ايماقتار • 18 ءساۋىر، 2021

قاسيەتتى ايدا قايىرىمدىلىق جاسادى

35 رەت كورسەتىلدى

باتىس قازاقستان وبلىسىنداعى دادەم اتا – جۇماعازى حازىرەت قوعامدىق قورى رامازان ايىندا 50 وتباسىنا قايىرىمدىلىق كومەگىن كورسەتتى دەپ حابارلايدى Egemen.kz.

قازاقستاننىڭ جالپىۇلتتىق كيەلى نىساندارى قاتارىنا كىرەتىن اۋليە جۇماعازى حازىرەت كەسەنەسى – جىل بويى باسىنان ادام ۇزىلمەيتىن زيارات ورنى. كەشەن اۋماعى تولىق اباتتاندىرىلىپ، كەلۋشىلەرگە قىزمەت كورسەتەتىن قوناق ءۇي، نامازحانا، ت.ب. سالىنىپ، تولىق جاعداي جاسالعان. كيەلى مەكەننىڭ شىراقشىسى، «دادەم اتا - جۇماعازى حازىرەت» قوعامدىق قورىنىڭ توراعاسى عاريفوللا جانبوزوۆ ۇنەمى قايىرىمدىلىق شارالارىن ۇيىمداستىرىپ، حالىقتىڭ العىسىن الىپ جۇرەدى. اسىرەسە وتكەن جىلى پاندەميا قىسپاعىندا قالعان اۋىل حالقىنا جۇيەلى كومەك جاسالدى.

- قاسيەتتى رامازان – مەيىرىم مەن قايىرىم ايى عوي. ءبىزدىڭ قوعامدىق قورىمىز جىلداعى ءداستۇر بويىنشا اۋىلداعى از قامتىلعان وتباسىلارعا ءبىر ايلىق ازىق-ت ۇلىك جيىنتىعىن ۇلەستىرۋگە شەشىم قابىلدادىق. الەۋمەتتىك كومەك يەلەرىن اۋىل اكىمدىگى جانىنان قۇرىلعان ارنايى كوميسسيا انىقتادى، - دەيدى عاريفوللا جانبوزوۆ.

قوعامدىق قوردىڭ كومەگىنە سىرىم اۋدانىنا قاراستى شولاقاڭقاتى جانە العاباس اۋىلدىق وكرۋگتەرىندە تۇراتىن 50 وتباسى يە بولدى. ولاردىڭ ارقايسىنا 50 كگ ۇن، 6 كگ ماكارون، 5 كگ كۇرىش، 5 كگ قانت، 5 ليتر وسىمدىك مايى، 1 كگ ءشاي سەكىلدى كۇندەلىكتى تۇرمىسقا ەڭ قاجەتتى ازىق تۇرلەرى جەتكىزىلىپ بەرىلدى. اۋىل ادامدارى قور جەتەكشىسىنە شىنايى العىسىن ايتتى. وسى ءبىر جولعى اكتسيانىڭ وزىندە عانا قايىرىمدى ازامات 700 مىڭداي تەڭگەنىڭ كومەگىن كورسەتكەن ەكەن.

- حالقىمىز «جۇمىلا كوتەرگەن جۇك جەڭىل» دەگەن عوي. كوروناۆيرۋس جاعدايىندا كوپتەگەن وتباسىمىز قيىن جاعدايدا قالعانى راس. سوندىقتان بارىمىزبەن ءبولىسىپ جاتىرمىز. ءبىزدىڭ وسى باستامامىز باسقا دا اۋقاتتى ازاماتتارعا، كاسىپكەرلەرگە ۇلگى بولسا دەيمىز، - دەيدى «دادەم اتا - جۇماعازى حازىرەت» قوعامدىق قورىنىڭ توراعاسى.

سوڭعى جاڭالىقتار

ۇقساس جاڭالىقتار