وتاندىق ۆاكتسينا دۇنيەجۇزىلىك دەنساۋلىق ساقتاۋ ۇيىمىنىڭ تىزىلىمىنە دە ەنگىزىلگەن. ونىڭ تولىق قاۋىپسىزدىگى دالەلدەنگەن. اتالعان ۆاكتسينا كوروناۆيرۋس ينفەكتسياسىنا قارسى تۇراقتى يممۋنيتەتتى قالىپتاستىرادى. يناكتيۆتەندىرىلگەن ۆاكتسينانىڭ ارتىقشىلىعى – ول ۆاكتسينامەن بايلانىستى اۋرۋلاردى تۋدىرمايدى. بۇدان بولەك, QazVac ۆاكتسيناسىن جەتكىزۋ ادىستەرى كۇردەلى توڭازىتقىش قوندىرعىلارىن تالاپ ەتپەيدى. ولار توڭازىتقىشتا +2-8 گرادۋس تەمپەراتۋرادا تاسىمالدانادى.
پرەزيدەنت تاپسىرماسىنا سايكەس جامبىل وبلىسىنىڭ قورداي اۋدانىنا كەلگەن پرەمەر-ءمينيستردىڭ ورىنباسارى ەرالى توعجانوۆ وڭىرگە جۇمىس ساپارى بارىسىندا بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىنىڭ بازاسىندا وندىرىلگەن «QazVac» (QazCovid-in) قازاقستاندىق ۆاكتسيناسىنىڭ ءبىرىنشى پارتياسىنىڭ جونەلتىلۋىنە قاتىستى. سونىمەن قاتار قورداي اۋدانى گۆاردەيسكي كەنتىندەگى بيوفارماتسەۆتيكا زاۋىتىنىڭ قۇرىلىسىمەن تانىستى.
«قازاقستاندىق ۆاكتسينانىڭ جاسالۋى – ءبىزدىڭ ەلىمىزدىڭ كوروناۆيرۋس ينفەكتسياسىنا قارسى ءوز ۆاكتسينالارىن ازىرلەگەن الەمنىڭ بەس ەلىنىڭ قاتارىنا ەنۋىنە مۇمكىندىك بەردى. بۇل تەك حالىقتىڭ دەنساۋلىعىنا عانا قاتىستى ماسەلە ەمەس. سونداي-اق وتاندىق عىلىمنىڭ الەۋەتى مەن بيوفارماتسەۆتيكادا زاماناۋي تەحنولوگيالاردى ءىس جۇزىندە قولدانۋدىڭ, مەملەكەتتىڭ بەدەلىنىڭ دالەلى», دەدى ە.توعجانوۆ.
سونىمەن قاتار ۆيتسە-پرەمەر مەملەكەت باسشىسى قاسىم-جومارت توقاەۆتىڭ قازاقستاندىق ۆاكتسينانى شىعارۋ جونىندەگى بارلىق تاپسىرماسى ۇكىمەتتىڭ ەرەكشە باقىلاۋىندا ەكەنىن جانە ۆاكتسينانىڭ ءبىرىنشى پارتياسىنىڭ بۇگىنگى شىعارىلۋى ونىڭ ءىس جۇزىندە ورىندالعانىن ايعاقتايتىنىن اتاپ ءوتتى. كەزدەسۋدە «QazVac» ۆاكتسيناسىنىڭ العاشقى 50 مىڭ دوزاسى «سق-فارماتسيا» جاۋاپكەرشىلىگى شەكتەۋلى سەرىكتەستىگىنىڭ حابتارىنا تاراتىلىپ, ودان ءارى ەلىمىزدىڭ بارلىق وڭىرىندەگى دەنساۋلىق ساقتاۋ باسقارمالارىنىڭ قويمالارىنا جەتكىزىلەتىنى دە ايتىلدى.
بۇگىندە بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى جانىنداعى بيوفارماتسەۆتيكا زاۋىتىندا قۇرىلىس-جوندەۋ جانە ارلەۋ جۇمىستارى اياقتالعان. ينجەنەرلىك جەلىلەرگە قوسۋ ارقىلى جابدىقتاردى مونتاجداۋ, قوسۋ-باپتاۋ جانە ىسكە قوسۋ بويىنشا جۇمىستار جۇرگىزىلۋدە. بيىلعى ناۋرىز ايىندا زەرتتەۋدىڭ GMP ستاندارتتارىنا سايكەستىگى تۋرالى وڭ قورىتىندىسى (DQ) الىنعان. كەلەسى قادام – ۆاليداتسيانى جۇزەگە اسىرۋ جانە GMP حالىقارالىق ستاندارتىنىڭ سەرتيفيكاتىن الۋ بولىپ وتىر. بۇل ماقساتقا «اتاباي» تۇرىك كومپانياسى تارتىلعان.
اتالعان نىساندى ارالاعان ە.توعجانوۆ نىسان جۇمىسىنا وڭ باعا بەرىپ, ۆاكتسينا جاساۋ جۇمىسىنا اتسالىسقانى ءۇشىن عالىمدار مەن دارىگەرلەرگە العىس ءبىلدىردى. ءوز سوزىندە مەملەكەت باسشىسىنىڭ تاپسىرماسىنا سايكەس وتاندىق ۆاكتسينا وندىرەتىن زاۋىت قۇرىلىسى بەلگىلەنگەن مەرزىمدە جۇرگىزىلىپ جاتقانىن اتاپ ءوتتى. سونىمەن قاتار بيوفارماتسەۆتيكا زاۋىتى بيىل ىسكە قوسىلعاننان كەيىن ونىڭ بازاسىندا «QazVac» ۆاكتسيناسىن ءوندىرۋ جالعاساتىنى دا ايتىلدى.
جامبىل وبلىسى
