وكىنىشكە قاراي, وتكەن تاۋلىك ارالىعىندا وبلىس دارىگەرلەرىنىڭ كومەگىنە جۇگىنگەن 240 ادامنان كوروناۆيرۋس انىقتالعان. سونىڭ ىشىندە تالدىقورعان قالاسىندا 42 جاعداي تىركەلسە, تالعار اۋدانىندا 30 ناۋقاس, ەڭبەكشىقازاق اۋدانىندا 28 ادام ىندەت جۇقتىرعان ەكەن. ال ىلە جانە ۇيعىر اۋداندارىنىڭ ارقايسىسىندا 21 ادامنان ىندەت بەلگىسى تابىلسا, قاراساي اۋدانىندا 20, جامبىل اۋدانىندا 18, تەكەلى قالاسىندا 16, پانفيلوۆ اۋدانىندا دا 15 جاعداي تىركەلىپتى. سونداي-اق الاكول اۋدانىندا 8 ناۋقاس, كوكسۋ اۋدانىندا 6 ناۋقاس, كەربۇلاق جانە سارقان اۋداندارىندا 4 ناۋقاسقا مەديتسينالىق كومەك كورسەتىلسە, ەسكەلدى اۋدانىندا 3 جاعداي, اقسۋ اۋدانى مەن قاپشاعاي قالاسىندا دا 2 جاعدايدان انىقتالعان.
جالپى, وبلىس اۋرۋحانالارىندا 2 612 ادام كوروناۆيرۋسقا قارسى ەم قابىلداپ جاتىر ەكەن. ولاردىڭ ىشىندە 52 ناۋقاستىڭ جاعدايى اۋىر كورىنەدى. ال ايماقتاعى جۇقپالى اۋرۋلار ستاتسيونارلارىنداعى ورىن سانى 54,5 پايىزعا تولىپ وتىر. جانە دارىگەرلەردىڭ ەمى شيپا بولعان 348 ناۋقاس جۇقپالى ىندەتتەن ايىعىپ شىقتى. سونداي-اق وتكەن ءۇش كۇن ارالىعىندا وبلىستا 9 970 ادام پتر سىناماسىن تاپسىرعان. مۇنان بولەك, ناۋقاستارمەن قارىم-قاتىناستا بولعان 605 ادام انىقتالىپ, ولاردىڭ بارلىعى ءۇي كارانتينىنە الىنىپتى.
ال ايماقتا جۇقپالى ىندەتكە قارسى ەكپە الۋ ناۋقانى قىزىپ تۇر. بۇگىنگە دەيىن ۆاكتسينانىڭ ءى كومپونەنتىن 101 477 ادام سالعىزىپ ۇلگەرسە, تاعى 10 432 ادام ەكپەنىڭ ءىى كومپونەنتىن العان. دەرەك بويىنشا, ۆاكتسينانىڭ ءى كومپونەنتىن وڭىردەگى 17 مىڭنان استام مەديتسينا قىزمەتكەرى سالدىرسا, 25 مىڭعا جۋىق پەداگوگ جانە باسقا دا مىندەتتى ۆانكتسينا الۋشىلار مەن ەرىكتىلەر ەكپە سالدىرعان ەكەن. ال ەكپەنىڭ ءىى كومپونەنتىن 7 298 مەديتسينا مامانى, 2 801 پەداگوگ, سول سياقتى ءتارتىپ ساقشىلارى مەن مەملەكەتتىك قىزمەتشىلەر الىپ وتىر.سونداي-اق بۇگىندە الماتى وبلىسىندا جالپى حالىقتىق ەكپە سالۋ ىسىنە 239 ەگۋ پۋنكتى, 134 كوشپەلى بريگادا جۇمىلدىرىلدى. بۇل ارنايى ورىندار ءبىر كەزەكتە 7 مىڭنان استام ادامدى قابىلداپ, ەكپە سالۋعا قاۋقارلى ەكەن.
ايتپاقشى, ىندەت وشاعى ازايماي وتىرعان ورتالىقتىڭ ءبىر – تەكەلى قالاسى. شاعىن قالادا وتكەن تاۋلىك ارالىعىندا 14 ادامنان كوروناۆيرۋس ينفەكتسياسى انىقتالعان. ال ءساۋىر ايىنىڭ باسىنان بەرى جۇزدەن استام ادام ىندەتكە شالدىققان. قازىر دە قالاداعى اۋرۋحانادا 26 ناۋقاس ەم الۋدا. بىراق كەنشىلەر قالاسىندا ىندەتكە قارسى ەكپە سالدىرۋشىلار سانى ازداۋ بولىپ تۇر. ۆاكتسينا سالدىرعاندار سانى 2 مىڭ ادامنىڭ شاماسىندا. جاقىندا تەكەلىدەگى جاعدايمەن وبلىس اكىمىنىڭ ورىنباسارى باتىرجان بايجۇمانوۆ پەن وبلىستىڭ باس سانيتار دارىگەرى ەرعالي سىدىمانوۆ ارنايى تانىسىپ قايتتى.
– قالا شاعىن بولعانىمەن, جۇقپالى كەسەلدىڭ تارالۋى كۇرت كۇشەيگەندىكتەن تۇرعىندار بۇل ىندەتتەن قۇتىلۋدىڭ جالعىز جولى جاپپاي ۆاكتسينا الۋ كەرەك ەكەنىن ءتۇسىنۋى ءتيىس. قازىر 2 مىڭنان استام تۇرعىن ەكپە العان. اۋرۋحانادا 3 ەگۋ بولمەسى جۇمىس ىستەپ تۇر. ەكپەنى ساقتاۋعا ارنالعان 3 توڭازىتقىش, 5 تەرموكونتەينەر بار. قوسىمشا 3 ەگۋ بولمەسىن اشۋ جوسپارلانۋدا. الداعى ۋاقىتتا تاعى دا 150 مىڭ ادامعا جەتەتىن ەكپە كەلەدى. ونى بىردەن اۋدان-قالالارداعى ەگۋ مەكەمەلەرىنە تاراتامىز, – دەيدى وبلىس اكىمىنىڭ ورىنباسارى.
