ءىس-شارانى وتكىزۋ بارىسىندا دەپارتامەنت باسشىسىنىڭ ورىنباسارى, ازاماتتىق قورعاۋ پولكوۆنيگى ورال ءابدىراحمانوۆ, توتەنشە جاعدايلاردى جويۋ ءبولىمىنىڭ باسشىسى, ازاماتتىق قورعاۋ پولكوۆنيگى سەرىك ناۋرىزباەۆ قۇرىلىمدىق بولىمشەلەردىڭ كومانديرلەرىنەن ءىس-قيمىلدارعا دايىندىعى تۋرالى باياندامالارىن تىڭدادى. سونداي-اق و.ءابدىراحمانوۆ تەحنيكانىڭ, قۇرال-جابدىقتاردىڭ جيناقىلىعى مەن جارامدىلىعىنا, پارامەترلەرىنىڭ قويىلعان ماقساتتارعا سايكەستىگىنە نازار اۋداردى. «سۋ تاسقىنى قاۋپىنە جەدەل ارەكەت ەتۋ ءۇشىن وبلىستا 7 نەگىزگى توپ قۇرىلدى, ولار وبلىس اۋداندارىنداعى نەعۇرلىم قاۋىپتى ۋچاسكەلەرگە باعىتتالاتىن بولادى. توپتاردىڭ قۇرامىندا 32 بىرلىك ارنايى تەحنيكا, 160 ادام بار. ءاربىر توپتا ءجۇزۋ قۇرالدارى, سۋ سورۋ تەحنيكاسى (42 بىرلىك موتوپومپا) بار. جەكە قۇرام كومبينەزون جانە قۇتقارۋ كەۋدەشەلەرى تۇرىندەگى قورعانىس قۇرالدارىمەن قامتاماسىز ەتىلدى», دەدى ول. سونداي-اق تاسقىنعا قارسى كۇرەسكە ۇلتتىق ۇلاننان 60 ادام جانە 3 بىرلىك تەحنيكا تارتۋ كوزدەلگەن. «بۇل توپتار ايىرتاۋ جانە ع.مۇسىرەپوۆ اۋداندارىنىڭ شاعىن وزەندەرىنە مونيتورينگ جۇرگىزەتىن بولادى. قاجەت بولعان جاعدايدا ولار مۇزدى جارىپ, ۇساقتاۋ, ەۆاكۋاتسيالىق ءىس-شارالار جۇرگىزەدى», دەدى س.ناۋرىزباەۆ.
ال كوكتەمگى سۋ تاسقىنىنىڭ كەشەگى بولجامى مەن وعان قارسى جاسالىپ جاتقان شارالار تۋرالى دەپارتامەنت باستىعىنىڭ ورىنباسارى, مايور مۇرات قانعوجينوۆ بىلاي دەدى: «سوڭعى جىلدارى وڭىردە سۋ تاسقىنىنا قارسى ءىس-شارالاردىڭ ۇلكەن كولەمى جۇزەگە اسىرىلدى, سونىڭ ناتيجەسىندە 160-تان استام ەلدى مەكەندە قاۋىپ-قاتەر تومەندەتىلدى. اتاپ ايتار بولساق, 13 سۋ وتكىزۋ قۇبىرى ورناتىلدى, 500 مەتردەن استام كەدەرگى سالىندى جانە 5,5 شاقىرىمنان استام توپىراق ۇيىندىلەرى نىعايتىلدى. بۇدان باسقا, سۋ باسۋعا اسا بەيىم ۋچاسكەلەردە 119 شاقىرىمنان استام توپىراق ۇيىندىلەرى مەن 7,5 شاقىرىم قورعانىش ۇيىندىلەرى سالىندى». سونداي-اق ول تج دەپارتامەنتىنىڭ توبى قۇرىلىپ, تۇراقتى دايىندىققا كەلتىرىلگەنىن, سۋ باسۋ قاۋپى تۋىنداعان جاعدايدا ەۆاكۋاتسيالاناتىن حالىقتى ۋاقىتشا ورنالاستىرۋدىڭ 325 پۋنكتى دايىندالعانىن ايتتى. ال 15 ناۋرىزدان باستاپ وبلىس اۋماعىنداعى ايىرتاۋ, تايىنشا, ءۋاليحانوۆ جانە ع.مۇسىرەپوۆ اۋداندارىنداعى 14 قاۋىپتى سۋ قويمالارىندا كەپتەلىستەردىڭ الدىن الۋ ماقساتىندا 4 630 شارشى مەتر جارىلىس جۇمىستارى جۇرگىزىلگەنىن اتاپ ءوتتى.
«قازگيدرومەت» رمك سولتۇستىك قازاقستان وبلىسى بويىنشا فيليالى ديرەكتورىنىڭ ورىنباسارى ناتاليا لەۆينا وبلىس اۋماعىندا جىلىمىق تەمپەراتۋرانىڭ باسىم بولۋى مەن جەردىڭ كۇندەلىكتى قاتۋى بايقالىپ وتىرعانىن اتاپ ءوتتى.
سولتۇستىك قازاقستان وبلىسى
