«باق جانە تەلەراديوحابارلارىن تاراتۋ سالاسى قىزمەتكەرلەرى كاسىپوداعىنىڭ توراعاسى رەتىندە شىمكەنت قالالىق پوليتسيا دەپارتامەنتى قىزمەتكەرلەرىنىڭ ورەسكەل ارەكەتتەرىن ايىپتايمىن. زاڭنان اتتاعاندار ءتيىستى جازاسىن الۋى ءتيىس. ارىپتەستەرىمىزگە قۇقىقتىق كومەك قاجەت بولىپ جاتسا كاسىپوداق زاڭگەرلەرى قولداۋعا ءازىر», دەپ جازدى ز. الىپبەك.
وسى ورايدا ول جۋرناليستەرگە جۇدىرىق جۇمسالاتىن ساتتەردىڭ ءجيى كەزدەسەتىنىن اتاپ ءوتتى.
«قازىر كەز-كەلگەن مەكەمە وزىنە ءتيىمسىز بولسا ءتىلشىنى عيمارات تۇگىلى اۋلاسىنا دا كىرگىزبەيدى. سوندىقتان جۋرناليست وقيعا بولعان جەرگە ەرىگىپ ەمەس, حالىققا قاجەتتى اقپارات الۋ ءۇشىن باراتىنىن مەملەكەتتىك ورگان مەن مەكەمە وكىلدەرىنىڭ ساناسىنا سىڭىرەتىن ۋاقىت جەتتى. ياعني, ءوزىنىڭ كاسىبي قىزمەتىن اتقارىپ جۇرگەن تىلشىگە كەدەرگى كەلتىرۋ حالىق پەن مەملەكەتتى اقپارات الۋ مۇمكىندىگىنەن ايىرۋ دەگەن ءسوز. وسى جەردە ءتىلشى قاۋىمنىڭ تىم تومەندەپ كەتكەن بەدەلىن كوتەرۋ ءۇشىن (كىم-كورىنگەن قوقان-لوققى كورسەتىپ, تاياقتاپ كەتىپ جاتسا تومەندەگەنى ەمەي نەمەنە؟) كەزىندە مۇعالىمدەردى اراشالاپ قالعانىمىز سەكىلدى وسىنداي وسپادارلىقتاردان قورعايتىن «جۋرناليست مارتەبەسى تۋرالى» ارنايى زاڭ قابىلداۋ قاجەتتىگى انىق بايقالىپ تۇر. ول زاڭدا جۋرناليستەرىمىزدىڭ ابدەن قوردالانعان الەۋمەتتىك ماسەلەلەرىن شەشۋ جولدارىن دا قاراستىرۋعا بولار ەدى. شىمكەنتتىك ارىپتەستەرىمىزدىڭ باتىل قادامى قۋانتادى», دەلىنگەن جازبادا.
ەسكە سالا كەتەيىك, بۇعان دەيىن شىمكەنتتە جۋرناليستەردىڭ بەيبىت اكتسيا وتكىزگەنىن حابارلاعان ەدىك.
