ايماقتار • 22 ءساۋىر، 2021

كوز تويمايتىن كوتتەدج قالاشىعى

220 رەت كورسەتىلدى

تۇرعىنداردى باسپانامەن قامتۋ ماسەلەسى جاقىن ارادا كۇن تارتىبىنەن تۇسپەسى انىق. ويتكەنى بۇقارانىڭ ءوز ۇيىنە دەگەن سۇرانىسى ارتپاسا كەمىمەي وتىر. بۇل ءوز كەزەگىندە مەملەكەتتىڭ تۇرعىن ءۇي قۇرىلىسىنا قاتىستى الەۋمەتتىك-ەكونوميكالىق ساياساتىن دا ايگىلەمەك. ال قازىر ەلىمىزدە بۇل باعىتتاعى جۇمىس قىزۋ. ءارى قۇرىلىس قارقىنىنىڭ ءىرى قالالاردان بولەك، ايماقتاردا دا ەرەكشە ەكپىن العانىنا قۋانۋ كەرەك. وسى لەكتە الماتى وبلىسى دا بار.

ماسەلەن، الداعى بەس جىلدا جەتىسۋ جەرىندە 5،4 ملن شارشى مەتر تۇرعىن ءۇي سالىنادى دەگەن جوسپار بار. ياعني وبلىستا الەۋمەتكە قولجەتىمدى تۇرعىن ءۇي كولەمىن ارتتىرۋعا ناقتى كوڭىل بولىنۋدە. اتاپ ايتقاندا، بيىل اتالعان شارشى اۋماقتىڭ 1 ملن شارشى مەتردەن استامىندا قۇرىلىس اياقتالىپ، تۇرعىن ۇيلەر پايدالانۋعا بەرىلەدى ەكەن. سونىڭ ىشىندە «نۇرلى جەر» باعدارلاماسى بويىنشا 191 مىڭ شارشى مەتر باسپانا سالىنۋدا. بۇل جالپى سانى 1 390 پاتەردەن تۇراتىن 37 كوپ قاباتتى ءۇي بولماقشى. سونداي-اق «باقىتتى وتباسى»، «7-20-25»، «شاڭىراق» باعدارلامالارى ارقىلى 1 906 ادام قونىس تويىن تويلايدى.

تۇرعىن ءۇي كەزەگىندەگى ءتىزىم سانى تالدىقورعان قالاسىندا دا جىل وتكەن سايىن تولىعىپ كەلەدى. قازىر وبلىس ورتالىعىندا 16،8 مىڭ ادام باسپانادان ءۇمىتتى ەكەن. ال تالدىقورعاندىقتاردى باسپانامەن قامتۋ ماقساتىندا وتكەن جىلى 137،5 مىڭ شارشى مەتر تۇرعىن ءۇي قولدانىسقا بەرىلسە، بيىل جالپى كولەمى 164 مىڭ شارشى مەتر تۇرعىن ءۇي سالىنۋدا. قازىر قالانىڭ 6، 7 جانە 8 شاعىن اۋداندارىندا 33 كوپ قاباتتى ءۇيدىڭ قۇرىلىسى قىزۋ ءجۇرىپ جاتىر. سونداي-اق قارقىندى قۇرىلىس الاڭىنا اينالعان كوتتەدج قالاشىعىندا تاعى 232 قوس قاباتتى جەكە ءۇي ءوز يەلەرىن تاپپاقشى.

كوتتەدج قالاشىعى دەمەكشى، تالدىقورعانعا كىرە بەرىستەگى ۇلكەن ساۋلەت الاڭىنداعى اقشاڭ­قان ۇيلەردىڭ بوي كوتەرگەنىنە ساناۋلى عانا جىل بولعان. جوسپار بويىنشا اۋماقتا 600-دەن استام كوتتەدج سالىنۋى ءتيىس. بۇگىنگە دەيىن 400-گە جۋىق باسپانانىڭ قۇرىلىسى اياقتالىپ، باسپانا كەزەگىندە تۇرعان ادامدار ءۇيلى بولىپ تا ۇلگەرگەن. مۇنداعى باسپانالار ۇزاق جىل ءۇي كەزەگىن كۇتكەن تۇرعىندار مەن كوپ با­لالى انالارعا، مۇمكىندىگى شەك­تەۋ­لى جاندارعا، الەۋمەتتىك سا­لا قىز­مەت­كەرلەرىنە كەزەڭ-كە­زەڭىمەن بەرىلىپ وتىر. سوڭعى ەكى جىلدا كوتتەدج قالاشىعىندا 35 مىڭ شارشى مەتر ءۇي پايدالانۋعا بەرىلىپ، 386 وتباسى باسپانالى بولدى. ال بىلتىر «تاۋەلسىزدىككە تارتۋ: 30 كۇندە 30 نىسان» اكتسياسى اياسىندا 120 ءۇي يەسىن تاپسا، ونىڭ ىشىندەگى 30 كوتتەدج دەن­ساۋلىق ساقتاۋ سالاسىنىڭ قىز­مەتكەرلەرىنە بەرىلگەن ەكەن.

– 2006 جىلدان بەرى تالدى­قور­عان­دا ءۇي كەزەگىنە تۇ­رىپ كەلدىك. جەكە باسپاناعا قول جەتكىزۋ با­قىتى 2020 جىلى عانا جەتتى. وندا دا ءدال مىناداي ەكى قاباتتى كوتتەدج بۇيىرادى دەپ كۇتپەدىك. ون ءتورت جىل بويى پاتەر جالداپ تۇرعان ماعان بۇل باسپانا حان سارايىنداي كورىندى. قالاشىقتا بارلىق ينفراقۇرىلىم جاسالعان ەكەن. ۇيىمىزگە سۋ، گاز، ەلەكتر جە­لى­لەرى تارتىلعان. ەندى جاڭا ءۇي بولعاسىن كەم-كەتىكتەر بولادى. ونى ءۇيدى سالعان قۇرىلىس كومپانياسى رەتتەپ بەردى. ونىڭ ۇستىنە بۇل ۇيگە اي سايىن 8 مىڭ تەڭگە عانا تولەيمىن، – دەيدى كوتتەدج قالاشىعىنىڭ تۇرعىنى ينديرا مۇقامەتقاليەۆا.

بۇل كوتتەدج قالاشىعى بار­لىق ينفراقۇرىلىممەن قام­تىل­عان، الەۋمەتتىك نىساندارى بار جەكە اۋدان رەتىندە دامىپ كەلەدى. قازىر اۋماقتاعى سپورت الا­ڭىنىڭ قۇرىلىسى اياقتالۋعا تاياۋ، وندا فۋتبول، ۆولەيبول، باسكەتبول الاڭدارى بولادى. ال جىل سوڭىنا دەيىن كوتتەدج قا­لاشىعىنىڭ اۋماعىندا 900 ورىندىق جاڭا مەكتەپ پەن 300 ورىندىق بالاباقشا قۇرىلىسى اياقتالىپ، ىسكە قوسىلماقشى.

جالپى، بۇگىندە وبلىس بو­يىنشا پاتەردەن ءۇمىتتى 51،8 مىڭ ادام كەزەكتە تۇر ەكەن. ال بىلتىر 2 395 وتباسى تۇرعىن ۇيمەن قامتىلعان. بۇل ساناتتا كوپ بالالى جانە الەۋمەتتىك جاعىنان قورعالماعان توپقا كىرەتىن 1 258 وتباسى بار.

 

الماتى وبلىسى

 

سوڭعى جاڭالىقتار

ارداگەرلەر ازايىپ بارا جاتىر...

قازاقستان • بۇگىن، 19:00

مەرەكە كۇندەر جاڭبىرلى بولادى

اۋا رايى • بۇگىن، 16:00

فۋتبول: «چەلسي» فينالعا شىقتى

فۋتبول • بۇگىن، 15:01

اممانعا اتتاندى

سپورت • بۇگىن، 14:10

قازاندا كۇش سىناسۋدا

سپورت • بۇگىن، 13:40

شەت ەلدەگى قازاق گەنەرالدارى

قازاقستان • بۇگىن، 11:54

قادىر ءتۇنىنىڭ قاسيەتى

رۋحانيات • بۇگىن، 08:10

ەرلىك پەن پاتريوتيزم مەكتەبى

قازاقستان • بۇگىن، 08:06

قارۋلى كۇشتەرىمىز وسىلاي قۇرىلعان

قازاقستان • بۇگىن، 08:05

ۇقساس جاڭالىقتار