«ۆەتەرينارلىق قىزمەت نەگىزىنەن ەلدىڭ عالامدىق بيولوگيالىق قاۋىپسىزدىگىنىڭ جالپى جۇيەسىنىڭ ءبىر بولىگى بولىپ تابىلادى. مال دارىگەرلەرىنىڭ بىلىكتىلىگىنىڭ تومەندىگى جانە مامانداردىڭ جەتىسپەۋشىلىگى جانۋارلاردىڭ بويىنداعى جۇقپالى اۋرۋلاردىڭ ادامنىڭ ءومىرى مەن دەنساۋلىعىنا قاۋىپ توندىرۋىنە سەبەپشى بولادى. جوعارى پاتوگەندى قۇس تۇماۋىنىڭ كەنەتتەن پايدا بولعانى ءبارىمىزدىڭ ەسىمىزدە. وسىنداي جاعدايلار ۆەتەرينارلىق قىزمەتتىڭ دارمەنسىزدىگىن كورسەتتى دەۋگە بولادى», - دەدى سەنات دەپۋتاتى مۇحتار جۇماعازيەۆ.
سەناتور قازىرگى ۋاقىتتا ۆەتەريناريالىق ستانتسيالار مەن پۋنكتەردە 440-قا جۋىق مامان جەتىسپەيتىنىن ايتتى. بۇل ماسەلەنى «ديپلوممەن – اۋىلعا» مەملەكەتتىك باعدارلاماسى شەشە الاتىن ەدى. بىراق, دەپۋتاتىڭ پىكىرىنشە, اتالعان باعدارلامادا قويىلعان ماقساتتار ءوز دەڭگەيىندە ورىندالماۋدا جانە اۋىلعا باراتىن جاس ماماندارعا قولداۋ كورسەتۋ جەتكىلىكتى دارەجەدە ىسكە اسپاۋدا.
«ەگەر جاس ماماندارعا جۇمىس ىستەۋگە, اۋىلدا ءومىر سۇرۋگە قاجەتتى جاعداي جاسالسا, مىسالى, قىزمەتتىك تۇرعىن ۇيلەر سالىنسا, الەۋمەتتىك جەڭىلدىكتەر بەرىلسە, ماتەريالدى-تەحنيكالىق بازاسى قامتىلسا, كادر ماسەلەسى ءبىرشاما بولسا دا ءوز شەشىمىن تاپقان بولار ەدى. بۇل ماسەلەدە ۋاكىلەتتى جانە جەرگىلىكتى اتقارۋشى ورگانداردىڭ, وقۋ ورىندارى مەن جۇمىس بەرۋشىلەردىڭ ءىس-ارەكەتتەرى بىرىككەن جاعدايدا عانا بەلگىلى ءبىر جەتىستىكتەرگە قول جەتكىزۋگە بولادى», - دەدى سەناتور.
اۋىل شارۋاشىلىعى مينيسترلىگى وكىلدەرىنىڭ اقپاراتىنا سايكەس ۆەتەرينارلىق قىزمەتتى ودان دامىتۋ ءۇشىن پرەزيدەنتتىڭ تاپسىرماسى بويىنشا 2021-2023 جىلدارعا ارنالعان ۆەتەرينارلىق قىزمەتتى دامىتۋ جانە نىعايتۋ جونىندەگى كەشەندى شارالار ازىرلەنگەن. ولار جانۋارلاردى, جانۋارلاردان الىناتىن ونىمدەر مەن شيكىزاتتى باقىلاۋ, ۆەتەريناريالىق پرەپاراتتاردىڭ اينالىمى, جانۋارلار اۋرۋلارىن بولجاۋ, سونداي-اق ۆەتەريناريا سالاسىنداعى تسيفرلاندىرۋ شارالارىن ىسكە اسىرۋدى كوزدەيدى. بۇل باعدارلاما سالا ماماندارىن دايارلاۋدى جانە قايتا دايارلاۋدى جاقسارتۋعا ءتيىس. كەزدەسۋ بارىسىندا اگرارلىق سەكتورداعى عىلىمي قوعامداستىق وكىلدەرى بىرقاتار ناقتى ۇسىنىستار ايتىپ, سالانى ودان ءارى دامىتۋ تۋرالى ويلارىمەن ءبولىستى. كەزدەسۋ قورىتىندىسى بويىنشا قابىلدانعان ۇسىنىمدار ۇكىمەتكە جولداناتىن بولادى.
