بىلتىر 15 قاراشادا ۆالەنتين بۋتەنكو كىسى قولىنان قازا تاپقان بولاتىن. ەر ادام سول كۇنى تاڭەرتەڭ تۇنگى اۋىسىمنان ۇيىنە قايتىپ كەلە جاتقان. مايقۇدىق شاعىناۋدانىنداعى 11ا ءۇيىنىن كىرەبەرىسىندە كورشىسى وعان كۇتپەگەن جەردەن پىشاقپەن شابۋىل جاساپ, ۇيقى ارتەرياسىن كەسىپ جىبەرگەن. ساراپشىلار جابىرلەنۋشىنىڭ دەنەسىندە 17 پىشاق جاراقاتى بارىن انىقتادى. ەر ادام ايەلىنىڭ قولىندا قايتىس بولدى. ايەلى كۇيەۋىنىڭ داۋىسىن ەستىگەندە پودەزگە جۇگىرىپ شىققان كورىنەدى.
«مەنىڭ كۇيەۋىم قانسىراپ, ماعان بىردەڭە ايتقىسى كەلدى, بىراق ايتا المادى. كورشىمىز قاسىمىزدا تۇرىپ, كۇيەۋىمنىڭ تۇندە اپكەسىن زورلاعانىن قايتالاۋمەن بولدى. مەن قاندى توقتاتۋعا تىرىستىم, بىراق قولىمنان كەلمەدى. جەدەل جاردەم كەلگەنگە دەيىن ول كوز جۇمدى», دەپ ەسكە الادى مارقۇمنىڭ ايەلى مارينا ەگوروۆا.
ۆالەنتين بۋتەنكو
سوتتا ايعاقتارىن وزگەرتكەن كۇدىكتى اراداعى جانجال كۇندەلىكتى ءومىر نەگىزىندە بولعانىن مالىمدەدى. ايتۋىنشا, كورشىسىنىڭ جوعارىدا ورنالاسقان پاتەرىنەن ءجيى سۋ اعىپ, ۇيدە شۋلى جيىندار ۇيىمداستىرعان. الايدا ونىڭ سوزدەرىنىڭ دۇرىستىعىنا ەشكىم كۋالىك ەتپەدى. تەرگەۋ بارىسىندا ونىڭ اپكەلەرىنەن دە جاۋاپ الىندى. ولاردىڭ ەشقايسىسى زورلاۋ نۇسقاسىن راستاعان جوق.
ەر ادامنىڭ مىنەز-قۇلقىنداعى بارلىق وعاشتىقتارعا قاراماستان, ساراپشىلار ونىڭ بويىندا پسيحيكالىق اۋىتقۋلار جوق دەگەن ۇيعارىمعا كەلگەن. كەرىسىنشە, سوتتا ونىڭ كىسى ولتىرۋگە دايىندالىپ, قۇربانىن تەرەزەدەن قاراپ كۇتىپ جۇرگەنى انىقتالدى.
«ونىڭ قانىنان ەشقانداي ەسىرتكى نەمەسە الكوگول تابىلعان جوق. ياعني ول نە ىستەپ جاتقانىن تۇسىنگەن. مۇنىڭ ءبارىن ەسكە ءتۇسىرۋ بىزگە قيىن. قىزىم ەكەۋمىز ءالى كۇنگە دەيىن ءوز-وزىمىزگە كەلە الار ەمەسپىز. قىزىما پسيحولوگتار كومەكتەسۋدە», دەيدى مارقۇمنىڭ جولداسى.
قىلمىستىق ءىس قاراعاندى وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتىندا قارالدى. سوتتالۋشى قازاقستان رەسپۋبليكاسى قىلمىستىق كودەكسىنىڭ «ادام ءولتىرۋ» 99-بابى 1-بولىگى بويىنشا كىنالى دەپ تانىلىپ, جازاسىن قاتاڭ رەجيمدەگى كولونيادا وتەۋ ءۇشىن 9 جىلعا باس بوستاندىعىنان ايىرىلدى.
