ساياسات • 13 ءساۋىر، 2021

جىگەر جانىعان جۇزدەسۋ

13 رەت كورسەتىلدى

وسىدان تۇپ-تۋرا 60 جىل بۇرىن بايقوڭىر عارىش ايلاعىنان «ۆوستوك-1» كەمەسى اۋەگە كوتەرىلىپ، ادامزات بالاسى العاش رەت عارىش كەڭىستىگىنە كوتەرىلگەن بولاتىن. سودان بەرى 12 ءساۋىردى دۇنيەجۇزىلىك اۆياتسيا جانە عارىشكەرلەر كۇنى رەتىندە اتاپ ءوتىپ كەلەمىز. بيىل دا سولاي. ەلورداداعى ۇلتتىق اسكەري-پاتريوتتىق ورتالىعىندا قازاقستاندىق تۇڭعىش عارىشكەردىڭ اسپان الەمىن باعىندىرعانىنا 30 جىل تولۋىنا وراي «عارىشقا جول» تاقىرىبىندا كەلەلى كەزدەسۋ ۇيىمداستىرىلدى.

نۇر-سۇلتان قالاسى اكىمدىگىنىڭ «استانا جاستارى» كوممۋنالدىق مەم­لەكەتتىك مەكەمەسىنىڭ قولداۋىمەن «جاس سارباز» جاسوسپىرىمدەر اسكەري-پاتريوتتىق قوزعالىسى» رەسپۋب­ليكالىق قوعامدىق بىرلەستىگى ۇيىم­داستىرعان كەزدەسۋگە عارىشكەرلەر تالعات مۇساباەۆ پەن ايدىن ايىم­بەتوۆ قاتىستى. كەزدەسۋ اياسىندا «جاس سارباز» تاربيەلەنۋشىلەرىنىڭ پاتريوتتىق رۋحىن كوتەرىپ، ولاردىڭ وتانعا دەگەن سۇيىسپەنشىلىگىن قالىپ­تاستىراتىن «ەرلىك ساباعى: كىتاپقا جازىلماعان تاريح» تاقىرىبىندا ەرلىك ساباعى قولعا الىندى.

– بۇل ەرلىك ساباعى – قازاق­ستان­نىڭ بۇگىنگى جاستارى، بولاشاق ەل قور­عاندارى ءۇشىن ارنايى ۇيىمداس­تىرىلىپ وتىر. بۇگىن سىزدەر الەمدىك دەڭگەيدە اتى ايگىلى عارىشكەرلەرمەن جۇزدەسىپ وتىرسىزدار. سوندىقتان بۇل كەزدەسۋدىڭ سىزدەرگە بەرەرى مول بولادى دەگەن سەنىمدەمىن. بىلىمدەرىڭىزدى ۇشتاپ، تاجىريبەلەرىڭىزدى شىڭداپ، تاۋ تۇلعالارعا قاراپ بوي تۇزەيسىزدەر دەگەن ويدامىن. وسىنداي كەزدەسۋلەر جىگەرلەرىڭىزدى جانيدى، قا­ناتتارىڭىزدى قاتايتادى. الداعى بيىك بەلەستەردى باعىندىرۋعا ۇل­كەن ۇلەس قوسادى. ارينە عارىش كەڭىستىگىن زەرتتەۋ جۇمىسى ءبىر ورىن­دا تۇرمايتىنى انىق. بالكىم ارالارىڭىزدا بولاشاق ۇشقىشتار، پلانەتاارالىق ساپارلارعا شىعاتىن كەلەشەك عارىشكەرلەر وتىرعان بولۋى مۇمكىن، – دەدى اۆياتسيا گەنەرال-مايورى نۇرلان كاربەنوۆ.

«جاس ساربازدارمەن» كەزدەسۋ بارى­سىندا عارىشكەرلەر اعالىق اق تىلەك­تەرىن جاۋدىرىپ، اقىل-كەڭەس­تەرىمەن، مۇنداي ساپارلاردىڭ ماڭىز­دىلىعىمەن ءبولىستى.

– جاس ساربازدار، سىزدەرمەن كەز­دەسكەنىمە وتە قۋانىشتىمىن. بۇل كۇن مەن ءۇشىن اسا مازمۇندى ءارى ماڭىزدى مەرەكە سانالادى. مەن ءۇشىن عانا ەمەس، بۇكىل الەم ءۇشىن سولاي دەپ سەنەمىن. ويلاپ وتىرسام، وسى كۇنگە دەيىن ءۇش رەت عارىشتا بولىپ، وندا باس-اياعى ءبىر جىلعا جۋىق جۇمىس ىستەپپىن. العاشىندا قازاق ەلىنىڭ وكىلى رەتىندە اۋەگە كوتەرىلسەم، قالعان ەكەۋىندە كوماندير بولىپ جول باستاپ بارعان جايىم بار. ەكيپاج قۇرامىندا ورىس­تار دا، امەريكالىقتار دا، نەمىستەر دە، فرانتسۋزدار دا بولدى. سولاردىڭ اراسىندا قاراپايىم قازاقتىڭ بالاسى بولا تۇرىپ، كوماندير بولعانىما قۋانامىن، – دەيدى اۆياتسيا گەنەرال-لەيتەنانتى، حالىق قاھارمانى تالعات مۇساباەۆ.

ەل سىيلاعان تۇعىرلى تۇلعالار وتكەن كۇندەردەگى ەلەۋلى ەستەلىكتەرىمەن ءبولىسىپ، ورامدى ويلارىن ورتاعا سالدى. وسكەلەڭ ۇرپاقتىڭ كوڭىلىنە سەنىم ۇيالاتىپ، جۇرەگىنە جارىق نۇر شاشا ءبىلدى.

– قىزمەت جولىم اۆياتسيا گەنەرال-مايورى نۇرلان كاربەنوۆپەن بىرگە لۋگوۆويدا باستالدى. ول كەزدە جاس وفيتسەرلەر ەدىك. اسكەري شەنىم – لەي­تەنانت بولاتىن. ال تالعات اعا مۇ­­سا­باەۆ مەنىڭ ۇستازىم بولدى. عا­رىش­كەرلەر توبىمەن بىرگە دايىن­دىقتان ءوتىپ جۇرگەنىمدە وسى تالعات امانگەلدى ۇلى بارلىعىن باسقا­رىپ، جەتەكشىلىك جاسادى. قازىر­گى مەيىرىمدى جۇزىنە «الدانىپ قالماڭىزدار» (كۇلدى). كەرەك كەزىندە قاتال دا قاھارلى، جاۋاپتى بولا بىلەدى. ءبىزدىڭ بەلگىلى ءبىر جەتىستىككە جەتۋىمىزگە دە وسى تالعات اعانىڭ تەمىردەي ءتارتىبى، قاتالدىعى سەبەپ بولدى. وسىلايشا مەن دە عارىشقا اتتانىپ، عىلىمي باعدارلامانى ورىندادىم. تالعات امانگەلدى ۇلىنىڭ عارىشقا ءۇش مارتە ساپارى كەزىندە جاسالعان تاجىريبەلەردى جالعاستىردىق. سونداي-اق قازاق تاعامتانۋ اكادەمياسىنىڭ تاجىريبەلەرى دە جۇيەلى جۇرگىزىلدى. ول باعدارلامانىڭ اتى «داستارقان 6» ەدى. وسىلايشا، ءبىزدىڭ تاعامتانۋ اكادەميامىز عارىش ساپارلارىنا ارنالعان تاعامداردى ازىرلەي ءبىلدى. ياعني سۋبليماتسيالانعان تاعامداردىڭ قاتارىندا ۇلتتىق تاعامدارىمىز دا بولدى، – دەيدى گەنەرال-مايور ايدىن ايىمبەتوۆ.

«جاس سارباز» تاربيەلەنۋشىلەرى عارىشكەرلەردىڭ ءماندى دە ماعىنالى اڭگى­مەلەرىن ەرەكشە ىقىلاسپەن تىڭ­داپ، ولاردىڭ قىزىقتى وقيعالارىمەن دە تەرەڭ تانىسا الدى. كوكەيدە جۇرگەن سۇراقتارىن قويىپ، بەيبىت كۇننىڭ باتىرلارىمەن ەمەن-جارقىن سويلەستى. كەزدەسۋ سوڭىندا قادىرلى مەيماندار ارنايى عارىش كۇنىنە وراي ۇلتتىق اسكەري مۋزەيىندەگى «عارىشقا جول» كورمەسىنىڭ اشىلۋ سالتاناتىنا قاتىستى.

 

سوڭعى جاڭالىقتار

اقىرەتكە دەيىنگى ادالدىق

ونەر • بۇگىن، 10:23

ۇقساس جاڭالىقتار