20 ءساۋىر، 2021

قارا جولداعى قاتەر

68 رەت كورسەتىلدى

اقجايىق ايماعىندا سوزىلمالى اۋرۋى بار سىرقاتتاردان گورى، جول-كولىك وقيعاسى سالدارىنان كوز جۇمعان جانە اۋىر جاراقات العان ادامدار سانى كوبىرەك. مۇنداي كوڭىل قۇلازىتاتىن ستاتيستيكانىڭ ايتارلىقتاي وزگەرە قويماعانى وكىنىشتى-اق.

ايتالىق، ءوڭىر اۋماعىندا ورىن العان جول-كولىك وقيعالارىنىڭ باسىم بولىگى رەسپۋبليكالىق ماڭىزى بار اتىراۋ-ورال اۆتوجولىنىڭ بويىندا بولعانىن كورسەتەدى. اتالعان تاس جولدىڭ قۇرىلىسى وتكەن عاسىردىڭ اياعىندا باستالعان. 2001 جىلى داۋىلپاز اقىن ماحامبەتتىڭ تۋعانىنا 200 جىل تولۋىنا وراي اتىراۋ قالاسىنان ماحامبەت اۋدانىنىڭ ورتالىعىنا دەيىنگى تراسسانىڭ العاشقى الپىس شاقىرىمدىق بولىگى پايدالانۋعا بەرىلگەنى دە ۇمىتىلعان جوق. بۇدان ءارى ۇزىندىعى 500 شاقىرىمدى قۇرايتىن رەسپۋبليكالىق دەڭگەيدەگى جول قۇرىلىسى ورال قالاسى تۇسىنان باستالىپ، ءۇش-ءتورت جىلدىڭ ىشىندە تۇيىسكەن ەدى. تراسسانىڭ اتى – تراسسا. بەلگىلى ءبىر ۋاقىت ارالىعىندا كۇردەلى جوندەۋ جۇرگىزىلمەسە، كۇيى قاشاتىنى ايتپاسا دا تۇسىنىكتى.

ايتسە دە، ۇزاق جىلدار بويى مۇنداي ءىستىڭ قولعا الىنباي كەلگەنىنە نە دەۋگە بولادى؟ «QazAvtoJol» ۇك» اق بقو فيليالى ديرەكتورىنىڭ ورىنباسارى ەلدار سادىقتىڭ ايتۋىنشا، ورال-اتىراۋ اۆتوجولىنا 15 جىلدان بەرى جاڭعىرتۋ جۇمىستارى جۇرگىزىلمەپتى. وسى ۋاقىتتىڭ ىشىندە مۇنداعى كولىك اعىنى 4-5 ەسە وسكەن. سوندا بۇل ءىس قاي كەزدە اتقارىلماق؟

قازىرگى كەزدە جوبالاۋ-سمەتالىق قۇجاتتاردى ازىرلەۋ قامى قولعا الىنىپ، كونكۋرس جاريالانعان. كوڭىلگە ءبىر مەدەۋ تۇتارلىعى، الداعى 2022 جىلى ورال-اتىراۋ اۆتوجولىنىڭ 189-492 شاقىرىم ۋچاسكەسىندە قۇرىلىس-مونتاج جۇمىستارىن باستاۋ جوسپارعا ەنگىزىلىپتى.

اۆتوتراسساعا كۇردەلى جوندەۋ جۇرگىزۋ ءىسى بار دا، ونى جىل بويىنا كۇتىپ ۇستاۋ مەن پايدالانۋ مەرزىمىن ۇزارتۋ دەگەن ماسەلە بار. بۇل مىندەت رەسپۋبليكادا «قازاقاۆتوجول» جشس-نا جۇكتەلگەن.

بۇگىندە باتىس قازاقستان وبلىسى اۋماعىنداعى رەسپۋبليكالىق اۆتوجولدار جەلىسىنىڭ ۇزىندىعى 1 414 شاقىرىمدى قۇرايدى. قازىرگى كەزدە ونىڭ 248 شاقىرىمدىق بولىگى كۇردەلى جوندەۋدەن وتكىزىلۋدە. قالعان 1 176 شاقىرىم اۆتوجولدى كۇتىپ ۇستاۋ «قازاقاۆتوجول» جشس باتىس قازاقستان وبلىستىق فيليالىنىڭ قۇزىرەتىنە بەرىلگەن.

ولار وسى مىندەت ۇدەسىنەن شىعا الدى ما؟ بۇل ساۋالعا بىرجاقتى جاۋاپ بەرۋ قيىن. ەڭ الدىمەن العا قويىلعان تالاپتاردىڭ ءمىنسىز ورىندالۋىنا بىرقاتار تابيعي جانە تەحنوگەندىك فاكتور تەرىس اسەرىن تيگىزگەن. سونىڭ ىشىندە بيىلعى قىستا اتالعان جشس فيليالىنىڭ ينجەنەر-تەحنيك قىزمەتكەرلەرى بۇرىن-سوڭدى بولماعان قاتال سىنمەن بەتپە-بەت كەلگەن ەدى. اتاپ ايتقاندا، قىس كەزىندەگى اۋا رايىنىڭ قۇبىلمالىلىعى، كوزدى اشتىرماي، ۇيىتقي سوققان بوران مەن ايازدى كۇندەردىڭ الماسىپ كەلۋى، ال كەلەسى كۇنى اۋا رايىنىڭ كۇرت جىلىنىپ، كوپ كەشىكپەي قايتادان تەمپەراتۋرانىڭ تومەندەۋى ەداۋىر قيىندىق تۋعىزعان. اتالعان فاكتور «قازاقاۆتوجول» جشس-نىڭ قارقىندى ءىس-قيمىل تانىتۋىنا تەجەۋ سالىپ، پايدا بولعان مۇزداقتاردى تەگىستەۋگە، قۇم-تۇز قوسىلعان قوسپالاردى سەبۋگە كەدەرگى كەلتىرگەن.

بيىل اقپان ايىنىڭ 22-ءسى جانە 26-سى كۇندەرى ورال-اتىراۋ اۆتوتراسساسى بويىندا جان تۇرشىكتىرەر ۇلكەن جول-كولىك وقيعاسى بولعان ەدى. مۇنىڭ العاشقىسىندا التى ادام قازا تاپسا، ەكىنشى جاعدايدا ەكى ادام كوز جۇمعان. وسى قايعىلى وقيعالارعا بايلانىستى  ۆەدومستۆوارالىق كوميسسيا قۇرىلىپ، ءتيىستى تەكسەرۋ جۇمىستارى جۇرگىزىلگەن كەزدە اپاتتى جاعداي «QazAvtoJol» ۇك» مەن «قازاقاۆتوجول» جشس فيليالدارى جۇرۋگە رۇقسات ەتپەگەن جابىق ۋچاسكەدە ورىن العانى بەلگىلى بولدى. دەگەنمەن دە سوناۋ توقسانىنشى جىلداردىڭ اياق كەزىندە باستالعان اتىراۋ-ورال اۆتوجولىنىڭ ەنى وتە تار، ەكى باعىتتان قاراما-قارسى جۇرەتىن جۇك كولىكتەرى قاتارلاسا قالعان جاعدايدا سىعىلىسىپ، ءبىر-بىرىنە جاناسىپ ارەڭ وتەدى. مىنە، بۇل جول-كولىك وقيعاسىنىڭ ءجيى ورىن الۋىنا سەبەپشى. ءارى جايىق بويىن جاعالاي تارتىلعان تراسسادا يرەك-يرەك كۇرت بۇرىلىستاردىڭ كوپ بولۋى دا جۇرگىزۋشىلەرگە قاۋىپتى. بۇل فاكتورلار جولداردى جاڭعىرتۋ جۇمىستارىن جوبالاعان كەزدە مۇقيات ەسكەرىلۋى قاجەت.

قىس كەزىندە اۆتوجولدى كۇتىپ-باپتاپ ۇستاۋ ءۇشىن مەردىگەر ۇيىمدار قاجەتتى تەحنيكامەن تولىق قامتاماسىز ەتىلۋى كەرەك. مىسالى، «قازاقاۆتوجول» جشس-نىڭ باتىس قازاقستان وبلىسى فيليالىندا قولدا بار تەحنيكا سانى قاجەتتى مولشەردەن الدەقايدا از. اتالعان مەردىگەر كاسىپورىننىڭ ديرەكتورى ءادىل يساتاەۆتىڭ ايتۋىنشا، مۇندا قىسقى جۇمىستاردى اتقارۋعا لايىقتالعان تەحنيكانىڭ سانى 49 بىرلىكتى قۇرايدى. ال الدىن الا جاسالعان ەسەپتەر بيىلعى قىس كەزىندە جشس-عا 84 تەحنيكا كەرەكتىگىن كورسەتكەن. سونىڭ ىشىندە قار مەن مۇزدى تازارتۋ جانە كوكتايعاق سالدارىن ازايتۋ ماقساتىندا قولدانىلاتىن، جولعا تۇز ارالاس قۇم سەبەتىن ارنايى تەحنيكانىڭ جەتكىلىكسىزىگى دە ۇجىمنىڭ قىسقى ماۋسىمدا ساپالى جۇمىس اتقارۋىنا كەدەرگى كەلتىرگەن. كاسىپورىن جەتەكشىلەرى وزدەرىندە جوق تەحنيكانى وزگە وندىرىستىك ۇيىمداردان جالعا الۋعا ءماجبۇر بولعان.بۇدان شىعاتىن ءتۇيىن بىرەۋ-اق. قازىردەن باستاپ مەردىگەر مەكەمەنى قاجەتتى تەحنيكامەن قامتۋ ءىسى قولعا الىنۋى ءتيىس. «QazAvtoJol» ۇك مەن «قازاقاۆتوجول» جشس-نىڭ ورتالىق اپپاراتى بۇل ماسەلەنىڭ شەشىمىن بىرلەسىپ ويلاستىرسا، بۇدان تەك ۇتارى انىق. ال ازىرشە فيليالعا تەك 3 متز تراكتورى عانا الىنىپتى. مۇنداي جاعدايدا مەردىگەر مەكەمەنىڭ ماتەريالدىق-تەحنيكالىق الەۋەتىن كوتەرۋ ءىسى كەشەۋىلدەي بەرمەسىنە كىم كەپىل؟! قىسى-جازى ءبىر تىنىم تاپپاي، دالادا جۇمىس ىستەيتىن «قازاقاۆتوجول» جشس فيليالىنىڭ مەحانيزاتورلارى مەن جۇرگىزۋشىلەرىنىڭ جانە وزگە دە قاراپايىم سالا جۇمىسشىلارىنىڭ ورتاشا ايلىق جالاقىسى 120 مىڭ تەڭگەدەن اسپايتىندىعى دا ويلاندىرۋى ءتيىس. بۇگىنگى ولشەممەن قاراستىرعاندا، بۇل وتە تومەن جالاقى.

جول-كولىك وقيعاسىن ازايتۋ مەن ونى بولدىرماۋ ىسىنە كەشەندى كوزقاراس قالىپتاستىرۋ قاجەت-اق. ورتاق ماسەلەنى شەشۋگە جول قۇرىلىسى مەن مەردىگەر ۇيىمدار ماماندارى، پوليتسيا ورگاندارى جانە جول اكتيۆتەرىنىڭ ۇلتتىق ساپا ورتالىعى جۇمىلا كىرىسسە، ناتيجەسى دە كوپ كۇتتىرمەسى انىق.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار