وسى ولقىلىقتىڭ ورنىن تولتىرۋ ماقساتىندا قالا اكىمدىگى ەل ۇكىمەتىنە شىمكەنت اۋەجايىن جاڭعىرتۋ بويىنشا ينۆەستيتسيالىق باعدارلاما ۇسىنعان. ناتيجەسىندە, شاھاردا جاڭا تەرمينالدىڭ قۇرىلىسى باستالعان بولاتىن. ەلدەگى جەتەكشى əۋە كومپانيالارىنىڭ ءبىرى قولعا العان اۋقىمدى جوبانىڭ ينۆەستيتسيالىق قۇنى – 17,5 ملرد تەڭگە (جوبانىڭ جالپى قۇنى – 18,7 ملرد تەڭگە).
انىعىندا, تۇستىكتەگى ءتۋريزمنىڭ قاقپاسى اتانعان اۋەجايدىڭ ەسكى تەرمينالىنىڭ جولاۋشىلاردى وتكىزۋ مۇمكىندىگى تومەندەگەن. ماسەلەن, 1932 جىلدىڭ ناۋرىز ايىندا پايدالانۋعا بەرىلگەن اۋەجاي قىزمەتىن تۇتىنۋشىلار سانى 2016 جىلى 621 مىڭ جولاۋشىعا جەتسە, 2017 جىلى بۇل كورسەتكىش 23 پايىزعا ارتقان. دەمەك, جولاۋشىلار اينالىمىنىڭ ارتۋىنان جىل وتكەن سايىن اۋە ايلاقتىڭ تىنىسى تارىلا تۇسۋدە. ەندى ساعاتىنا 2 مىڭ ادامدى وتكىزۋگە قاۋقارلى جاڭا نىساننىڭ قۇرىلىسى اياقتالسا, كوپشىلىك كەزەكتە تۇرۋدان قۇتىلىپ, دىتتەگەن جەرىنە ۋاقتىلى جەتەر ەدى.
بۇگىندە جولاۋشىلار تەرمينالىنداعى قۇرىلىس جۇمىستارىنىڭ ءبىرىنشى كەزەڭى تولىعىمەن اياقتالىپ, ەكىنشى كەزەڭى قارقىن الۋدا. قاسبەتتىك جۇيەلەردى تولىقتاي مونتاجداۋ 2021 جىلعى 15 ماۋسىمعا جوسپارلانعان. قازىرگى تاڭدا بىرەگەي جوبا قۇرىلىسىنىڭ 60 پايىزى اياقتالدى.
بىلتىر قالا اكىمدىگى 912 ملن تەڭگەگە اۋەجاي عيماراتى الدىنداعى اۆتوتۇراقتى اباتتاندىرعان. ال جوبالىق قۇنى 1,7 ملرد تەڭگەنى قۇرايتىن جاڭا كىرمە جولدى سالۋ بويىنشا جۇمىستار وسى جىلدىڭ ءبىرىنشى جارتىسىندا اياقتالماق. بۇدان وزگە ينجەنەرلىك جەلىلەردى سالۋ ءۇشىن جوبالىق-سمەتالىق قۇجاتتاما ازىرلەنىپ, اتالعان جەلىلەردى تارتۋعا وسى جىلدىڭ سوڭىنا دەيىن ۋاقىت بەرىلگەن.
اۋەجايدا قازىر 14 اۋە رەيسى بار بولسا, ولاردىڭ سانىن 2030 جىلعا دەيىن 50-گە ءوسىرۋ جوسپارلانعان. جوباعا سايكەس, 3 قاباتتان تۇراتىن عيماراتتىڭ الاڭى 28 171 شارشى مەتر بولىپ, 4 تەلەسكوپتىق دالىزبەن قامتاماسىز ەتىلەدى. وسىلايشا, 2,8 گەكتار جەردە بۇرىنعىدان 10 ەسەگە ارتىق جولاۋشىنى وتكىزە الاتىن جاڭا تەرمينال جىل سوڭىنا دەيىن پايدالانۋعا بەرىلمەك.
مەملەكەت باسشىسى ەلدەگى كولىك-لوگيستيكا سالاسىن دامىتۋعا بايلانىستى ناقتى تاپسىرمالار بەرىپ, وسىعان سايكەس كوپتەگەن جوبا ازىرلەندى. قازاقستان لوگيستيكاسىنىڭ ساپاسى جاقسارىپ, دۇنيەجۇزىلىك بانك رەيتينگىندە ۇزدىك 40 ەلدىڭ قاتارىنان كورىنۋدى ماقسات ەتىپ وتىر.
شىمكەنت اۋەجايىن جاڭعىرتۋ سول مەجەگە جەتۋدەگى باسپالداق بولىپ سانالماق.
شىمكەنت
