سەناتور 1996-2006 جىلدارى بەلگىلى ارحەولوگ زەينوللا ساماشەۆتىڭ جەتەكشىلىگىمەن جۇرگىزىلگەن قازبالاردان كەيىن ءحىV عاسىردا سالىنعان 40 شاقتى بولمەدەن تۇراتىن كەشەندى ساراي عيماراتى اشىلعانىن, الايدا ونى مۋزەيگە اينالدىرۋ جۇمىسى ءالى كۇنگە دەيىن جۇرگىزىلمەگەنىنە نازار اۋداردى. قالا ۇستىندە مۇسىلمان زيراتى جانە ەسكى سارايشىق اۋىلىنىڭ جەكە مەنشىكتەگى جەرلەرى بار ۇيلەر ورنالاسقان.
دەپۋتاتتىڭ ايتۋىنشا, بۇگىندە ەسكى سارايشىق اۋىلىندا 90 ءۇي بار. اۋىل تۇرعىندارىن باسقا جەرگە كوشىرۋ ماسەلەسى ءجيى كوتەرىلىپ جۇرگەنىمەن, ءالى كۇنگە دەيىن ناقتى جۇمىستار قولعا الىنباعان جانە وعان بيۋدجەتتە قارجى دا قاراستىرىلماعان.
«تاريحي ەسكەرتكىشتىڭ نەگىزگى سۇلباسىن ساقتاپ, حالىق يگىلىگىنە اينالدىرۋ كەزەك كۇتتىرمەيتىن ماسەلە. سەبەبى سارايشىق قالاسىنىڭ ورنىن ساقتاۋ مۇمكىندىگى جىلدان جىلعا ازايا بەرەدى. ورتاعاسىرلىق شاھارداعى قازبا جۇمىستارىنا قارجىنى بۇگىنگە دەيىن اتىراۋ وبلىسى اكىمدىگى ءبولىپ كەلدى. ەندىگى جەردە رەسپۋبليكالىق مەكەمە جۇمىسىنا رەسپۋبليكالىق بيۋدجەتتەن جوسپارلى تۇردە قارجى ءبولۋ قاجەت. ايتىلعانداردى ەسكەرە وتىرىپ, سارايشىقتى ساقتاپ قانا قويماي, عىلىمي-زەرتتەۋ جۇمىستارىن جۇرگىزۋ جانە ونى تۋريستىك ايماققا اينالدىرۋ ءۇشىن ارنايى باعدارلاما دايىنداۋدى ۇسىنامىز», دەدى عۇمار دۇيسەمباەۆ.
