جاعدايدىڭ كۇردەلەنۋىنە بايلانىستى وڭىردەگى وقۋشى سانى 300-دەن استاتىن بارلىق مەكتەپ ونلاين وقىتۋعا كوشتى. 3 ساۋىردە وبلىستىق سانيتارلىق-ەپيدەميالىق باقىلاۋ دەپارتامەنتى وبلىس اۋماعىندا قاتاڭ كارانتين جاريالادى. ەندى سەنبى كۇنى سپورت كەشەندەرى مەن جاتتىعۋ زالى جۇمىس ىستەمەيتىن بولسا, ال جەكسەنبىدە جابىق ازىق-ت ۇلىك جانە ازىق-ت ۇلىك ەمەس بازارلارى جابىلدى. سونداي-اق حالىققا قىزمەت كورسەتۋ ورتالىقتارى مەن پوشتا قىزمەتى تۇرعىندارعا الدىن الا جازىلۋ بويىنشا قىزمەت كورسەتىپ, جەكسەنبىدە جابىلادى. ساۋنا جانە مونشالار جۇمىس جانە سەنبى كۇندەرى ىشكى تارتىپكە سايكەس جۇمىس ىستەپ, جەكسەنبى كۇنى جابىلادى. سۇلۋلىق سالوندارى, شاشتاراز, سپا ورتالىقتارى جانە كوسمەتولوگيالىق قىزمەت كورسەتەتىن ورتالىقتار الدىن الا جازىلۋ تارتىبىمەن قابىلدايدى. جابىق سپورت نىساندارى (سپورت كەشەندەرى, سپورت مەكتەپتەرى, سپورت كلۋبتارى, جاتتىعۋ زالدارى), فيتنەس ورتالىقتارىنا دا تۇرعىندار الدىن الا جازىلۋى ءتيىس. بۇل ورتالىقتار سەنبى جانە جەكسەنبى كۇندەرى جۇمىس ىستەمەيدى», دەپ حابارلادى وبلىستىق سانيتارلىق-ەپيدەميالىق باقىلاۋ دەپارتامەنتىنىڭ ءباسپاسوز قىزمەتى.
سونداي-اق باسسەيندەر جۇمىس كۇندەرى ىشكى تارتىپكە سايكەس قىزمەت كورسەتسە, سەنبى جانە جەكسەنبى كۇندەرى جابىق تۇرادى. وبلىستىق دەنساۋلىق ساقتاۋ باسقارماسىنىڭ باسشىسى رۇستەم يساەۆتىڭ حابارلاۋىنشا, وڭىردە كوروناۆيرۋستىڭ «بريتاندىق» شتامى شەتەلدەن كەلگەن ءۇش تۇرعىننان انىقتالعان. ەگەر ەپيدەميالىق احۋال اسقىنىپ, جاعداي كۇردەلەنە تۇسسە, ناۋقاستاردى قابىلداۋعا اقتوبە قالاسىنداعى ءۇش ەمدەۋ مەكەمەسى دايىن تۇر. وبلىستىق ينفەكتسيالىق اۋرۋحانادا 130 كەرەۋەت دايىندالسا, فيزيوپۋلمونولوگيالىق ورتالىقتاعى كەرەۋەتتەر سانى 500-گە كوبەيتىلدى. تەمىر جول اۋرۋحاناسىنا 150 كەرەۋەتتىك ورىن, سونىڭ ىشىندە 25 رەانيماتسيالىق كەرەۋەت دايىندالدى. وبلىستىق پۋلمونولوگيالىق ورتالىقتا ناۋقاستار كوبەيگەن سوڭ وسىندا سۇيەك تۋبەركۋلەزىنە شالدىعىپ, ەمدەلىپ جاتقان ناۋقاس بالالاردى ەمدەيتىن «شاعالا» شيپاجايىنا ورنالاستىرۋ تۋرالى شەشىم قابىلداندى. ال «شاعالاداعى» بالالار قۋرايلى ەلدى مەكەنىندەگى مەكتەپ-ينتەرناتقا كوشىرىلەدى.
تويحانالار مەن كافەلەر قاتاڭ كارانتين كەزىندە دە جاسىرىن تۇردە توي-تومالاقتار, باسقوسۋلار جاساۋدان باس تارتىپ وتىرعان جوق. قازىر قالادا بىرنەشە مونيتورينگتىك توپ رەيدكە شىعىپ, تەك ءۇش كۇننىڭ ىشىندە وننان استام كارانتين تالابىن ورەسكەل بۇزعان دەرەكتەردى انىقتاپ, كاسىپكەرلەرگە ايىپپۇل سالدى. رۇستەم يساەۆ: «سوڭعى ءۇش كۇندە 600 رەزەرۆ قويدىق. تۇرعىندار قاتاڭ كارانتيندىك شارالاردى ساقتاماسا, جاعداي بۇدان دا كۇردەلەنە تۇسەدى. جۇرتشىلىق كوپ جينالاتىن جەردەن اۋلاق بولىپ, بەتپەردە كيىپ, اراقاشىقتىق ساقتاپ, توي-ساداقانى ازايتۋ كەرەك. دارىگەرلەر, مەدبيكەلەر دە دەمالىسسىز جىل بويى جۇمىس ىستەپ جاتىر. ولارعا دا وڭاي ەمەس. مەديتسينالىق جابدىقتار, ءدارى-دارمەك قورى جەتكىلىكتى بولسا دا, ەڭ باستىسى تۇرعىندارىمىز سانالى ارەكەتكە كوشپەسە بولمايدى. كەلەسى اپتادان باستاپ وڭىردە تۇرعىنداردى ۆاكتسينالاۋ جۇمىستارى قارقىندى تۇردە جۇرگىزىلەدى. ساۋىردە ۆاكتسينانىڭ ۇلكەن پارتياسى كەلگەندە ءىرى ساۋدا ورىندارى مەن گيپەرماركەتتەردە دە ۆاكتسينالاۋ جۇرگىزەمىز», دەدى.
قاتاڭ كارانتيننىڭ قاشان اياقتالاتىنى بەلگىسىز. ازىرگە وبلىس ورتالىقتارى اراسىندا بلوك-بەكەتتەر قويىلۋى تۋرالى ماسەلە كوتەرىلگەن جوق.
اقتوبە وبلىسى
