تۇركىستان وبلىستىق پوليتسيا دەپارتامەنتىنە قازىعۇرت اۋدانىنىڭ تۇرعىنى ارىزدانعان. اۋىل تۇرعىنى ءۇش ەر ادام ونى قورقىتىپ, شامامەن ءتورت ميلليون تەڭگە اقشا تالاپ ەتكەنىن ايتتى. اتالعان جايتتى پوليتسيا قىزمەتكەرلەرى سدتبت-عا (بوپسالاۋ) تىركەدى.
قىلمىستىڭ اۋىرلىعىن ەسكەرە وتىرىپ, پوليتسيا دەپارتامەنتى مەن ۇقكد جەدەل بولىمشەلەردىڭ تاجىريبەلى قىزمەتكەرلەرىنەن بىردەن بىرلەسكەن توپ قۇرىلدى. بارلىق قاجەتتى جەدەل-ىزدەستىرۋ ءىس-شارالارى جۇرگىزىلدى, اتقارىلعان جۇمىستار اياسىندا وسى قىلمىسقا قاتىسى بار ادامدار انىقتالدى. ولاردىڭ بارلىعى ۇيىمداسقان قىلمىستىق توپ مۇشەلەرى بولىپ شىقتى. بىرلەسكەن جەدەل ءىس-شارالاردىڭ ناتيجەسىندە تۇرعىلىقتى جەرى بويىنشا توعىز ادام ۇستالدى, ولار قازىعۇرت, كەلەس جانە سارىعاش اۋداندارىنىڭ تۇرعىندارى. كۇدىكتىلەردىڭ تورتەۋى ۇيىمداسقان قىلمىستىق توپتاردىڭ مۇشەلەرى, ال ۇشەۋى بۇرىندارى بۇزاقىلىق, ادامدى ۇرلاۋ جانە تەرروريستىك ارەكەتتى ۇيىمداستىرۋ ماقساتىندا ادامداردى تارتۋ ءۇشىن سوتتالعاندارى انىقتالدى.
قازىرگى ۋاقىتتا تۇركىستان وبلىسى پد تەرگەۋ باسقارماسى وسى ىسكە بايلانىستى تياناقتى تەرگەۋ جۇمىستارىمەن اينالىسۋدا. بۇگىندە تورتەۋى سوتپەن قاماۋعا الىنىپ, بەسەۋى قولحاتتا. كۇدىكتىلەردىڭ ءبىرىنىڭ ءۇيىن ءتىنتۋ كەزىندە جەدەل ۋاكىلدەر نومىرلىك بەلگىسى زاقىمدالعان شولاق مىلتىق پەن مەتالل كاستەتتى تاۋىپ, تاركىلەدى. تەرگەۋشىلەر وقيعانىڭ بارلىق ءمان-جايىن انىقتاپ, قىلمىستىق توپتىڭ باسقا دا قىلمىستارعا قاتىستىلىعىن تەكسەرۋدە.
