قارجى • 08 ءساۋىر، 2021

قارجى رەتتەۋشىسى ميكروقارجىلىق قىزمەتتى ليتسەنزيالاۋ قورىتىندىسىن شىعاردى

18 رەت كورسەتىلدى

2021 جىلعى 1 قاڭتاردان باستاپ قازاقستاندا ميكروقارجىلىق قىزمەتتى ليتسەنزيالاۋ ىسكە قوسىلدى. مقۇ نارىعىن رەتتەۋ بانكتىك ەمەس سەكتورداعى تاۋەكەلدەردى ازايتۋ، ونىڭ اشىقتىعىن ارتتىرۋ ءۇشىن جانە قارجىلىق قىزمەتتەردى تۇتىنۋشىلاردىڭ قۇقىقتارىن قورعاۋ ءۇشىن ەنگىزىلگەن بولاتىن. 2021 جىلعى 1 ناۋرىزداعى جاعداي بويىنشا قر قارجى نارىعىن رەتتەۋ جانە دامىتۋ اگەنتتىگىنە ميكروقارجىلىق قىزمەتتى جۇرگىزۋگە ليتسەنزيا بەرۋ تۋرالى وتىنىشپەن 1 024 كومپانيا جۇگىندى، دەپ جازادى  Egemen.kz.

اعىمداعى جىلعى 1 ساۋىردەگى دەرەكتەر بويىنشا ميكروقارجىلاندىرۋ نارىعىنىڭ 883 سۋبەكتىسى، ونىڭ ىشىندە 178 ميكروقارجى ۇيىمى (بۇدان ءارى – مقۇ)، 542 لومبارد جانە 163 كرەديتتىك سەرىكتەستىك اگەنتتىكتىڭ ميكروقارجىلىق قىزمەتتى جۇزەگە اسىرۋعا ليتسەنزياسىن الدى،  دەپ حابارلايدى مەملەكەتتىك ورگاننىڭ ءباسپاسوز قىزمەتى. ميكروقارجىلىق قىزمەتتى جۇزەگە اسىرۋعا ليتسەنزياسى بار ۇيىمداردىڭ ءتىزىلىمى اگەنتتىكتىڭ رەسمي سايتىندا ورنالاستىرىلعان.   

«وتكەن جىلعى قاراشا ايىندا ءبىز ميكروقارجىلىق قىزمەتتى ليتسەنزيالاۋ قاعيدالارىن بەكىتتىك. قاعيدالاردا بۋحگالتەرلىك ەسەپتى اۆتوماتتاندىرۋعا، باسشى قىزمەتكەرلەردىڭ ءمىنسىز ىسكەرلىك بەدەلى مەن بىلىكتىلىگىنە، مقۇ قاتىسۋشىلارىندا الىنباعان نەمەسە وتەلمەگەن سوتتىلىقتىڭ بولماۋىنا، قىلمىستىق جولمەن الىنعان كىرىستەردى زاڭداستىرۋعا قارسى ءىس-قيمىل سالاسىنداعى اقپاراتتىق جۇيەگە قوسىلۋعا قويىلاتىن تالاپتار، ءۇي-جايلاردىڭ قاۋىپسىزدىك ستاندارتتارى كوزدەلەدى. بۇعان قوسا، ليتسەنزيالاۋ پروتسەسىن جەڭىلدەتۋ ءۇشىن بەلگىلەنگەن تالاپتارعا سايكەستىگىن راستايتىن قۇجاتتار مەن مالىمەتتەر تىزبەسى انىقتالدى. ۋاقىت تىعىزدىعىن ەسكەرە وتىرىپ، قنردا ميكروقارجىلىق ۇيىمدار قاۋىمداستىعىمەن، قازاقستان لومباردتارىنىڭ ۇلتتىق ليگاسىمەن جانە اگروونەركاسىپتىك كەشەننىڭ كرەديتتىك سەرىكتەستىكتەر قاۋىمداستىعىمەن بىرلەسە وتىرىپ، ميكروكرەديتتەۋ نارىعىنىڭ قاتىسۋشىلارىنا ليتسەنزيالاۋدىڭ بارلىق كەزەڭدەرىن ءتۇسىندىرۋ جۇمىسىن جۇرگىزدى. وتىنىشتەردى قاراۋ بەلگىلەنگەن مەرزىمدەردى ساقتاي وتىرىپ جۇرگىزىلدى، ليتسەنزياتتارعا قۇجاتتاردى «ەلەكتروندىق ۇكىمەتتىڭ» ۆەب-پورتالى ارقىلى ەلەكتروندىق تۇردە، سونداي-اق كەڭسە ارقىلى قاعازداعى نۇسقادا ۇسىنۋ مۇمكىندىگى بەرىلدى»، دەيدى اگەنتتىك توراعاسىنىڭ ورىنباسارى نۇرلان ءابدىراحمانوۆ.

مقۇ-نىڭ ورنىقتىلىعىن، ەڭ از ستاندارتتاردى ساقتاۋ ءۇشىن  قارجىلىق، تەحنيكالىق قۇرالدار مەن پەرسونالدىڭ بولۋىن قامتاماسىز ەتۋ ءۇشىن 2019 جىلعى قاراشادا مقۇ-نىڭ جارعىلىق جانە مەنشىكتى كاپيتالدارىنىڭ مولشەرلەرىنە تالاپتار بەلگىلەندى. ءىس-ارەكەتتەگى سۋبەكتىلەر ءۇشىن كاپيتالداردىڭ ەڭ تومەنگى ماندەرىن مقۇ ءۇشىن  30 ملن تەڭگەدەن 100 ملن تەڭگەگە دەيىن، كرەديتتىك سەرىكتەستىكتەر ءۇشىن  10 ملن تەڭگەدەن 50 ملن تەڭگەگە دەيىن، لومباردتار ءۇشىن 10 ملن تەڭگەدەن 70 ملن تەڭگەگە دەيىن كەزەڭ-كەزەڭىمەن 2023 جىلعا دەيىن ارتتىرۋ كوزدەلىپ وتىر. بۇل رەتتە، جاڭادان قۇرىلاتىن ۇيىمدار جارعىلىق جانە مەنشىكتى كاپيتالدارىن جوعارىلاتىلعان ەڭ از ماندەردىڭ دەڭگەيىندە قالىپتاستىرۋعا ءتيىس.

«ليتسەنزيالاۋدى ەنگىزۋ ميكروقارجى نارىعى سۋبەكتىلەرىنىڭ جىلدىق ءتيىمدى سىياقى مولشەرلەمەسىنىڭ شەكتى ماندەرىن ساقتاۋىن باقىلاۋدى قامتاماسىز ەتۋگە، ولاردىڭ زاڭسىز قىزمەت جانە الاياقتىق وپەراتسيالار، قارجى پيراميدالارىنىڭ سحەمالارىن جۇرگىزۋىنە جول بەرمەۋگە جانە وسىلايشا نارىقتان جوسىقسىز ۇيىمداردى شىعارىپ،  تۇتىنۋشىلاردىڭ مۇددەلەرىن قورعاۋعا مۇمكىندىك بەرەدى»، دەپ حابارلادى اگەنتتىك باسشىسىنىڭ ورىنباسارى نۇرلان ءابدىراحمانوۆ.

قنردا-عا بەلگىلەنگەن مەرزىمدە ليتسەنزيا الۋعا ءوتىنىش بىلدىرمەگەن نە ليتسەنزيا الۋدان باس تارتىلعان ءىس-ارەكەتتەگى  ميكروقارجى نارىعىنىڭ ۇيىمدارىنا قاتىستى سوت تارتىبىمەن ماجبۇرلەپ قايتا ۇيىمداستىرۋ نە تاراتۋ جونىندەگى شارالار قابىلداناتىن بولادى.

سوڭعى جاڭالىقتار

ۇقساس جاڭالىقتار