«قازگيدرومەت» رمك سقو فيليالىنىڭ مالىمەتىنشە, وڭىردەگى بارلىق سۋ قويمالارىندا سۋ دەڭگەيى كوتەرىلىپ جاتىر. ال كوۆىلنوە ەلدى مەكەنىنىڭ ماڭىنداعى اقانبۇرلىق وزەنىندە مۇز كەپتەلىسى پايدا بولىپ, سۋ دەڭگەيى 40 سم دەيىن ءتۇستى.
مۇز كەپتەلىسى توقسان بي اۋىلىنىڭ ماڭىندا ەسىل وزەنىندە دە بايقالادى. وبلىستاعى يمانبۇرلىق, اقانبۇرلىق, شارىق, قامىساقتى شاعىن وزەندەرىندە سۋ دەڭگەيى كۇننەن-كۇنگە كوتەرىلىپ جاتىر. ءبىر تاۋلىكتە 8-160 سم-گە دەيىن وزگەرگەن. بابىقبۇرلىق وزەنىندە, گۋساكوۆكا اۋىلى ماڭىندا ورنالاسقان گيدروپوستتا ماماندار سۋدىڭ 160 سم-گە دەيىن كوتەرىلگەنىن تىركەگەن.
ۆوزۆىشەنكا ەلدى مەكەنى ماڭىنداعى اقانبۇرلىق وزەنىندە, مۇقىر اۋىلىنىڭ ماڭىنداعى مۇقىر وزەنىندە سەڭ ءجۇرىپ جاتىر. سەرگەەۆكا قالاسىنىڭ ماڭىنداعى ەسىل وزەنىندە مۇز جوق, سۋ دەڭگەيى ءبىر قالىپتى, ارتىق سۋ بوگەنگە جينالۋدا. ساعات 16.00-دەگى جاعداي بويىنشا سەرگەەۆ سۋ قويماسى تاسي باستادى.
ال ع.مۇسىرەپوۆ اۋدانىنداعى توقسان بي ەلدى مەكەنى ماڭىنداعى ەسىل وزەنىندە مۇز ءجۇرىپ جاتىر. ءتۇس ۋاقىتىندا سۋ دەڭگەيى 676 سم جەتكەن. بۇل گيدروپوستتا سۋ دەڭگەيى 9 ساۋىردەن باستاپ عانا كوتەرىلىپ جاتىر. بىلتىر بۇل قۇبىلىس 2 ساۋىردە تىركەلدى. ەسىل وزەنىندە ورنالاسقان گيدروپوستتاردا سۋ دەڭگەيىنىڭ 5 سم-85 سم-گە دەيىن وزگەرگەنىن كورۋگە بولادى. ۇلكەن توراڭعۇل كولىندە دە وزگەرىس بار. كولدىڭ سۋى 1 سم كوتەرىلىپ, 323 سم جەتكەن.
