نۇرسۇلتان نازارباەۆ قورى ۇيىمداستىرعان ونلاين-كونفەرەنتسياعا قازاقستاندىق جانە حالىقارالىق تانىمال سپيكەرلەر, كوممەرتسيالىق ەمەس ۇيىمداردىڭ (كەۇ) وكىلدەرى, مەملەكەت جانە قوعام قايراتكەرلەرى, كاسىپكەرلەر مەن مەتسەناتتار, ايگىلى برەند-كوشباسشىلار جانە باق وكىلدەرى قاتىسىپ جاتىر.
ءىس-شارانى وتكىزۋگە ازاماتتىق باستامالاردى قولداۋ ورتالىعى كەۇ ايماقتىق قولداۋ كورسەتتى. ال فورۋمنىڭ باس سەرىكتەسى – Eurasian Resources Group.
نۇرسۇلتان نازارباەۆ قورى اتالعان ءىس-شارا ارقىلى قوعامدىق ماڭىزى بار وزەكتى ماسەلەلەردى تالقىلاۋ ماقساتىندا ءارتۇرلى باعىتتاعى ۇيىمداردى بىرىكتىرۋگە, مەملەكەت پەن كەۇ ىنتىماقتاستىعىن نىعايتۋعا ىقپال ەتۋدى ماقسات تۇتادى.
فورۋمنىڭ ءبىرىنشى كۇنىندە نۇرسۇلتان نازارباەۆ قورىنىڭ ديرەكتورى داريعا نازارباەۆا, بۇۇ دامۋ باعدارلاماسىنىڭ قازاقستانداعى تۇراقتى وكىلى ياكۋپ بەريش, موحاممەد بين راشيد ءال-ماكتۋما ءبىلىم قورىنىڭ باسقارما توراعاسى دجامال بين حۋۆايرەب, Eurasian Resources Group (ERG) ديرەكتورلار كەڭەسىنىڭ توراعاسى الەكساندر ماشكەۆيچ جانە باسقا سپيكەرلەر قاتىستى.
فورۋم سەسسيالارى اياسىندا مەملەكەتتىك ورگاندار مەن باسقا دا ۇيىمداردىڭ ەكونوميكا, الەۋمەتتىك قورعاۋ, دەنساۋلىق ساقتاۋ, ءبىلىم بەرۋ سالالارىندا ءوزارا ءىس-ارەكەتتەردىڭ ماڭىزدى باعىتتارى تالقىلاندى. جىل سايىنعى الەۋمەتتىك يدەيالار مەن جوبالار جارمەڭكەسى اياسىندا كەۇ ۇسىناتىن كوپتەگەن جوبانى تالقىلاۋعا ەرەكشە نازار اۋدارىلدى. سونداي جارمەڭكەلەردىڭ ءبىرى وسى جىلى الماتى قالاسىندا 14-15 ساۋىردە وتكىزىلدى. ءبىرىنشى الەۋمەتتىك جوبالار فورۋمى الەۋمەتتىك يدەيالار مەن جوبالار جارمەڭكەسىنىڭ جالعاسى رەتىندە ۇيىمداستىرىلىپ وتىر.
فورۋم سپيكەرلەرى الەۋمەتتىك يدەيالار مەن جوبالار جارمەڭكەسى سياقتى الاڭداردىڭ ماڭىزدىلىعى تۋرالى ايتا كەلە, مۇنداي الاڭداردا بەلسەندى قازاقستاندىقتاردىڭ باستامالارى ناقتى قولداۋعا يە بولاتىنىن جەتكىزدى.
فورۋمدى كىرىسپە سوزىمەن اشقان داريعا نازارباەۆا: «فورۋم ەل تاۋەلسىزدىگىنىڭ 30 جىلدىعى مەرەيتويى اياسىندا ءوتىپ جاتىر. تاۋەلسىزدىك جىلدارى قازاقستاندا تۇراقتى ءارى قارقىندى دامىپ جاتقان ۇكىمەتتىك ەمەس ۇيىمداردىڭ جۇيەسى قالىپتاستى. قوعامدى دەموكراتيالاندىرۋ باعدارلاماسى ۇەۇ جۇيەسىن دامىتۋعا ايتارلىقتاي سەرپىن بەردى. مۇنى ەلىمىزدىڭ تۇڭعىش پرەزيدەنتى 1998 جىلعى قازاقستان حالقىنا جولداۋىندا ايتقان بولاتىن. ەلباسى ازاماتتىق قوعام قۇرۋدا ۇەۇ ءرولىن كۇشەيتۋ – تاۋەلسىز قازاقستاننىڭ دەموكراتيالانۋى مەن دامۋىنىڭ باستى ەلەمەنتى ەكەنىن اتاعان. ءسىرا, قازاقستاننىڭ ءۇشىنشى سەكتورىنىڭ قىزمەتى ۇنەمى زەرتتەۋدى قاجەت ەتسە كەرەك. بۇل ءۇشىن جۇيەلەۋ, جان-جاقتى ناسيحاتتاۋ مەن وزىق تاجىريبەنى قولدانۋ قاجەت. الەۋمەتتىك جوبالار فورۋمى ءوزارا تىعىز قارىم-قاتىناس جاساۋدىڭ تۇراقتى الاڭى بولا الادى. بۇگىنگى فورۋم نۇرسۇلتان نازارباەۆ قورىنىڭ الەۋمەتتىك يدەيالار مەن جوبالار جارمەڭكەسىنىڭ جالعاسى ىسپەتتى. قور بۇل شارانى ەلباسىنىڭ باستاماسىمەن 2008 جىلدان بەرى وتكىزىپ كەلەدى. سودان بەرى جارمەڭكەگە 15000-نان استام ءتۇرلى ۇيىم قاتىسقان. 303 جوبا قوردىڭ قولداۋىنا يە بولىپ, گرانت يەلەندى», دەدى.
راسىندا دا, 2008 جىلدان بەرى وتكىزىلىپ كەلە جاتقان جارمەڭكەنىڭ ءار جىلى جاڭا جوبالاردى جۇزەگە اسىرۋمەن قاتار كەلەدى. مىسالى, «درۋگايا جيزن» قوعامدىق قورى جارمەڭكەدە جەڭىسكە جەتىپ تالدىقورعان قالاسىندا اۋتيست بالالارعا ارنالعان سەنسورلىق كومەك كابينەتىن اشتى. ال «انگەل» قوعامدىق بىرلەستىگى «پاكەتام نەت!» ەكولوگيالىق اكتسياسىن ۇيىمداستىرىپ, قورشاعان ورتانى پوليەتيلەن قاپشىقتارمەن لاستاۋ ماسەلەسىن شەشۋگە اتباسار اۋدانىنداعى 12 000-نان استام تۇرعىننىڭ اتسالىسۋىنا مۇمكىندىك بەردى.
قور ديرەكتورىنىڭ ايتۋىنشا, بيىل ۇسىنىلعان جوبالاردىڭ سانى رەكوردتىق دەڭگەيگە جەتكەن – 221. وتىنىشتەردىڭ كوبى الماتى قالاسىنان (35), الماتى (30), قوستاناي (18), پاۆلودار (17) جانە شىعىس قازاقستان (16) وبلىستارىنان كەلگەن. «221 جوبانىڭ ىشىنەن ەڭ ماڭىزدى دەگەن 50 جوبانى تاڭداپ العان بايقاۋ كوميسسياسىنىڭ جۇمىسى وڭاي بولعان جوق. جوبالاردى تاڭداعاندا, ولاردىڭ ماڭىزدىلىعى, تۇراقتىلىعى, الەۋمەتتىك اسەرى, جاڭاشىلدىعى جانە اقپاراتتىق جاعىنان اشىقتىعى ەسكەرىلدى», دەدى داريعا نازارباەۆا.
23 ءساۋىر, الەۋمەتتىك جوبالار فورۋمىنىڭ ەكىنشى كۇنىندە نۇرسۇلتان نازارباەۆ قورىنىڭ گرانتى كىمگە بەرىلەتىنى ءمالىم بولادى. ال فورۋم سپيكەرلەرى مەملەكەت پەن كەۇ ىنتىماقتاستىعىنىڭ ءتيىمدى مىسالدارىن كەلتىرە وتىرىپ, وسى تاراپتار اراسىنداعى ءوزارا ءىس-ارەكەتتى ءارى قاراي دا قالىپتاستىرۋ كەرەكتىگىن اتاپ ءوتتى.
