«جاقسىلىققا سەنۋ ءۇشىن اۋەلى ءوزىڭ جاقسىلىق جاساي ءبىلۋىڭ كەرەك» دەيتىن ءراۋىشتى, مازمۇندى ءسوز بار. ەل پرەزيدەنتىنىڭ باعالى ۇسىنىسىنان باستاۋ العان وڭ شارۋالار كەڭىنەن قانات جايىپ, جاناشىرلىق شۋاعىن شاشا باستادى. ۇلى ءىستىڭ ۇلاعاتىنان بۋراباي باۋرايىن جايلاعان جالپاق جۇرت تا شەت قالعان جوق. ەل قامىن جەگەن ەرىكتىلەر الەۋمەتتىك جاعىنان از قامتىلعان توپتاردى, كۇنى كىسىگە قاراپ قالعان قارتتاردى, مۇمكىندىگى شەكتەۋلى جانداردى ەلەپ-جەبەپ, دەرت بارىنشا بەلەڭ الىپ, كۇشىنە ءمىنىپ تۇرعان تۇستا قامقورلىق كورسەتۋ شارالارىن تىڭعىلىقتى جۇزەگە اسىردى. سول كەزدە قورعانىس قۇرالدارىنىڭ قاسقالداقتىڭ قانىنداي تاپتىرماي كەتكەنى ءمالىم. تالماۋ تۇستى تاپ باسقان ەرىكتىلەر الدىمەن حالىقتىڭ ەسىنە سالىپ, جامان تۇماۋدىڭ شەڭگەلىنەن قالاي امان قالۋدى ۇعىندىراتىن ەسكەرتپەلەر جازىلعان پاراقشالار تاراتتى. مەديتسينالىق قورعانىس قۇرالدارىمەن دە مولىنان قامتاماسىز ەتتى. اۋدانداعى قاۋقارلى, ءىرى كاسىپورىن باسشىلارىمەن كەلىسسوزدەر جۇرگىزە وتىرىپ, اۋىرتپالىقتى ەڭسەرۋ ولار ءۇشىن دە پارىز ەكەندىگىن جەتكىزىپ, قايىرىمدىلىق جاساۋعا باعىتتادى. جينالعان قاراجاتتىڭ ءبىراز بولىگى ازىق-تۇلىك سەبەتتەرىن دايىنداۋعا جۇمسالدى. جامان تۇماۋدان جاسقانىپ قارعا ادىم جەر اتتاپ شىعا الماي وتىرعان قارتتارعا بىرسىدىرعى قامقورلىق جاسالىپ, ءتورت قۇبىلاسىن تەڭەستىردى.
ەرىكتىلەر ء«بىز بىرگەمىز», ء«بىز بولماساق, كىم؟», «قايىرىمدى كورشىلەر» ءتارىزدى الەۋمەتتىك اكتسيالار ۇيىمداستىردى. كارانتين كەزىندە 600-دەن استام وتباسىعا جالپى كولەمى 9 ملن تەڭگەگە تاياۋ كومەك كورسەتىلدى. جالعىزباستى قارتتارعا كۇن سايىن ىستىق تاماق جەتكىزىپ, مەديتسينالىق بەتپەردەلەر تەگىن تاراتىلدى. وسى ورايدا, وبلىستىق «LIDER.KZ ەرىكتىلەر قوزعالىسى» قوعامدىق بىرلەستىگى اۋداندا جاقسىلىق شاراپاتى مول ءىستى ۇيىمداستىرىپ, دامىتۋعا بەلسەندى كومەك كورسەتتى. ەل ءۇشىن جاسالاتىن ەرەن ءىستىڭ ۇلگىسىن كورسەتكەن ەرىكتىلەر بۇلاندى, بۋراباي اۋداندارى مەن كوكشەتاۋ قالاسى اراسىندا جولاۋشىلاردى تەگىن تاسىمالداۋدى ۇيىمداستىردى. نۇر-سۇلتان قالاسىنان 30 ينفراقىزىل تەرمومەتر مەن 200 حيميالىق قورعانىس كوستيۋمىن, 3600-گە جۋىق مەديتسينالىق بەتپەردە جەتكىزىپ بەردى. وعان قوسا سوزىلمالى سىرقاتى بار, ەمحانادا تىركەلگەن 120 ادامعا قاجەتتى ءدارى-دارمەكتەرىن تابىس ەتتى.
كارانتين كەزىندە ءدارى-دارمەكتىڭ قىمباتتاپ كەتكەنى دە بەلگىلى. قوزعالىس مۇشەلەرى باعانىڭ تۇراقتى, قولجەتىمدى بولۋىن ۇدايى قاداعالادى. جاساندى تاپشىلىققا جول بەرمەۋ ءۇشىن قالاداعى ءدارىحانالاردىڭ باعاسىنا ءجيى مونيتورينگ جۇرگىزىپ وتىردى. قالا مەكتەپتەرىندە سانيتارلىق-ەپيدەميالىق تالاپتاردىڭ ساقتالۋىن دا كوزدەن تاسا ەتكەن جوق. ۇرەي مەڭدەگەن وسى ءبىر كەزدە الدەبىر سەبەپتەرمەن جوعالىپ كەتكەن ادامداردى ىزدەستىرۋگە دە ات سالىستى.
ۆولونتەرلىق جوبالاردىڭ شاعىن گرانتتارى بايقاۋىنىڭ قورىتىندىسى بويىنشا 300 مىڭ تەڭگەنىڭ گرانتىن ۇتىپ الدى. وسى جوبانىڭ ناتيجەسىندە توتەنشە جاعدايلار ساتىندە جەدەل ارەكەت ەتەتىن شتاب جۇمىسى جولعا قويىلدى. بەرىلگەن وتىنىمدەرگە سايكەس تەرموس, ارقيلى كەۋدەشەلەر, ءدارى قوبديشالارى ءتارىزدى قاجەتتى زاتتار ساتىلىپ الىندى. جيىرماعا جۋىق مۇقتاج بالاعا «مەكتەپكە جول» قايىرىمدىلىق اكتسياسى شەڭبەرىندە كومەك كورسەتىلدى.
بۋراباي باۋرايىنداعى بەرەكەلى شارۋا ەل ىشىندە قايىرىمدى جانداردىڭ كوپ ەكەنىن, وسىنداي قيىن ساتتە توپتاسا بىلەتىندىگىن كورسەتىپ بەردى.
اقمولا وبلىسى,
بۋراباي اۋدانى
