اعاش وتىرعىزۋدىڭ قىر-سىرىنا قانىق مەكەمە ماماندارى توپتاسىپ, ەكولوگيالىق اعارتۋ, رەكرەاتسيا جانە تۋريزم ءبولىمىنىڭ ماماندارىنىڭ ۇيىمداستىرۋىمەن «پاركتەر شەرۋى-2021» حالىقارالىق اكتسياسىنىڭ اياسىندا وتەتىن «دۇنيەجۇزىلىك اعاش وتىرعىزۋ كۇنى» ءىس-شاراسىمەن بايلانىستىرىلىپ, «قارابۇلاق» اتتى تۇقىمباقتاعى مەكتەپ بولىمىندە جوكە مەن ۇيەڭكى اعاشىنىڭ 500 ءتۇپ كوشەتىن, تەرەكتەن 2 مىڭ ءتۇپ, سونداي-اق ەمەننەن 2500 كوشەت وتىرعىزدى.
وسى اۋقىمدى جۇمىستاردى اتقارىپ, كەلەشەكتە جان-جاقتان تۇسكەن سۇرانىستار بويىنشا ەكپە كوشەتتەرىمەن قامتاماسىز ەتىپ, مەكەمە ءوزىن ءوزى قارجىلاندىرىپ, پايدا كوزىن تاباتىن بولادى. سوندىقتان دا بۇگىن قالانىپ جاتقان, جانىنان سۋ كوزى ۇزىلمەيتىن تۇقىمباقتىڭ ۇلتتىق پارك ءۇشىن ماڭىزى زور.
كەلەشەكتە اۋىلدىق وكرۋگتەردى جانە اۋداندى قامتاماسىز ەتۋ ءۇشىن باسقا دا جەمىس-جيدەك اعاشتارىنىڭ كوشەتتەرىن ءوسىرىپ باپتاۋ جوسپاردا بار. تۇقىمباقتىڭ ورنالاسۋ ەرەكشەلىگىنە بايلانىستى اۋماقتا جەردىڭ قۇرعاق بولۋى ىقتيمالدىلىعىنان تامشىلاتىپ سۋارۋ جۇيەسى قولدانىلادى. ەگىلگەن ەكپە كوشەتتەرىن ساقتاپ قالۋ ءۇشىن سۋارۋ جۇيەسى قاتاڭ باقىلاۋعا الىنادى. بۇل كوشەتتەردىڭ كۇتىمىن جاقسارتۋ ءۇشىن ەگۋ كەزىندە ورگانيكالىق تىڭايتقىشتارمەن بايىتىلعان قي-كون قوسپا دا قولدانىلدى. جۇمىستىڭ باسى تۇقىمباق اۋماعىن قورشاۋ ءۇشىن, سانيتارلىق تازارتۋ ماقساتىندا ارنايى كەسىلگەن اعاش دىڭدەرى قاعىلىپ, تەمىر تورمەن قورشاۋعا الىنعاننان باستالىپ, تۇقىمباقتاعى اتقارىلاتىن جۇمىستارعا قاجەتتى قۇرال-جابدىقتارمەن تولىق قامتاماسىز ەتىلدى.
قاسيەتتى رامازان ايىندا تۋعان ولكە تابيعاتىن كوركەيتۋ, اينالامىزدى جاسىل جەلەككە اينالدىرۋعا جۇدىرىقتاي جۇمىلا بىلگەن ۇجىمىمىزدىڭ قاسىنان تابىلعان قارابۇلاق اۋىلىنىڭ اكىمى ەرجان قايرانوۆ تا حالىق اتىنان جۇرەك جاردى تىلەگىن ءبىلدىرىپ, كاسىپكەر ادىلەت سۋىقباەۆ يگىلىكتى ىسكە قولعابىس ەتتى, «سايات» شارۋا قوجالىعىنىڭ يەسى دە قولۇشىن سوزىپ, جەرگىلىكتى مەملەكەتتىك ينسپەكتورلار اتسالىسىپ, قۇران حاتىم ءتۇسىرىلدى.
قازىر تۇقىمباق جانىنداعى اۋىلدان جالدامالى قىزمەتكە 2 جۇمىسشى الىنعانىن ايتا كەتكەن ورىندى. كەلەشەكتە ماۋسىمدىق كەزەڭدە وننان استام جۇمىسشى قاتارعا تارتىلىپ, بۇل دا اۋدان حالقىنىڭ ءال-اۋقاتىن جاقسارتۋعا سەپتىگىن تيگىزەتىن يگى ءىس بولارى كۇمانسىز.
جاڭىلقان الەمسەيتوۆا,
«تارباعاتاي» مەملەكەتتىك ۇلتتىق تابيعي پاركى عىلىم, اقپارات جانە ەكولوگيالىق مونيتورينگ ءبولىمىنىڭ باسشىسى
شىعىس قازاقستان وبلىسى
