڭ رەنتگەنولوگيالىق زەرتتەۋى, ءسۇت بەزدەرىنىڭ پۋنكتسيوندىق بيوپسياسىن زەرتتەۋگە ارنالعان مامموگرافيا اپپاراتى الىندى. بۇل اپپاراتپەن 40 پەن 70 جاس ارالىعىنداعى ايەلدەرگە ءسۇت بەزىنىڭ قاتەرلى ىسىگىنىڭ الدىن الۋ ماقساتىندا تەكسەرۋ جۇرگىزەدى, – دەيدى بورالداي كەنتىندەگى اۋداندىق اۋرۋحانانىڭ باس دارىگەرى, دەنساۋلىق ساقتاۋ ءىسىنىڭ ۇزدىگى داريعا سادىقوۆا.
بورالدايداعى بۇل اۋرۋحانادا 75 دارىگەر, 125 مەدبيكە جۇمىس ىستەيدى ەكەن. بۇگىندە كوروناۆيرۋس ىندەتىنىڭ تارالۋى اسقىنعان سايىن دارىگەرلەردىڭ كاسىبي قىزمەتىنە سۇرانىس ارتىپ, جاۋاپكەرشىلىك جۇگى ەسەلەي تۇسكەن. ال اۋرۋحانادا ەڭبەگىمەن ەل العىسىنا بولەنىپ جۇرگەن اقجەلەڭدى ابزال جاندار كوپ. مىسالى, دارىگەر-تەراپەۆت الما ايداربەكوۆا, زەرتحانا ءبولىمىنىڭ مەڭگەرۋشىسى ارداق وسپانقۇلوۆا, جالپى تاجىريبەلى دارىگەرلەر ءبولىمىنىڭ مەڭگەرۋشىسى سامال اقىباەۆا مەن بالالار دارىگەرى ءۇلبيبى احمەتاليەۆا سىندى دارىگەرلەردى اتاپ ايتۋعا بولادى.
– بورالداي اۋداندىق اۋرۋحاناسىنىڭ قىزمەتكەرلەرى دە جۇقپالى ىندەت جاپپاي تارالعان كەزەڭنەن بەرى, ياعني بىلتىرعى ناۋرىز ايىنان باستاپ اسقان جاۋاپكەرشىلىكپەن جۇمىس ىستەپ كەلەدى. اۋرۋحانادا وبلىس بويىنشا العاشقىلار قاتارىندا جەدەل كومەك كورسەتەتىن پروۆيزورلىق بولىمشە اشىلىپ, جۇمىس ىستەپ تۇر. ساقتىق شارالارى قاتاڭ تۇردە ساقتالىپ, بارلىق قىزمەتكەر جەكە قورعانىس كيىمدەرىمەن قامتاماسىز ەتىلگەن. دارىگەرلەر مەن مەدبيكەلەر وسىنداي قيىن ساتتە وزدەرىنىڭ ەڭبەكتەرىن شىڭداپ, ۇلكەن تاجىريبە جيناقتادى, – دەيدى باس دارىگەر داريعا بالتابەكقىزى.
الماتى وبلىسى
