وسى ورايدا, تۇركيا رەسپۋبليكاسى ۇكىمەتى جانىنداعى تۇرىك ىنتىماقتاستىق جانە ۇيلەستىرۋ اگەنتتىگىنىڭ (TIKA) قازاقستانداعى كوورديناتورى يسمايل گيۋرلەك مىرزا «ياساۋي ىزىمەن» عىلىمي-تانىمدىق جوباسىمەن تەرەڭىرەك تانىسۋ ماقساتىندا تۇركىستان قالاسىنا ارنايى ىسساپارمەن كەلىپ, قورىق-مۋزەي باسشىلىعىمەن كەزدەستى. سونداي-اق ساپار بارىسىندا ەلشى مىرزا قوجا احمەت ءياساۋيدىڭ زامانداسى ءجۇسىپ اتانىڭ ۇرپاعى سەيدالىم يۋلداشەۆ اقساقالدىڭ قولىنداعى تاريحي قولجازبالارمەن تانىستى.
« ۇلى ۇستاز قوجا احمەت ياساۋي تاريحىن تۇگەندەپ, دەرەكتەرىن ىزدەۋ ماقساتىندا «ازىرەت سۇلتان» مەملەكەتتىك تاريحي-مادەني قورىق-مۋزەيى جاساپ جاتقان جۇمىستار تۇركى ەلدەرىنىڭ ورتاق قۋانىشىنا اينالدى دەۋگە بولادى. تۇركيا ەلىنىڭ تەلەارنالارىندا «ياساۋي ىزىمەن» جوباسى ناتيجەسىندە تابىلعان شەجىرەلەر مەن تاريحي مۇرالار جايلى كورسەتىلگەن حابارلار ەلدە ەرەكشە قوزعالىس تۋدىردى. اتالعان جوبا ءارى قاراي اۋقىمدى تۇردە جۇزەگە اسۋىنا قولداۋ كورسەتۋ ءۇشىن ءبىز ءوز ۇسىنىسىمىزدى بىلدىرەمىز. جوباعا اتسالىسۋ ءبىزدىڭ دە پارىزىمىز», دەدى يسمايل گيۋرلەك مىرزا.
سونىمەن قاتار بولاشاقتا تۇرىك ىنتىماقتاستىق جانە ۇيلەستىرۋ اگەنتتىگى جاڭادان تابىلىپ جاتقان شەجىرەلەردىڭ تۇپنۇسقاسىن تولىقتاي اۋدارۋعا, كەيبىر جادىگەرلەردى رەستاۆراتسيالاپ, زاماناۋي ۇلگىدە ەلەكتروندى كىتاپ ەتىپ شىعارۋعا قولداۋ كورسەتپەك.
كەزدەسۋ بارىسىندا «ياساۋي ىزىمەن» جوباسىنىڭ جۇمىسىن ارتتىرۋعا باعىتتالعان ءىس-ارەكەتتى ۇيلەستىرۋ, عىلىمي جوبا اياسىندا انىقتالعان, تابىلعان تاريحي قۇندى ماتەريالداردى ناسيحاتتاۋ, تۇركى دۇنيەسىنە كەڭىنەن تاراتۋدى دامىتۋ پەرسپەكتيۆالارى قاراستىرىلدى.
وسى ماقساتتا, الداعى جىلدارى اتقارىلۋى ءتيىس جۇمىس جوسپارى بەلگىلەندى. اتاپ ايتساق, بولاشاقتا – ياساۋي ەسىمىمەن بايلانىستى ءدىني جانە تاريحي-ەسكەرتكىشتەردى ناسيحاتتاۋ, بىرلەسكەن ەكسكۋرسيالىق مارشرۋتتار قۇرۋ, قوس تاراپ ءوز قۇزىرەتى شەگىندە تۋريستىك ءيميدجدى قالىپتاستىرۋ, مۋزەي سالاسى ماماندارىنىڭ تاجىريبە الماسۋىنا جانە كاسىبي بىلىكتىلىگىن ارتتىرۋىنا باعىتتالعان ءىس-شارالارعا قولداۋ كورسەتۋ, تاريحي-مادەني قارىم-قاتىناستى نىعايتۋ سىندى كوپتەگەن ماسەلە قاراستىرىلعان.
تۇرىك باۋىرلار ەكى كۇنگە سوزىلعان رەسمي ساپار بارىسىندا قوجا احمەت ياساۋي كەسەنەسىنە زيارات ەتىپ, ورتاعاسىرلىق ساۋران قالاشىعى مەن ۇكاشا اتا كەسەنەسى جانە قۇدىعىمەن تانىستى.
