QazaqGeography رقب باسقارما توراعاسى ورمان نۇرباەۆتىڭ ايتۋىنشا, قازاقستاننىڭ ۇلتتىق ساياباقتارىنا بارۋدى تاڭداعان تۋريستەر سانىنىڭ جىل سايىن ارتىپ كەلە جاتقانىنا قاراماستان, ساياباق ينفراقۇرىلىمىن دامىتۋ جانە وعان ينۆەستيتسيالار تارتۋ قاجەت. الايدا ينۆەستيتسيالاردىڭ ۇزاق مەرزىمدى قايتارىمى جانە ەكولوگيالىق ءتۋريزمدى دامىتۋعا ينۆەستيتسيالاردى قولداۋ تەتىكتەرىنىڭ بولماۋى كوممەرتسيالىق ينۆەستورلاردىڭ قىزىعۋشىلىعىن تومەندەتەدى.
«ەكولوگيالىق ءتۋريزمدى دامىتۋداعى QazaqGeography-ءدىڭ جيناقتالعان سەگىز جىلدىق تاجىريبەسىن جانە بيولوگيالىق الۋان تۇرلىلىكتى ساقتاۋ بويىنشا عىلىمي-زەرتتەۋ جۇمىستارىن ەسكەرە وتىرىپ, بىرلەستىك باسشىلىعى سەرىكتەستەرمەن كەلىسكەننەن كەيىن, ۇلتتىق ساياباقتارداعى كەيبىر جەر تەلىمدەرىن ۇزاق مەرزىمدى باسقارۋ كونكۋرسىنا قاتىسۋعا شەشىم قابىلدادى. QazaqGeography كومانداسى وسى ساياباقتاردى دامىتۋعا جانە بولاشاق ۇرپاق ءۇشىن ەرەكشە قورعالاتىن تابيعي اۋماقتاردىڭ بايلىعى مەن الۋان تۇرلىلىگىن ساقتاۋعا بار كۇش-جىگەرىن سالادى», دەدى ول.
قازىر ساياباقتاردىڭ اۋماعىندا قورشاعان ورتاعا اسەردى باعالاۋ (قواب) پروتسەدۋراسى جۇرگىزىلۋدە, بۇل 3 كەزەڭدە وتەدى. ءارتۇرلى عىلىمي ينستيتۋتتاردىڭ ماماندارى (بوتانيكتەر, زوولوگتار, توپىراق زەرتتەۋشىلەر, گەولوگتەر, گەوگرافتار, گيدرولوگتەر جانە ت.ب.), ونىڭ ىشىندە گەوگرافيا جانە سۋ قاۋىپسىزدىگى ينستيتۋتىنىڭ ۇجىمدارى – رەلەف, گەولوگيا, بولۋى مۇمكىن قاۋىپتى تابيعي قۇبىلىستار جانە ت.ب. بولىمدەرى جانە بيوالۋانتۇرلىلىكتى ساقتاۋ جونىندەگى قازاقستان قاۋىمداستىعىنىڭ وسىمدىكتەر مەن جانۋارلار دۇنيەسى, بيوالۋانتۇرلىلىك, انتروپوگەندىك فاكتورلاردىڭ اسەرى جانە ت.ب. بولىمدەرىنىڭ ماماندارى اتالعان اۋماقتارداعى زەرتتەۋ جۇمىستارىن باستادى. جۇمىس بارىسىندا جوسپارلانعان ءىس-شارالاردىڭ نۇسقالارىن ىسكە اسىرۋ كەزىندە قورشاعان ورتا مەن الەۋمەتتىك-ەكونوميكالىق ورتاداعى وزگەرىستەرگە تالداۋ جاسالادى. قورشاعان ورتاعا اسەردى باعالاۋ ناتيجەلەرى بويىنشا قوعامنىڭ كەڭ اۋقىمىن تارتا وتىرىپ, قوعامدىق تىڭداۋلار وتكىزىلەدى. ەكى پارككە ارنالعان بۇل ءراسىم ەكولوگيا, گەولوگيا جانە تابيعي رەسۋرستار مينيسترلىگىنىڭ ورمان شارۋاشىلىعى جانە جانۋارلار دۇنيەسى كوميتەتىمەن كەلىسىلگەن.
ايتا كەتۋ كەرەك, «شارىن» جانە «التىن-ەمەل» مەملەكەتتىك ۇلتتىق تابيعي پاركتەرى QazaqGeography رقب-نىڭ باسقارۋىنا بەرىلمەگەن جانە مەملەكەت مەنشىگىندە قالا بەرەدى. QazaqGeography تۋريستىك-رەكرەاتسيالىق نىساندار سالۋ ءۇشىن ۇلتتىق پاركتىڭ تەك بەلگىلەنگەن جەر تەلىمدەرىن ۇزاق مەرزىمدى پايدالانۋ قۇقىعىن الدى.
«شارىن» مەملەكەتتىك عىلىمي-وندىرىستىك كاسىپورنىنىڭ جالپى اۋدانى – 127 050 گا, بەرىلگەن جەر ۋچاسكەلەرىنىڭ اۋدانى 4,9 گا قۇرايدى, ال سالىناتىن نىسانداردىڭ نەگىزگى كولەمى «شارىن» مەملەكەتتىك ۇلتتىق تابيعي پاركىنىڭ اۋماعىنا كىرەبەرىستىڭ الدىندا ورنالاسقان. سول سياقتى «التىن-ەمەل» مەملەكەتتىك عىلىمي-وندىرىستىك كاسىپورنىنىڭ جالپى اۋدانى 307 مىڭ گا شاماسىندا, ال بەرىلگەن جەر ۋچاسكەلەرىنىڭ اۋدانى – 12,1 گا. جوسپارلانعان نىسانداردى سالۋعا رۇقساتتار زاڭنامادا بەلگىلەنگەن بارلىق راسىمدەردەن وتكەننەن كەيىن, قوعامدىق تىڭداۋلار مەن قورشاعان ورتاعا اسەرى تۋرالى ساراپتامالىق قورىتىندىلاردى العاندا عانا بەرىلەدى. بۇل تۋرالى مىندەتتى تۇردە حابارلانادى. بەلگىلەنگەن پروتسەدۋرالار كەزىندە تۇجىرىمداماسى, قۇرىلىستىڭ ۋاقىتى جانە وبەكتىلەردىڭ جوسپارلانعان وتەلۋى, ونىڭ قورشاعان ورتاعا اسەرى, جەرگىلىكتى تۇرعىندار ءۇشىن اشىلعان جۇمىس ورىندارى سانى, سالىق جانە باسقا ءتيىستى اقپارات پەن قۇجاتتار ۇسىنىلادى.
ۇزاق مەرزىمدى پايدالانۋ قۇقىعىنىڭ بەرىلۋى پارك اۋماعىنا كىرۋ نەمەسە ساياحاتتاۋ ءۇشىن تولەنەتىن كۇنىنىڭ ۇلعايۋىنا اسەرىن تيگىزبەيدى. جوسپارلانعان تۋريستىك-ساۋىقتىرۋ ورىندارىنا بارۋ جانە ولاردى پايدالانۋ ساياباققا كەلۋشىلەردىڭ قالاۋى بويىنشا عانا بولادى. تۋريستىك-رەكرەاتسيالىق وبەكتىلەردى سالۋعا تارتىلعان ينۆەستيتسيالارعا رەسپۋبليكالىق جانە جەرگىلىكتى بيۋدجەتتەردەن قاراجات پايدالانىلمايدى, بارلىق قاراجات كوزى – جەكە ينۆەستيتسيالار. وسى وبەكتىلەردى پايدالانۋدان تۇسكەن كىرىستەر QazaqGeography رقب بيولوگيالىق الۋانتۇرلىلىكتى ساقتاۋ جانە قازاقستانداعى ەكولوگيالىق ءتۋريزمدى دامىتۋ سالالارىندا زەرتتەۋلەر جۇرگىزۋ ءۇشىن جۇمسالادى.
ايتا كەتەلىك, QazaqGeography رەسپۋبليكالىق قوعامدىق بىرلەستىگى 2013 جىلى 16 قازاندا قۇرىلدى. QazaqGeography بىرلەستىگىنىڭ ماقساتى – گەوگرافيا جانە ونىمەن بايلانىستى عىلىمداردى زەرتتەۋ جانە تانىمال ەتۋ; عىلىمدى, ءبىلىمدى جانە قورشاعان ورتانى قورعاۋدى ناسيحاتتاۋ; قورشاعان ورتانى قورعاۋ شارالارىنا قاتىسۋ; قازاقستاننىڭ تابيعي, تاريحي جانە مادەني مۇرالارىن تانىمال ەتۋ; قازاقستانداعى ءتۋريزمدى دامىتۋ ءۇشىن ەلىمىزدىڭ بىرەگەي تاريحي-مادەني جانە گەوگرافيالىق نىساندارىنا نازار اۋدارتۋ. قازىرگى ۋاقىتتا بىرلەستىكتىڭ 11 ايماقتىق وكىلدىگى اشىلعان.
