جوڭعار الاتاۋى مۇتپ عىلىم, اقپارات جانە مونيتورينگ ءبولىمىنىڭ قىزمەتكەرلەرى پارك اۋماعىنا فوتو-تۇزاقتار قۇرۋ ارقىلى تاۋتەكەلەردىڭ تارالۋ اۋماعىنا, ماۋسىمدىق قۇبىلىستارىنا تۇراقتى باقىلاۋلار جۇرگىزۋدە.
2020 جىلى پارك اۋماعىندا تاۋتەكەلەردى تۇراقتى ەسەپكە الۋ مارشرۋتتارى ارقىلى ساناق جۇمىستارى ينسپەكتورلىق قۇرمامەن, جانۋارلار الەمىن قورعاۋ جانە سانىن مولايتۋ, عىلىم, اقپارات جانە مونيتورينگ بولىمدەرىنىڭ, فيليالداردىڭ اڭشىلىقتانۋشى-بيولوگ جانە فيليالدىڭ عىلىمي ماماندارىمەن بىرلەسىپ جۇرگىزىلدى. 2020 جىلعى ساناق بويىنشا پارك اۋماعىنداعى سانى 1596 باس.
تاۋتەكە – قۋىس مۇيىزدىلەر تۇقىمداسىنا جاتاتىن جۇپتۇياقتى جانۋار. تەكەلەرىنىڭ دەنە تۇرقى 140 – 167 سم, سالماعى 59 – 82 كگ بولسا, ەشكىلەرى كىشىرەك. ءتۇسى سۇرعىلت, بىركەلكى. قىسقا قاراي ءىرى تەكەلەرىنىڭ جوتاسى مەن موينىندا, قاپتالىندا اق ءتۇستى جولاق پايدا بولادى. تەكەسىنىڭ سەمسەر ءتارىزدى, كولدەنەڭ بۋناقتى, ۇزىندىعى 140 سم-دەي ءمۇيىزى بولادى, ەشكىسىنىڭ ءمۇيىزى 40 سم-دەي. ماۋسىم سايىن تاۋدىڭ باسىنان ەتەگىنە, ەتەگىنەن باسىنا دەيىن اۋىسىپ, قونىس اۋدارىپ وتىرادى.
