ەلوردا • 14 ءساۋىر، 2021

بيىل نۇر-سۇلتاندا 7 مىڭ ۇلەسكەر باسپانالى بولادى

12 رەت كورسەتىلدى

نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا بيىل قۇرىلىسى ۇزاققا سوزىلعان بىرنەشە ءۇي قولدانىسقا بەرىلەتىنىن ءمالىم ەتتى، دەپ حابارلايدى Egemen.kz.

«قۇرىلىسى ۇزاققا سوزىلعان ءار نىسان بىرنەشە كوپپاتەرلى تۇرعىن ءۇي كەشەندەرىنەن تۇرادى، بۇل جۇمىس كولەمىن ەداۋىر ارتتىرادى. ال ءار وبەكتىدە جۇزدەگەن ۇلەسكەر بار. بۇگىن «باعىستان» جانە «التىن شار 2» نىساندارىنا باردىم. وندا 1112 ۇلەسكەر باسپانا كۇتىپ وتىر. قابىلدانعان شارالاردىڭ ناتيجەسىندە بۇل ۇيلەردىڭ قۇرىلىسى قايتا باستالدى. دەگەنمەن قۇرىلىس قارقىنى ءتيىستى دەڭگەيدە جۇرگىزىلىپ جاتقان جوق. سوندىقتان ۇيلەردى پايدالانۋعا بەرۋ كەستەسىن جاڭارتۋدى، قۇرىلىس قارقىنىن ارتتىرۋدى تاپسىردىم. بارلىق كەدەرگىلەر الىندى، بىرقاتار ماسەلە شەشىلدى، ەندى قۇرىلىس كومپانياسى جۇمىس قارقىنىن ۇدەتۋ قاجەت. بۇل ەكى تۇرعىن ءۇي كەشەنىنىڭ قۇرىلىسىن بيىل اياقتاپ، پايدالانۋعا بەرۋدى جوسپارلاپ وتىرمىز»، دەپ جازدى اكىم.

ونىڭ ايتۋىنشا، «باعىستان» تۇرعىن ءۇي كەشەنى بويىنشا اۋقىمدى جۇمىستار اتقارىلعان.

«ينۆەستورلاردى تارتىپ، سىرتقى جانە ىشكى ينجەنەرلىك جەلىلەردى ىسكە قوسىپ، «GLB» ءۇي قۇرىلىسى كومبيناتىنىڭ جۇمىسىن قايتا جانداندىردىق. سونداي-اق جول سالىندى، باعدارشامدار ورناتىلدى جانە ت. ب. جۇمىستار قولعا الىندى.«№1، 3» پوزيتسيالاردا ۆيتراجدار، تەرەزەلەر ورناتىلدى، ينجەنەرلىك جەلىلەر تارتىلدى (سۋ، ەلەكتر، جارىق، كارىز). «№1» پوزيتسيا بويىنشا جۇمىسشىلار ىشكى ارلەۋگە كىرىستى. وسى ايدا اتالمىش پوزيتسيا بويىنشا كىلتتەردى بەرۋدى تاپسىردىم. ال قالعان پوزيتسيالاردى وسى جىلدىڭ سوڭىنا دەيىن اياقتاۋدى تاپسىردىم. اۋا رايى جاقسارىپ كەلەدى، سوندىقتان اۋماقتى اباتتاندىرۋعا كىرىسۋدى تاپسىردىم.

«GLB» ءۇي قۇرىلىسى كومبيناتىنىڭ ماسەلەسىن شەشۋ «التىن شار» تۇرعىن ءۇي كەشەنىنىڭ قۇرىلىسىن قايتا جانداندىرۋعا كومەكتەستى. الدىمەن «التىن شار 2»، سودان كەيىن «التىن شار 3» كەشەنىن تاپسىرامىز.

ۇقك نەسيە بەرۋشىلەر مەن كاسىپورىن قىزمەتكەرلەرى الدىندا شامامەن 600 ملن تەڭگە قارىزى بولعان. مەملەكەت قابىلداعان شارالاردىڭ ارقاسىندا قارىزدار وتەلىپ، زاۋىتتىڭ جۇمىسى قايتا جانداندى. بۇل شارالاردىڭ بارلىعى ۇلەسكەرلەرگە كوپتەن كۇتكەن پاتەرلەرىن تاپسىرۋ ءۇشىن قابىلداندى. سونىمەن قاتار ۇقك الەۋمەتتىك تۇرعىن ءۇي قۇرىلىسىنا دا قاتىسىپ جاتىر.

مەملەكەت باسشىسىنىڭ تاپسىرماسى بويىنشا ۇزاق قۇرىلىستار بويىنشا جۇيەلى جۇمىستار جۇرگىزىلۋدە. ءبىر جارىم جىل ىشىندە ۇزاق قۇرىلىس سانى ەكى ەسەدەن استام ازايدى. وسى جىلى كوپتەن كۇتكەن پاتەرلەردىڭ كىلتىن تاعى 7 مىڭ ۇلەسكەرگە بەرۋدى جوسپارلاپ وتىرمىز»، دەپ جازدى ەلوردا اكىمى.

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار