قازاقستان • 13 ءساۋىر، 2021

اۋىل تۇرعىندارىن باسپانامەن قامتۋعا ارنالعان باعدارلاما قاجەت – سەنات دەپۋتاتى

14 رەت كورسەتىلدى

سەناتتا «تۇرعىن ءۇي-كوممۋنالدىق دامۋدىڭ مەملەكەتتىك باعدارلامالارىن جەتىلدىرۋ جانە ولاردى ىسكە اسىرۋدىڭ كەيبىر ماسەلەلەرى تۋرالى» تاقىرىبىنا ارنالعان دوڭگەلەك ۇستەل ء وتتى. ءىس-شارانى سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ توراعاسى داۋرەن ادىلبەكوۆ جۇرگىزدى، دەپ حابارلايدى Egemen.kz 

دوڭگەلەك ۇستەلدە ءسوز سويلەگەن يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ سوڭعى جىلدارى تۇرعىن ءۇي قۇرىلىسىندا وڭ ديناميكا بايقالىپ وتىرعانىن اتاپ ءوتتى.

«2020 جىلدىڭ قورىتىندىسى بويىنشا ەلىمىزدە 15،3 ميلليون شارشى مەتر تۇرعىن ءۇي سالىندى. ونىڭ قۇرىلىسىنا سالىنعان ينۆەستيتسيا 2019 جىلمەن سالىستىرعاندا 33،6 پايىزعا ءوسىپ، 2 تريلليون تەڭگەنى قۇرادى»، دەدى قايىربەك وسكەنباەۆ.

الايدا، سەنات دەپۋتاتى ءالىمجان قۇرتاەۆ بۇل سالادا مەملەكەتتىك باعدارلامالار ءساتتى ىسكە اسىرىلىپ جاتقانىمەن، ولار ءالى كۇنگە دەيىن اۋىل تۇرعىندارى ءۇشىن قولجەتىمسىز ەكەنىنە نازار اۋداردى.

«جالپى سوڭعى جىلدارى تۇرعىن ءۇي سالاسىنا قاتىستى مەملەكەتتىك باعدارلامالار ءبىرشاما ناتيجەلى ىسكە اسىرىلۋدا. دەگەنمەن، اۋىل تۇرعىندارىن باسپانامەن قامتاماسىز ەتەتىن بولەك باعدارلاما كەرەك. ويتكەنى قازىرگى قولدانىستاعى تۇرعىن ءۇي باعدارلامالارىن اۋىلدا جۇزەگە اسىرۋعا مۇمكىندىك جوق»، دەدى ءالىمجان قۇرتاەۆ.

سونداي-اق، ول جوسىقسىز قۇرىلىس سالۋشىلاردىڭ ۇلەستىك تۇرعىن ءۇي قۇرىلىسىنا قاتىستى زاڭنامانى بۇزۋى وزەكتى پروبلەما ەكەنىن ايتتى. وتكەن ەكى جىلدا وسىنداي 123 كومپانيا انىقتالعان. وسىعان وراي سەناتور بۇل ماسەلەنى شەشۋدىڭ جولىن ۇسىندى.

«قارجى جاعىنان تۇراقسىز كومپانيالار ساپالى جانە ارزان تۇرعىن ءۇي سالامىز دەپ ۋادەنى ءۇيىپ-توگىپ، ءارتۇرلى كووپەراتيۆتەر، وداقتار، جارنالار ارقىلى حالىقتىڭ سالىمدارىن اشىق تۇردە تارتادى. بىراق تۇرعىن ءۇي قۇرىلىسىنىڭ اياقتالۋىنا ەشكىم كەپىلدىك بەرمەيدى. سوندىقتان حالىقتىڭ ۇلەستىك سالىمدارىن تارتۋعا قۇقىلى قۇرىلىس كومپانيالارىنىڭ قاراپايىم، اشىق جانە تۇسىنىكتى رەيتينگىن ازىرلەۋدى ۇسىنامىز. سونىڭ اياسىندا قارجى دەڭگەيى تۇراقتى كومپانيالار ءۇشىن كەپىلدەندىرۋدىڭ قولدانىستاعى تەتىگى ساقتالادى»،  دەدى ءالىمجان قۇرتاەۆ.

سوڭعى جاڭالىقتار

اراق ساتىلمايتىن اۋدان

ايماقتار • 14 مامىر، 2021

ۇقساس جاڭالىقتار